ខេត្តពោធិ៍សាត់ ៖ ព្រឹកថ្ងៃទី២៦ មីនា ២០១២ លោកឆាយ ថន ទេសរដ្ឋមន្ត្រី រដ្ឋមន្ត្រីក្រសួងផែនការបានអញ្ជើញជាអធិបតីភាពក្នុងពិធីប្រកាសតែងតាំងប្រធានមន្ទីរផែនការខេត្តពោធិ៍សាត់ថ្មី ។ ពិធីនេះបានប្រារព្ធនៅសាលាខេត្តដោយមានការចូលរួមពីសំណាក់លោកអ៊ុក ចាយ រដ្ឋលេខាធិការ លោក លោកស្រីសមាជិក ក្រុមប្រឹក្សាខេត្ត អភិបាលរងខេត្ត និងថ្នាក់ដឹកនាំមន្ទីរ អង្គភាពនានាក្នុងខេត្ត ។
យោងតាមប្រកាសរបស់ក្រសួងលេខ១៧៩ ប្រក.ផក ចុះថ្ងៃទី១៧ តុលា ២០១១ បានសម្រេចតែងតាំងលោកឈុន បូណារិទ្ធិ ជាប្រធានមន្ទីរផែនការខេត្តពោធិ៍សាត់ ជំនួសលោកឈឹម ផាវ៉េត ដែលបានចូលនិវត្តន៍កាលពីថ្ងៃទី១ មីនា ២០១២ កន្លងមកនេះ ។ លោកឈុន បូណារិទ្ធិ ប្រធានមន្ទីរផែនការខេត្តពោធិ៍សាត់ថ្មី បានឡើងថ្លែងអំណរគុណចំពោះលោកទេសរដ្ឋមន្ត្រី ក៏ដូចជាមន្ត្រីរាជការនៅក្រសួង និងមន្ទីរដែលមានទំនុកចិត្តគាំទ្រឱ្យរូបលោកធ្វើជាប្រធានមន្ទីរផែនការខេត្តពោធិ៍សាត់ នេះ ។ តួនាទីថ្មីនេះតម្រូវឱ្យមានការទទួលខុសត្រូវខ្ពស់ក្នុងការសម្របសម្រួល ដឹកនាំនិងចាត់ចែងការងាររបស់មន្ទីរដោយប្រុងប្រយ័ត្ន ដើម្បីធ្វើឱ្យបានជោគជ័យស្របតាមបេសកកម្ម ទស្សនវិស័យ និងគោលដៅរបស់ក្រសួង ព្រមទាំងយុទ្ធសាស្ត្រចតុកោណរបស់រាជរដ្ឋាភិបាលក្រោមការដឹកនាំដ៏ឈ្លាសវៃរបស់សម្តេចអគ្គមហាសេនាបតីតេជោ ហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា ។
លោកឈុន បូណារិទ្ធ បានប្តេជ្ញាប្រមូលនូវកម្លាំងកាយចិត្តប្រាជ្ញាស្មារតី និងបទពិសោធន៍ទាំងឡាយដែលមានកន្លងមកសម្រាប់ធ្វើជាមូលដ្ឋានក្នុងការដឹកនាំគ្រប់គ្រងមន្ត្រីរាជការក្រោមឱវាទមន្ទីរប្រកបដោយសមភាព សមធម៌ យុត្តិធម៌ ធានាបាននូវតម្លាភាព ប្រសិទ្ធភាព ប្រក្រតីភាពការងារ និងបញ្ចៀសឱ្យបាននូវវិវាទការងារផ្ទៃក្នុងដាច់ខាត ៕
ចែករំលែកព័តមាននេះ