ខេត្តសៀមរាប ៖ ទីតាំងកែច្នៃឈើប្រណីតដុះស្លែពីរកន្លែងក្នុងចំណោមទីតាំងសិប្បកម្មកែច្នៃឈើដ៏ច្រើននៅក្នុងក្រុងសៀមរាប បានត្រូវកម្លាំងចម្រុះដឹកនាំដោយតំណាងអយ្យការអមសាលាដំបូងខេត្តឆ្មក់ចូលបង្ក្រាបនិងរឹបអូសបានវត្ថុតាងប្រព្រឹត្តបទល្មើសព្រៃឈើមួយចំនួនដូចជា ម៉ាស៊ីនអារច្រៀកចំនួន២គ្រឿង ឈើប្រណីតនិងឈើលេខ១ ចំនួនជិត៥ម៉ែត្រគូប ព្រមទាំងចាប់ឃាត់ខ្លួនឈ្មួញឈើមួយរូបផង ដែរ ។ ប្រតិបត្តិការចុះបង្ក្រាបនេះ បានធ្វើឡើងកាលពីព្រឹកថ្ងៃទី៦ កុម្ភៈ ឆ្នាំ២០១២ ក្រោមការបញ្ជាពីលោកទី សុវិនថាល់ ព្រះរាជអាជ្ញាអមសាលាដំបូងខេត្ត និងមានការដឹកនាំកម្លាំងផ្ទាល់ដោយព្រះរាជអាជ្ញារងចំនួន៣រូប រួមមានលោកអ៊ុយ សំភារ លោក ស៊ីវ វឌ្ឍនា និងលោកសំរឹទ្ធ សុខុន ហើយកម្លាំងរដ្ឋបាលព្រៃឈើសង្កាត់បាគង និងនគរបាលបង្ក្រាបបទល្មើសសេដ្ឋកិច្ច ជាកម្លាំងសហប្រតិបត្តិការ ។
យោងតាមប្រភពពីមន្ត្រីរដ្ឋបាលព្រៃឈើដែលចុះទៅធ្វើកំណត់ហេតុបង្ក្រាបបានឱ្យដឹងថា ទីតាំងកែច្នៃឈើទាំងពីរកន្លែងដែលត្រូវបានបង្ក្រាបនោះ មួយកន្លែងស្ថិតនៅភូមិតាវៀន សង្កាត់សាលាកំរើក មានម្ចាស់ឈ្មោះង៉ោ ឡុង ភេទប្រុស និងមួយកន្លែងទៀតស្ថិតនៅភូមិខ្នារសង្កាត់ជ្រាវ មានម្ចាស់ឈ្មោះសូរ ខួង ភេទ ប្រុស ។ កន្លែងទាំងពីរនេះបើកដំណើរការរាប់ឆ្នាំមកហើយទើបតែពេលនេះស៊យត្រូវបានបង្ក្រាប។ ទោះជាយ៉ាងណា លោកយឹម ស៊ីវ៉ន់ នាយសង្កាត់រដ្ឋបាលព្រៃឈើបាគងដែលចូលរួមក្នុងការបង្ក្រាបនេះបានថ្លែងថា សិប្បកម្មរបស់ឈ្មោះង៉ោ ឡុង មានច្បាប់ត្រឹមត្រូវចេញដោយលោកនាយខណ្ឌរដ្ឋបាលព្រៃឈើសៀមរាប ត្រឹមតែជាសិប្បកម្មផលិតគ្រឿងសង្ហារិមខ្នាតតូច ប៉ុន្តែម្ចាស់បានអនុវត្តលើសពីលិខិតអនុញ្ញាត ដោយគាត់បានដាក់ម៉ាស៊ីនអារច្រៀកខ្នាតធំ សម្រាប់បម្រើសកម្មភាពអារច្រៀកឈើបន្ថែមទៀត ឯមួយកន្លែងទៀតក៏មានច្បាប់ដែរ ប៉ុន្តែច្បាប់នោះបានផុតសុពលភាពទៅហើយ ទើបថ្ងៃនេះកម្លាំងសមត្ថកិច្ចចុះមកពិនិត្យឃើញមិនប្រក្រតីក៏បង្ក្រាបតែម្តង ។
