ខេត្តកំពង់ឆ្នាំង ៖ នៅក្នុងវិធានការអនុវត្តបន្តដែលសម្រេចដោយកិច្ចប្រជុំបូកសរុបសភាពការណ៍វិស័យជលផលឆ្នាំ២០១១ និងទិសដៅឆ្នាំ២០១២ កាលពីថ្ងៃទី៣១ មករា ឆ្នាំ២០១២ សមត្ថកិច្ចរដ្ឋបាលជលផលគ្រប់លំដាប់ថ្នាក់ គ្រប់ផ្នែកនៅក្នុងដែនសមត្ថកិច្ចនៃអធិការដ្ឋានរដ្ឋបាលជលផលខាងត្បូង និងខាងជើងបឹងទន្លេសាប ដោយមានការគាំទ្រពីកងកម្លាំងប្រដាប់អាវុធ ដឹកនាំដោយលោកបណ្ឌិតណៅ ធួក ប្រតិភូរាជរដ្ឋាភិបាលកម្ពុជា ទទួលបន្ទុកជាប្រធានរដ្ឋបាលជលផល នៅថ្ងៃទី៣ កុម្ភៈ ឆ្នាំ២០១២ បានបើកយុទ្ធនាការបង្ក្រាបបទល្មើសនេសាទខុសច្បាប់នៅតាមចំណុចសំខាន់ៗក្នុងតំបន់បឹងទន្លេសាប នៅក្នុងភូមិសាស្ត្រស្រុកកំពង់លែង ខេត្តកំពង់ឆ្នាំង ដូចជានៅតាមចំណុចចុងព្រែកដូនតី ឃុំប្រឡាយមាស ដោយរុះរើរបាំងសាច់អួនចំនួន២ខ្សែ សរុបប្រវែង២០០ម៉ែត្រ នៅចំណុចព្រែកតាភោគ ក្នុងឃុំប្រឡាយមាស ស្រុកកំពង់លែង ដោយរុះរើរបាំងសាច់អួនបានចំនួន៣ខ្សែ មានប្រវែងសរុប៦០០ម៉ែត្រ និងបង្គោលរបាំងចំនួន៤៥៣ដើម ។
លោកបណ្ឌិតណៅ ធួក បានមានប្រសាសន៍ថា ក្រោយពេលដែលប្រមុខរាជរដ្ឋាភិបាល សម្តេចអគ្គមហាសេនាបតីតេជោហ៊ុន សែន នាយករដ្ឋមន្ត្រីនៃព្រះរាជាណាចក្រកម្ពុជា បានសម្រេចព្យួរឡូត៍នេសាទចំនួន៣៥ ផ្អាកការធ្វើអាជីវកម្មនៅក្នុងចក្ខុវិស័យធ្វើឱ្យធនធានជលផលធម្មជាតិមានកំណើនកើនឡើង ប៉ុន្តែមិនមានន័យថា រាជរដ្ឋាភិបាលបណ្តែតបណ្តោយឱ្យកើតមានអនាធិបតេយ្យនៅក្នុងវិស័យនេសាទកើតឡើងតាមទំនើងចិត្តនោះទេ។ ផ្ទុយទៅវិញ សមត្ថកិច្ចរដ្ឋបាលជលផលដែលជាមន្ត្រីនគរបាលយុត្តិធម៌ នៅតែបន្តឃ្លាំមើលតាមដាន និងបើកកិច្ចប្រតិបត្តិការបង្ក្រាបបទល្មើស និងទទួលបានលទ្ធផលប្រមូលបានវត្ថុតាងយកមកបំផ្លាញចោលជាបន្តបន្ទាប់ និងចាប់បានជនល្មើសកសាងសំណុំរឿងបញ្ជូនទៅតុលាការ ដើម្បីចាត់ការទៅតាមនីតិវិធី។
គួររំឭកថា នៅក្នុងដំណើរការកំណែទម្រង់វិស័យជលផល រាជរដ្ឋាភិបាលបានកាត់ដែននេសាទប្រមាណ៥៦ភាគរយ ចេញពីនាទីឡូត៍ប្រគល់ជូនប្រជាពលរដ្ឋ ប្រកបរបរនេសាទជាលក្ខណៈគ្រួសារ និងគ្រប់គ្រងដោយសហគមន៍នេសាទ ៕
ចែករំលែកព័តមាននេះ