រាជធានីភ្នំពេញ ៖ កាលពីថ្ងៃទី៧ កុម្ភៈ ឆ្នាំ២០១២ គណៈកម្មាធិការជាតិរៀបចំការបោះ ឆ្នោតបានចេញសេចក្តីប្រកាសព័ត៌មានមួយ ដោយបដិសេធទៅនឹងពាក្យបណ្តឹងចំនួន២ របស់គណបក្សសម រង្ស៊ី ដែលដាក់ទៅ គ.ជ.ប ទាក់ទងនឹងការឃោសនាបោះឆ្នោតនិងមន្ត្រីរៀបចំការបោះឆ្នោតព្រឹទ្ធសភាខេត្តកំពង់ឆ្នាំង ។ ការប្រកាសបដិសេធនេះធ្វើឡើងកាលពីថ្ងៃទី៦ កុម្ភៈ ឆ្នាំ២០១២ បន្ទាប់ពី គ.ជ.ប បានលើកយកករណីនេះ មកពិនិត្យនិងពិភាក្សា ។
គ.ជ.ប បញ្ជាក់ថា បណ្តឹងទាក់ទងនឹងការឃោសនាបោះឆ្នោតគឺតំណាងគណបក្សសម រង្ស៊ី នៅខេត្តកំពង់ឆ្នាំងដាក់ទៅគ.ខ.ប កំពង់ឆ្នាំងកាលពីថ្ងៃទី២៨ មករា ឆ្នាំ២០១២ ដោយចោទថា អាជ្ញាធរអុកឡុក រំខាន រារាំង បំភិតបំភ័យមិនឱ្យប្រជាពលរដ្ឋទៅចូលរួមទស្សនាវីដេអូឃោសនារបស់គណបក្ស សម រង្ស៊ី នៅក្នុងក្រុងកំពង់ឆ្នាំង ។ ករណីនេះត្រូវបាន គ.ខ.ប កំពង់ឆ្នាំងបើកសវនាការដោះស្រាយកាលនៅថ្ងៃទី១កុម្ភៈ ឆ្នាំ២០១២ និងសម្រេចបដិសេធបណ្តឹងនេះ ។
គណបក្សសម រង្ស៊ី មិនបានទទួលយកសេចក្តីសម្រេចនេះទេ បានដាក់ពាក្យបណ្តឹង ទៅគ.ជ.ប កាលពីថ្ងៃទី២ កុម្ភៈ ឆ្នាំ២០១២ ។ ដូច្នេះហើយគ.ជ.ប បានចាត់មន្ត្រីទៅដល់ទីកន្លែងកើតហេតុមុននឹងពិនិត្យនិងពិភាក្សាសម្រេចចេញសេចក្តីសម្រេចបដិសេធលើសំណុំរឿងនេះ។
បណ្តឹងមួយទៀតគណបក្សសម រង្ស៊ី ប្តឹងលោកស្រីនួន ចាន់នី ប្រធាន គ.ខ.ប កំពង់ឆ្នាំងពីបទរំខានការបោះឆ្នោតនិងរាប់សន្លឹកឆ្នោត ។ បណ្តឹងនេះក៏ត្រូវ គ.ជ.ប បានចាត់មន្ត្រីទៅស៊ើបអង្កេតដល់កន្លែង ហើយរកឃើញថាលោកស្រីនួន ចាន់នី អនុវត្តត្រឹមត្រូវតាមតួនាទីរបស់ខ្លួន ៕
ចែករំលែកព័តមាននេះ