លោកយឹម ស៊ីវ៉ន់ បានបញ្ជាក់ថា នៅក្នុងប្រតិបត្តិការនេះសមត្ថកិច្ចបានធ្វើការរឹបអូសម៉ាស៊ីនច្រៀកឈើចំនួនពីរគ្រឿង និងឈើប្រណីត និងលេខ១ចំនួនជិត៥មែ៉ត្រគូប ក្នុងនោះសិប្បកម្មរបស់ឈ្មោះង៉ោ ឡុង រឹបអូសបានឈើជាង៣ម៉ែត្រគូប និងម៉ាស៊ីនច្រៀកឈើមួយគ្រឿង ។ ចំណែកសិប្បកម្មរបស់ឈ្មោះសូរ ខួង រឹបអូសបានឈើដែលមានមុខកាត់ធំៗចំនួនជាង១ម៉ែត្រគូប និងម៉ាស៊ីនច្រៀកចំនួនមួយគ្រឿងផងដែរ ។ បច្ចុប្បន្ន វត្ថុតាងទាំងនេះត្រូវបានដឹកយកមករក្សាទុកនៅខណ្ឌរដ្ឋបាលព្រៃឈើសៀមរាប ដើម្បីបន្តចាត់ការតាមនីតិវិធីច្បាប់ស្តីពីព្រៃឈើ ។
ប្រភពព័ត៌មានពីក្រុមអ្នកតាមដានបទល្មើសព្រៃឈើបានឱ្យដឹងថា សិប្បកម្មរបស់ឈ្មោះង៉ោ ឡុង បានបើកដំណើរការរាប់សិបឆ្នាំមកហើយ ដោយមុននេះគេយកលេសថាធ្វើគ្រែឱ្យយោធា តែក្រោយមកគេបានទទួលទិញឈើគ្រប់ប្រភេទពីឈ្មោះស្នា ដែលដឹកចូលតាមរថយន្តធំមួយគ្រឿងពីតំបន់ស្រែណូយ ស្រុកវ៉ារិន ក្រោមរូបភាពដឹកអុស ប៉ុន្តែអុសទាំងនោះមានមុខកាត់ធំៗ រួចហើយអារច្រៀកដោយគ្មានអ្នករំខានឡើយសម្រាប់ចែកចាយនៅតាមទីផ្សារក្នុងខេត្ត ។ ចំពោះការបង្ក្រាបសិប្បកម្មទាំងពីរនេះ ធ្វើឱ្យក្រុមអ្នកតាមដានពីបទល្មើសព្រៃឈើក៏ដូចជាអ្នកស្រឡាញ់ធនធានធម្មជាតិស្វាគមន៍យ៉ាងខ្លាំង ប៉ុន្ដែពួកគេបានអះអាងថា ការបង្ក្រាបតែសិប្បកម្មចំនួនពីរនេះគឺមិនទាន់គ្រប់គ្រាន់នៅឡើយទេ ព្រោះពួកគេឃើញមានទីតាំងសិប្បកម្មរាប់សិបកន្លែងទៀតកំពុងតែដំណើរការយ៉ាងរលូន ។
ទាក់ទិនទៅនឹងករណីនេះលោកយឹម ស៊ីវ៉ន់ បានអះអាងថា នៅទូទាំងក្រុងសៀមរាបមានសិប្បកម្មដែលចេញច្បាប់អនុញ្ញាតដោយខណ្ឌរដ្ឋបាលព្រៃឈើមានចំនួនតែ៨ទីតាំងប៉ុណ្ណោះ ក្រៅពីនោះនៅមានកន្លែងលក់គ្រឿងសង្ហារិមចំនួនជាង៣០ទីតាំងទៀត តែនៅតាមបណ្ដាស្រុកលោកមិនបានដឹងទេ ។ ក្រុមមន្ដ្រីរដ្ឋបាលព្រៃឈើបានបង្ហើបថា ដើម្បីបានច្បាប់ធ្វើសិប្បកម្មពីរដ្ឋបាលព្រៃឈើ ម្ចាស់សិប្បកម្មត្រូវតែមានឯកសារបញ្ជាក់ពីឈើស្របច្បាប់ ដូចជា