ខេត្តតាកែវ ៖ កាលពីថ្ងៃទី៣ កុម្ភៈ ឆ្នាំ២០១២ នៅស្នាក់ការគណបក្សប្រជាជនកម្ពុជា ឃុំពន្លៃ ស្រុកអង្គរបុរី មានបើកកិច្ចប្រជុំសមា ជិកគណបក្សប្រជាជនកម្ពុជាទូទាំងឃុំ ក្រោមអធិបតីភាពលោកបណ្ឌិតណៅ ធួក ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល។
នៅកិច្ចប្រជុំនេះ សមាជិក សមាជិកានៃអង្គពិធីបានតាមដានស្តាប់ដោយយកចិត្តទុកដាក់នូវសេចក្តីរាយការណ៍ជាបន្តបន្ទាប់ពីសំណាក់ប្រធានគណៈកម្មាធិការបក្សមូលដ្ឋាន តំណាងសមាជិក សមាជិកាគណបក្ស និងតំណាងក្រុមការងារគណបក្សប្រជាជនកម្ពុជាថ្នាក់កណ្តាលចុះជួយឃុំពន្លៃ អំពីស្ថានភាពជីវភាពរស់នៅរបស់ប្រជាពលរដ្ឋ អំពីការងារបង្កបង្កើនផលកសិកម្ម និងលទ្ធផលពង្រីកសមាជិកបក្សដែលជាកម្លាំងស្នូល ក្នុងស្រទាប់ប្រជាជនមហាជនឈានឆ្ពោះទៅបម្រើការងារនយោបាយ សតិអារម្មណ៍ និងជាកម្លាំងចលករដ៏សំខាន់នៅក្នុងកិច្ចការស្តារ និងអភិវឌ្ឍន៍ភូមិ-ឃុំលើគ្រប់វិស័យ។
លោកបណ្ឌិតណៅ ធួក បានមានប្រសាសន៍ពាំនាំនូវការផ្តាំផ្ញើសាកសួរសុខទុក្ខ ដោយសេចក្តីនឹករលឹកពីសំណាក់សមេ្តចប្រមុខថ្នាក់ដឹកនាំទាំងបី គឺសមេ្តចអគ្គមហាធម្មពោធិសាល ជា ស៊ីម ប្រធានគណបក្សប្រជាជនកម្ពុជា ប្រធានព្រឹទ្ធសភា សមេ្តចអគ្គមហាពញាចក្រី ហេង សំរិន ប្រធានកិត្តិយសគណបក្សប្រជាជនកម្ពុជា និងជាប្រធានរដ្ឋសភា និងសម្តេចអគ្គមហាសេនាបតីតេជោហ៊ុន សែន អនុប្រធានគណបក្ស និងជានាយករដ្ឋមន្រ្តីនៃព្រះរាជាណាចក្រកម្ពុជា ដែលជានិច្ចកាលសម្តេចទាំង៣ តែងតែយកចិត្តទុកដាក់គិតគូរដោះស្រាយរាល់ការលំបាកខ្វះខាតរបស់ប្រជាពលរដ្ឋនៅគ្រប់មូលដ្ឋាន និងជំរុញការអភិវឌ្ឍប្រទេសជាតិលើគ្រប់វិស័យ។ លោកបណ្ឌិតណៅ ធួក បានសង្កត់ធ្ងន់ពីគោលបំណងនៃការជួបជុំសមាជិកបក្សនាពេលនេះ គឺទី១-ដើម្បីផ្សព្វផ្សាយលទ្ធផលនៃការបោះឆ្នោតព្រឹទ្ធសភាកន្លងមក ដែលជាព្រឹត្តិការណ៍ប្រវត្តិសាស្រ្តរបស់ប្រទេសកម្ពុជាយើងនៅលើមាគ៌ាលទ្ធិប្រជាធិបតេយ្យសេរីពហុបក្ស និងទី២-ដើម្បីពិនិត្យវាយតម្លៃលទ្ធផលការងារដែលបានអនុវត្តកន្លងមក និងកំណត់ដាក់ចេញនូវទិសដៅផែនការអនុវត្តបន្តលើការងារកសាងសមាជិកបក្ស ប្រកបដោយគុណភាព ឆ្ពោះទៅចូលរួមការបោះឆ្នោតឃុំ-សង្កាត់នាពេលដ៏ខ្លីខាងមុខ។
នៅក្នុងឱកាសនោះដែរ លោកបណ្ឌិតណៅ ធួក ក៏បានអញ្ជើញចែកប្រតិទិនចំនួន១.៦០០ច្បាប់ជូនដល់សមាជិក សមាជិកាដែលចូលរួមឧបត្ថម្ភថវិកាដល់អ្នកចូលរួមក្នុងពិធីចំនួន១១៧នាក់ ឧបត្ថម្ភការសាងសង់តូបលោកតាម្ចាស់ស្រុក និងឧបត្ថម្ភថវិកាសម្រាប់ការងាររដ្ឋបាលគណបក្សឃុំសរុបទាំងអស់៤លានរៀល។៕
ចែករំលែកព័តមាននេះ