ខេត្តព្រះសីហនុ ៖ កាលពីព្រឹកថ្ងៃទី២៥ មីនា ២០១២ នៅស្នាក់ការគណបក្សប្រជាជនស្រុកព្រៃនប់ មានរៀបចំពិធីសំណេះសំណាលជាមួយសមាជិកថ្មីគណបក្សប្រជាជនកម្ពុជា ដែលទើបមកពីគណបក្សផ្សេងៗ ស្ម័គ្រចិត្តចូលរួមរស់ជាមួយគណបក្សប្រជាជនកម្ពុជា។ ពិធីនោះមានការអញ្ជើញចូលរួមពីលោកស្បោង សារ៉ាត ប្រធានគណបក្សប្រជាជនកម្ពុជាខេត្តព្រះសីហនុ លោកសួស កាណាន ប្រធានក្រុមការងារចុះជួយខេត្តព្រះសីហនុ លោកទិត វុទ្ធី ប្រធានគណៈកម្មាធិការបក្សស្រុកព្រៃនប់លោក លោកស្រីប្រធានអនុប្រធានគណៈកម្មាធិការបក្សខេត្ត និងសមាជិកសមាជិកា គណបក្សប្រជាជនកម្ពុជាចូលរួមយ៉ាងច្រើនកុះករ ។
លោកទិត វុទ្ធី បានឡើងអានរបាយការណ៍ស្វាគមន៍ និងគួសបញ្ជាក់ពីស្ថានភាពជីវភាពរស់នៅរបស់បងប្អូនប្រជាពលរដ្ធក្នុងស្រុក ដោយសង្កត់ធ្ងន់ទៅលើផែនការសកម្មភាពរចនាសម្ព័ន្ធចាត់តាំងរបស់គណៈកម្មាធិការបក្សស្រុកគណៈកម្មាធិការបក្សឃុំ សាខាបក្សឃុំ ភូមិដែលរហូតមកដល់ពេលនេះទូទាំងស្រុកសមាជិកគណបក្សប្រជាជនកម្ពុជាមានចំនួនកើនឡើងគួជាទីមោទនៈ។ លោកទិត វុទ្ធី បានបន្តទៀតថា ជាក់ស្តែងដូចជាពេលនេះស្រាប់ មានសមាជិកថ្មីចំនួន១៣៧នាក់មកពី៨ឃុំ ចេញពីគណបក្សផ្សេងៗមកចូលរួមរស់ជាមួយគណបក្សប្រជាជនកម្ពុជា ដែលទាំងនេះ គឺជាការសម្រេចចិត្តយ៉ាងត្រឹមត្រូវរបស់បងប្អូនក្នុងការរួមចំណែកជាមួយប្រមុខរដ្ឋាភិបាល ដែលមានសម្តេចតេជោហ៊ុន សែន ជានាយករដ្ឋមន្រ្តី និងជាអនុប្រធានគណបក្សប្រជាជនកម្ពុជា។ លោកកសូស កាណាន បានមានមតិសំណេះសំណាលដោយលើកឡើងពីប្រវត្តិនឹងសកម្មភាពរបស់គណបក្ស ពិសេសរយៈពេល៣៣ឆ្នាំកន្លងមកនេះ ដែលគណបក្សប្រជាជនកម្ពុជាមិនត្រឹមតែរំដោះប្រជាជនឱ្យរួចផុតពីរបបប្រល័យពូជសាសន៍ប៉ុលពតប៉ុណ្ណោះទេ តែគណបក្សប្រជាជនកម្ពុជា បាននាំសុខសន្តិភាព និងការអភិវឌ្ឍលើគ្រប់វិស័យ ។
នៅក្នុងឱកាសនោះដែរ លោកស្បោង សារ៉ាត ប្រធានគណបក្សខេត្តព្រះសីហនុ បានក្រើនរំលឹកដល់សមាជិកសមាជិកាទាំងអស់ត្រូវរួមសាមគ្គីផ្ទៃក្នុងបក្សឱ្យបានល្អដើម្បីពង្រឹង និងពង្រីកសមាជិកបក្សមូលដ្ឋានឱ្យបានរឹងមាំ ដើម្បីឱ្យគណបក្សទទួលបានជោគជ័យ និងដើម្បីបានសម្តេចតេជោហ៊ុនសែនធ្វើជានាយករដ្ឋមន្រ្តីសម្រាប់អាណត្តិក្រោយៗទៀត ៕
ចែករំលែកព័តមាននេះ