ឈើចេញពីដីព្រៃសម្បទាន និងឈើដេញថ្លៃពីរដ្ឋ បាលព្រៃឈើជាដើម ហើយករណីដេប៉ូទិញលក់ឈើក៏ដូចគ្នាអុីចឹងដែរ ប៉ុន្ដែនៅក្នុងនីតិវិធីនោះគេសង្ស័យថា ក្រុមឈ្មួញនិងមន្ដ្រីជំនាញរដ្ឋបាលព្រៃឈើអាចមានការឃុបឃិតគ្នា ព្រោះកន្លែងខ្លះបើកដំណើរការអារច្រៀកឈើរាប់ឆ្នាំមកហើយតែឈើមានច្បាប់ទាំងនោះមិនចេះអស់ទាល់តែសោះ ហាក់ដូចជាចេះជប់ ។
ជុំវិញការបង្ក្រាបសិប្បកម្មទាំងពីរខាងលើលោកទី សុវិនថាល់ ដែលបានចេញបញ្ជាឱ្យមានប្រតិបត្ដិការបង្ក្រាបនេះមានប្រសាសន៍ថា «នេះគឺជាការអនុវត្ដច្បាប់ស្ដីពីព្រៃឈើឱ្យមានប្រសិទ្ធភាពខ្ពស់ ដោយយើងចាប់ផ្ដើមត្រឹមការចុះត្រួតពិនិត្យរាល់ទីតាំងកែច្នៃឈើគ្រប់ប្រភេទទាំងអស់នៅទូទាំងខេត្ដ ដើម្បីពិនិត្យទៅលើច្បាប់របស់ពួកគេដែលចេញដោយរដ្ឋបាលព្រៃឈើ» ។
លោកបានបញ្ជាក់ថា ក្នុងករណីយើងរកឃើញថាកន្លែងណាមួយមិនមានច្បាប់ ឬអនុវត្ដលើសពីច្បាប់អនុញ្ញាតដូចជាដាក់ម៉ាស៊ីនខ្នាតធំ អារច្រៀកឈើជាដើម ដូចករណីទីតាំងដែលរកឃើញថ្ងៃនេះ យើងនឹងធ្វើការបង្ក្រាបព្រមទាំងបង្គាប់ឱ្យខាងជំនាញធ្វើការឃាត់ខ្លួនម្ចាស់ចងក្រងសំណុំរឿងបញ្ជូនមកកាន់តុលាការដើម្បីផ្ដន្ទាទោសទៅតាមច្បាប់ស្ដីពីព្រៃឈើកម្ពុជា ។
លោកទី សុវិនថាល់ បន្តថា លោកធ្លាប់បានធ្វើការព្រមានទៅក្រុមអ្នកផ្សងព្រេងដឹកជញ្ជូនឈើទាំងអស់ជាពិសេសឈើគ្រញូងថា ចាប់ពីថ្ងៃនេះតទៅចំពោះករណីដឹកជញ្ជូនបទល្មើសព្រៃឈើជាពិសេសឈើគ្រញូង លោកលែងមានការលើកលែងឬអាណិតអាសូរទៀតហើយ ឱ្យតែចាប់បានឈប់ពិនិត្យអន្ដរកាលទៀតហើយគឺត្រូវតែបញ្ជូនខ្លួនមកកាន់តុលាការដើម្បីរកបក្សពួកពាក់ព័ន្ធ និងអ្នកទទួលសំណូកពីឈ្មួញយកមកផ្ទន្ទាទោសទៅតាមច្បាប់ស្ដីពីព្រៃឈើរបស់ប្រទេសកម្ពុជា ពីព្រោះថាប្រជាពលរដ្ឋព្រំដែនខាងឧត្ដរមានជ័យជាច្រើននាក់ត្រូវបានយោធាសៀមបាញ់ស្លាប់ជាបន្ដបន្ទាប់ដោយសារការស៊ីស្នួលឡើងទៅកាប់ ឬជញ្ជូនឈើគ្រញូង ដូច្នេះត្រូវតែអនុវត្ដច្បាប់ឱ្យបានស្មើភាពមិនថាថ្នាក់ណានោះទេ ៕
ចែករំលែកព័តមាននេះ