ខេត្តកំពង់ធំ ៖ លោក ងួន ញ៉ិល សមាជិកគណៈអចិន្ត្រៃយ៍ គណៈកម្មាធិការកណ្តាលគណបក្សប្រជាជនកម្ពុជា ប្រធានក្រុមការងារគណៈកម្មាធិការកណ្តាលគណបក្សប្រជាជនកម្ពុជា ចុះជួយខេត្តកំពង់ធំ និងជាអនុប្រធានទី១រដ្ឋសភានៃព្រះរាជាណាចក្រកម្ពុជា ដែលអមដំណើរដោយ លោក ណាំ ទុំ ប្រធានគណៈកម្មាធិការគណបក្សប្រជាជនកម្ពុជាខេត្តកំពង់ធំ និងជាប្រធានក្រុមប្រឹក្សាខេត្ត លោក សោម សុផាត អនុប្រធានប្រចាំការគណៈកម្មាធិការគណបក្សប្រជាជនកម្ពុជាខេត្តកំពង់ធំ និងជាអភិបាលរងខេត្ត កាលពីថ្ងៃទី២៤ មីនា ឆ្នាំ២០១២ កន្លងទៅនេះ បានអញ្ជើញចុះបំពេញការងារជួបប្រជុំជាមួយគណៈកម្មាធិការគណបក្សប្រជាជនកម្ពុជា ស្រុកស្ទោង និងស្រុកកំពង់ស្វាយ ។ គោលបំណងនៃដំណើរបំពេញការងារនេះ គឺដើម្បីពង្រឹងគណបក្សគ្រប់លំដាប់ថ្នាក់ ត្រៀមឆ្ពោះទៅកាន់ការបោះឆ្នោតជ្រើសរើសក្រុមប្រឹក្សាឃុំ-សង្កាត់ នាថ្ងៃទី៣ មិថុនា ឆ្នាំ២០១២ ខាងមុខ ធានាបាននូវជោគជ័យដែលជាឈ្នាន់ឬជាកត្តាកំណត់ ក្នុងការដណ្តើមបានជោគជ័យក្នុងការបោះឆ្នោតរដ្ឋសភានាឆ្នាំ២០១៣ ។
មុននឹងផ្តល់ជូននូវអនុសាសន៍ ក៏ដូចជាឯកសារពិគ្រោះ ឬឯកសារជំនួយស្មារតីអំពីការពង្រឹងគណបក្ស លោក ងួន ញ៉ិល បានឱ្យស្រុកទាំង២រាយការណ៍អំពីលទ្ធផល ទិន្នផលស្រូវ កំណើនជីវភាពរស់នៅរបស់ប្រជាជន និងការប្រឡងប្រណាំងអំពីភូមិ-ឃុំមានសុវត្ថិភាព ដែលស្រុកទាំង២ អនុវត្តបានល្អ ក្នុងពេលកន្លងមក ។
ចំណុចសំខាន់ លោក ងួន ញ៉ិល បានប្រ កាសជូនស្រុកទាំង២នូវការសម្រេចប្រកបដោយគតិបណ្ឌិតរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ផ្តល់ដីស្រែជូនប្រជាជនចំនួន៤.០០៤គ្រួសារ ដែលមានទំនាស់ជាមួយក្រុមហ៊ុនកូរ៉េ ដែលប្រជាជនទាំង៤.០០៤គ្រួសារសរសេរពាក្យបណ្តឹងមករូបលោក ហើយលោកបានសរសេរលិខិតគារពជូនសម្តេចអគ្គមហាសេនាបតីតេជោ ហ៊ុន សែន ដើម្បីសុំការសម្រេចពីសម្តេច លើការផ្តល់ដីជូនប្រជាជនវិញ ។
បន្ទាប់មក លោក ងួន ញ៉ិល បានផ្តល់ជូនអង្គប្រជុំនូវឯកសារពិគ្រោះ និងអនុសាសន៍សំខាន់ៗ អំពីគន្លឹះនៃការពង្រឹងពង្រីកសមាជិកបក្ស អ្នកគាំទ្របក្ស របៀបរបបធ្វើការងាររបស់គណបក្សគ្រប់ជាន់ថ្នាក់ ការពង្រឹងក្បាលម៉ាស៊ីនដឹកនាំរបស់គណបក្សដែលផ្តោតសំខាន់លើការងារនយោបាយ ការងារសតិអារម្មណ៍ និងការងារចាត់តាំង និងយុទ្ធសាស្ត្រ យុទ្ធវិធី ដើម្បីទទួលបាននូវជោគជ័យ ក្នុងការបោះឆ្នោតទាំង២ខាងមុខ ។ ចុងបញ្ចប់ លោក ងួន ញ៉ិល សំណូមពរឱ្យមន្ត្រីបក្សគ្រប់ជាន់ថ្នាក់មានសាមគ្គីផ្ទៃក្នុងល្អ និងចៀសវាងឱ្យបាននូវអំពើអសកម្មទាំងឡាយ ។
លោក ងួន ញ៉ិល ក៏បានផ្តល់ជូនគណៈកម្មធិការគណបក្សប្រជាជនកម្ពុជា ស្រុកស្ទោង និងស្រុកកំពង់ស្វាយ ក្នុងមួយស្រុកថវិកាចំនួន២.០០០ដុល្លារ ៕
ចែករំលែកព័តមាននេះ