ខេត្តមណ្ឌលគិរី ៖ នៅសាលប្រជុំក្នុងសណ្ឋាគារអៀនករុណា ស្ថិតក្រុងសែនមនោរម្យ ខេត្តមណ្ឌលគិរី កាលពីព្រឹកថ្ងៃទី៦ កុម្ភៈ ២០១២ តំបន់ប្រតិបត្តិការសឹករងមណ្ឌលគិរី បានរៀបចំពិធីបូកសរុបលទ្ធផលការងារយោធាឆ្នាំ២០១១ និងផ្សព្វផ្សាយទិសដៅផែនការសកម្មភាពការងារយោធោឆ្នាំ២០១២ នៃតំបន់ប្រតិបត្តិការសឹករងមណ្ឌលគិរី ក្រោមអធិបតីភាព លោកចាន់ យឿន អភិបាលខេត្ត លោកឧត្តមសេនីយ៍ទោ ហេង ខាំវណ្ណ មេបញ្ជាការរងយោធភូមិភាគ១ និងមានការចូលរួមពីលោកឧត្តមសេនីយ៍ត្រីមាស នាក់ មេបញ្ជាការតំបន់ប្រតិបត្តិការសឹករងខេត្តមណ្ឌលគិរី រួមនឹងមេបញ្ជាការរងកងរាជអាវុធហត្ថខេត្ត លោកស្នងការនគរបាលខេត្ត និងនាយ នាយរងជាច្រើនរូបទៀត ។
បន្ទាប់ពីលោកអុឹម រិទ្ធារ៉ា មេបញ្ជាការវរៈការពារព្រំដែនគោកលេខ១០៣ និងលោកស៊ុំ សុវណ្ណ មេបញ្ជាការវរៈ១ ឡើងរាយការណ៍អំពីស្ថានភាព ការរស់នៅរបស់កម្លាំង និងសន្តិសុខតាមខ្សែបន្ទាត់ព្រំដែន ដែលខេត្តមណ្ឌលគិរីមានព្រំប្រទល់ជាប់នឹងប្រទេសវៀតណាមចំនួន៣ខេត្ត គឺខេត្តដាក់ណុង ដាក់ឡាក់ ប៊ិញ ភឿក រួចមក លោកវរសេនីយ៍ទោ តន ឆៃ មេបញ្ជាការរង និងជានាយសេនាធិការតំបន់ប្រតិបត្តិការសឹករងមណ្ឌលគិរី បានបូកសរុបលទ្ធផលការងារប្រចាំឆ្នាំ២០១១ កន្លងមក របស់កម្លាំងយោធាតំបន់ប្រតិបត្តិការសឹករងមណ្ឌលគិរី ជូនគណៈអធិបតីជ្រាប ។
នាឱកាសនោះផងដែរ ក៏មានការផ្ទេរភារកិច្ច និងបំពាក់ឋានន្តរស័ក្តិជូនមេដាយយោធាតំបន់ប្រតិបត្តិការសឹករងមណ្ឌលគិរី ចំនួន៥៥រូប ដែលមានស្នាដៃនាពេលកន្លងមកក្នុងនោះមានការផ្ទេរមុខងារ៨រូប ព្រិនន្ទបាលឯក ឡើងនាយចំណង់ ២៧រូប ផ្តល់ឥស្សរិយយសមេដាយមាស៤រូប មេដាយប្រាក់៧រូប សំរឹទ្ធិ១រូប ។ លោកឧត្តមសេនីយ៍ទោហេង ខាំវណ្ណ មេបញ្ជាការរងយោធភូមិភាគ១ បានកោតសរសើរដល់កងកម្លាំងយោធាទាំងអស់ដែលបានការពារសន្តិសុខនៅតាមបន្ទាត់ព្រំដែនបានល្អ និងបានអនុវត្តតាមផែនការរបស់ថ្នាក់ដឹកនាំដែលបានដាក់បទបញ្ជាកន្លងមក ។
គណៈអធិបតីក៏បានក្រើនរំលឹកដល់កងកម្លាំងទាំងអស់ត្រូវអនុវត្តការងារឱ្យបានល្អបន្តទៀតនិងឧស្សាហ៍ចុះពិនិត្យតាមបន្ទាត់ព្រំដែន និងសហការជាមួយគណៈកម្មការដែលចុះមកវាស់វែងបោះបង្គោលកំណត់ព្រំដែន ៕
ចែករំលែកព័តមាននេះ