រាជធានីភ្នំពេញ ៖ ចោរគាស់ផ្ទះម្នាក់ត្រូវបានប្រជាពលរដ្ឋនាំគ្នាចាប់ខ្លួន កាលពីវេលាម៉ោង១១និង៤០នាទីយប់ថ្ងៃទី៦ កុម្ភៈ រួចប្រគល់ទៅឱ្យប៉ូលិសប៉ុស្តិ៍ផ្សារដើមគចាត់ការបន្ទាប់ពីធ្វើសកម្មភាពគាស់ផ្ទះលេខ៥៥ E0 ផ្លូវលេខ២៤៣ សង្កាត់ផ្សារដើមគ ខណ្ឌទួលគោក ពុំបានសម្រេចដោយម្ចាស់ផ្ទះមកទាន់ ។
ចោរដែលត្រូវម្ចាស់ផ្ទះឃាត់ខ្លួននោះឈ្មោះផាន់ បូរ៉ា ហៅ នី ភេទប្រុស អាយុ២០ឆ្នាំ ជាកម្មករ ស្នាក់នៅផ្ទះជួល ក្នុងសង្កាត់បឹងសាឡាង ខណ្ឌទួលគោក ចំណែកម្ចាស់ផ្ទះឈ្មោះសេក វីរៈ ភេទប្រុស អាយុ៣៦ឆ្នាំ ជាមន្ត្រីបម្រើការងារនៅទីស្តីការគណៈរដ្ឋមន្ត្រី ។ នៅពេលឃាត់ខ្លួនសមត្ថកិច្ចដកហូតបានកូនសោលេខ៨ដែលកែច្នៃជាដែកសំប៉ែតចុងស្រួចសម្រាប់កាច់បំបាក់សោ១ កាំបិតប៉័ងតោដងឈើ១ ទួរណឺវិស១ សោម៉ូតូ២ និងមេសោសូឡិច២ ។
តាមមន្ត្រីប៉ូលិសខណ្ឌទួលគោកបានឱ្យដឹងថា មុនពេលកើតហេតុម្ចាស់ផ្ទះរួមទាំងក្រុមគ្រួសារបានធ្វើដំណើរទៅលេងបងប្អូននៅក្នុងសង្កាត់ទួលសង្កែ ដោយចាក់សោផ្ទះទុកចោល ។ លុះវេលាយប់ជ្រៅបានធ្វើដំណើរត្រឡប់មកផ្ទះវិញឃើញផ្ទះបើកភ្លើង ក៏នាំគ្នាបើកទ្វារចូលទៅក្នុង ស្រាប់តែឃើញចោរម្នាក់កំពុងរើកកាយរកសម្ភារ និងរបស់របរ ។ ពេលឃើញម្ចាស់ផ្ទះភ្លាមចោរនោះបានទាញកាំបិតបុ័ងតោគំរាម តែត្រូវម្ចាស់ផ្ទះរួមទាំងបងប្អូននាំគ្នាស្ទុះទៅចាប់ជាប់រួចប្រគល់ឱ្យសមត្ថកិច្ចតែម្តង ។ នៅចំពោះមុខសមត្ថកិច្ច ជនសង្ស័យបានសារភាពថា ខ្លួនមានគ្នាតែម្នាក់ឯងទេ និងបានធ្វើសកម្មភាពគាស់ផ្ទះចូលលួចមែនតែពុំបានសម្រេចឡើយដោយសារម្ចាស់ផ្ទះគេមកទាន់ ៕
ចែករំលែកព័តមាននេះ