រាជធានីភ្នំពេញ ៖ យោងតាមលោក សុខរឿន ព្រះរាជអាជ្ញារងសាលាដំបូងរាជធានីភ្នំពេញ បានចេញដីកាបង្គាប់ទៅសមត្ថកិច្ចដោយតម្រូវឱ្យបង្ខំលោកស្រីមូរ សុខហួរ បង់ប្រាក់សំណងពិន័យ និងជំងឺចិត្ដទៅស្ថាប័នរដ្ឋ (រតនាគាររាជធានីភ្នំពេញ) និងដើមបណ្ដឹងគឺសម្ដេចតេជោនាយករដ្ឋមន្ដ្រី ហ៊ុន សែន តាមរយៈកាត់ប្រាក់ខែសមាជិកសភារបស់លោកស្រី ។ ដីកាឱ្យដំណឹងបានបញ្ជាក់ថា ផ្អាកការអនុវត្ដបញ្ជាឱ្យបង្ខំ និងឱ្យឃុំខ្លួនតាមច្បាប់ជាបណ្ដោះអាសន្ន ទុកឱ្យតុលាការអនុវត្ដ ដោយបង្ខំទារប្រាក់សំណង និងជំងឺចិត្ដជាមុន ។ បង្គាប់មកប្រធានរតនាគាររាជធានីភ្នំពេញ ក្នុងនាមជាម្ចាស់បំណុលនៃការអនុវត្ដលើប្រាក់ពិន័យប្ដឹងទៅសាលាដំបូងរាជធានីភ្នំពេញ ដើម្បីបង្ខំរឹបអូសទ្រព្យសម្បត្ដិរបស់ទណ្ឌិតមូរ សុខហួរ តាមនីតិវិធីនៃច្បាប់ ក្រោយពីរឹបអូសប្រាក់សំណងជំងឺចិត្ដរួច ។
មន្ដ្រីនគរបាលយុត្ដិធម៌ មានភារកិច្ច ប្រគល់ដីកានេះឱ្យទៅទណ្ឌិតឈ្មោះមូរ សុខហួរ ក្នុងករណីសាមីខ្លួន និងក្រុមគ្រួសារមិនព្រមទទួល ត្រូវបិទដីកានេះនៅនឹងលំនៅឋានរបស់សាមីខ្លួន១សន្លឹក, បិទនៅប៉ុស្ដិ៍នគរបាលរដ្ឋបាល១សន្លឹក និងបិទនៅស្នាក់ការ សង្កាត់១សន្លឹក ទុកជាការជូនដំណឹង ហើយធ្វើកំណត់ហេតុស្ដីពីការជូនដំណឹងនេះ រួចបញ្ជូនមកឱ្យអយ្យការអមសាលាដំបូងរាជធានីភ្នំពេញ វិញឱ្យបានឆាប់រហ័ស ។ ដីកានេះមានប្រសិទ្ធភាពអនុវត្ដចាប់ពីពេលចុះ ហត្ថលេខានេះតទៅ គឺថ្ងៃទី១៦ កក្កដា ឆ្នាំ ២០១០ ៕
ចែករំលែកព័តមាននេះ