ខេត្តឧត្តរមានជ័យ ៖ ឈើប្រណីតដូចជាឈើបេង គ្រញូង នាងនួន ដែលសេសសល់នៅតាមជួរភ្នំដងរែក គេបានសង្ស័យថា ក្រុមប៉ូលិសក្នុងកងវរលេខ៩០៥ ប៉ូលិសការពារព្រំដែនគោកកំពុងតែធ្វើសកម្មភាពកាប់ដឹកជញ្ជូនយកទៅលក់ជាបន្តបន្ទាប់ ស្ថិតនៅចំណុចក្បែរៗ ប៉ុស្តិ៍ក្រុមនគរបាលការពារព្រំដែនចុងប្រិច និងប៉ុស្តិ៍តាទុំ ក្នុងភូមិត្រពាំងតាវចាស់ ឃុំត្រពាំងតាវ ស្រុកអន្លង់វែង។
ប្រភពព័ត៌មានច្បាស់ការណ៍ពីកម្លាំងព្រំដែនកម្ពុជា សុំមិនបញ្ចេញឈ្មោះបានឱ្យកោះសន្តិភាពដឹងថា នៅតាមខ្សែបន្ទាត់ព្រំដែនកម្ពុជា-ថៃជួរខ្នងភ្នំដងរែក ឈើប្រណីតដូចជាប្រភេទឈើបេង គ្រញូង នាងនួន ដែលជាឈើកម្រស្ទើរតែដាច់ពូជទៅហើយ ក៏ប៉ុន្តែវានៅសេសសល់បន្តិចបន្តួចពីការកាប់បំផ្លាញកន្លងទៅឥឡូវត្រូវក្រុមប៉ូលិសអង្គភាពវរលេខ៩០៥ ឃុបឃិតជាមួយក្រុមឈ្មួញរកស៊ីក្នុងតំបន់នោះបានជួលប្រជាពលរដ្ឋក្រីក្រ និងកម្លាំងប៉ូលិសមួយចំនួនឱ្យធ្វើសកម្មភាពអារកាត់ពុះច្រៀកជាជ្រុងៗ រួចដឹកជញ្ជូនតាមរថយន្តតូចធំចេញពីក្នុងតំបន់ឃុំត្រពាំងតាវ យ៉ាងគគ្រឹកគក្រេង។
លោកស៊ុំ សារឿន មេបញ្ជាការកងវរលេខ៩០៥ ប៉ូលិសការពារព្រំដែនគោកបានឆ្លើយបំភ្លឺតាមរយៈទូរស័ព្ទដ៏ខ្លីថា ប៉ូលិសពុំមានសកម្មភាពនេះទេ ៕
ចែករំលែកព័តមាននេះ