រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានប្រាប់ឱ្យដឹងថា ក្រោយជំនួបពិភាក្សាការងារជាមួយសម្តេចតេជោនាយករដ្ឋមន្ត្រីហ៊ុន សែន លោក NOPPOL NILINTHANG GOON អគ្គនាយកប្រតិបត្តិនៃក្រុមហ៊ុន RATCHBURI ELECTRICITY GENERATING HOLDING PLC បានគោរពសម្តេចតេជោនាយករដ្ឋមន្ត្រី សូមការគាំទ្រការវិនិយោគក្រុមហ៊ុនរបស់លោក សហការជាមួយនឹងក្រុមហ៊ុនកោះកុង ដើម្បីសាងសង់នូវរោងចក្រអគ្គិសនីប្រើធ្យូងថ្មដែលមានទំហំ១.៨០០មេហ្គាវ៉ាត់ នៅខេត្តកោះកុង។
លោក NOPPOL NILINTHANG GOON បានគោរពសូមការគាំទ្រពីសម្តេចតេជោនាយករដ្ឋមន្ត្រីបែបនេះនារសៀលថ្ងៃទី៦ កុម្ភៈ ឆ្នាំ២០១២ នៅវិមានសន្តិភាព ក្នុងឱកាសលោកអញ្ជើញចូលជួបពិភាក្សាការងារជាមួយសម្តេចតេជោនាយករដ្ឋមន្ត្រីហ៊ុន សែន។
ទន្ទឹមនឹងនេះ លោកNOPPOL NILIN-THANG GOON ក៏បានរាយការណ៍ជម្រាបជូនសម្តេចតេជោនាយករដ្ឋមន្ត្រីអំពីប្រវត្តិក្រុមហ៊ុនរបស់លោក គឺជាក្រុមហ៊ុនដ៏ធំមួយនៅក្នុងប្រទេសថៃ ហើយក្នុងនោះភាគហ៊ុន៤៥% គឺជាភាគហ៊ុនរបស់អាជ្ញាធរអគ្គិសនីថៃ ។ ក្រុមហ៊ុននេះបានចុះបញ្ជីក្នុងទីផ្សារភាគហ៊ុនកាលពីឆ្នាំ២០០០ គឺជាក្រុមហ៊ុនផលិតអគ្គិសនីឯករាជ្យ ហើយមានបទពិសោធន៍ធ្វើនៅប្រទេសឡាវ និងប្រទេសដទៃទៀត ។ ក្រុមហ៊ុននេះ ប្រើប្រាស់បច្ចេកទេសមិនឱ្យប៉ះពាល់ដល់បរិស្ថានទេ និងលក់ថាមពលអគ្គិសនីមកឱ្យកម្ពុជាក្នុងតម្លៃពិសេស ហើយអគ្គិសនីដែលនៅសល់នឹងនាំទៅលក់នៅប្រទេសថៃ។
លោក NOPPOL NILINTHANG GOON បានជម្រាបជូនសម្តេចតេជោនាយករដ្ឋមន្ត្រីទៀតថា ការសិក្សាជំហានដំបូងគឺបានធ្វើរួចមកហើយទៅលើផលប៉ះពាល់ដល់បរិស្ថាន នៅពេលបញ្ចប់ការសិក្សារួចរាល់ ក្រុមហ៊ុននឹងផ្តល់ឯកសារជូនក្រសួងឧស្សាហកម្មរ៉ែ និងថាមពល និងក្រសួងបរិស្ថាន ដើម្បីពិនិត្យលើគម្រោងវិនិយោគនេះ។
ជាការឆ្លើយតប សម្តេចតេជោនាយករដ្ឋមន្ត្រីហ៊ុន សែន បានស្វាគមន៍នូវគម្រោងនេះ ហើយបានមានប្រសាសន៍ថា គម្រោងនេះនឹងទទួលបានជោគជ័យ ព្រោះគម្រោងនេះផ្តល់នូវផលប្រយោជន៍រួមទាំងព្រះរាជាណាចក្រកម្ពុជា ក៏ដូចជាព្រះរាជាណាចក្រថៃដែរ ដែលប្រទេសទាំងពីរកំពុងតែត្រូវការថាមពលអគ្គិសនី។
សម្តេចតេជោនាយករដ្ឋមន្ត្រីហ៊ុន សែន ផ្តល់អនុសាសន៍ឱ្យក្រុមហ៊ុនរកអ្នកសិក្សាឯករាជ្យ ធ្វើការសិក្សា ដើម្បីវាយតម្លៃលើបញ្ហាប៉ះពាល់លើបរិស្ថានក្នុងគម្រោងអភិវឌ្ឍន៍នេះ ។ សម្តេចតេជោនាយករដ្ឋមន្ត្រីបានស្នើសុំក្រុមហ៊ុនជួយបណ្តុះបណ្តាលធនធានមនុស្សដើម្បីឱ្យធនធានមនុស្សទាំងនោះអាចយកមកប្រើប្រាស់នៅក្នុងរោងចក្រនេះ នៅពេលដែលរោងចក្រនេះដំណើរការ ៕
ចែករំលែកព័តមាននេះ