រថយន្ដដឹកកម្មករក្រទ្បាប់របួសធ្ងន់និងស្រាល៤០នាក់
ដោយ ៖ អប្សរា
ថ្ងៃសៅរ៏ ទី១៣ ខែមិនា ឆ្នាំ២០១០ ម៉ោង ២០:១៩
ខេត្ដកំពង់ស្ពឺ ៖ កម្មករ-កម្មការិនីរោងចក្រកាត់ដេរប្រមាណជាង៤០នាក់ បានទទួលរងគ្រោះ ដោយសារឧប្បត្ដិហេតុក្រឡាប់រថ យន្ដកាលពីព្រឹកថ្ងៃទី១២ មីនា វេលាម៉ោង៦ និង៣០នាទី នៅចំណុចខាងត្បូងផ្សារវត្ដអង្គ ស្ថិតក្នុងភូមិព្រៃផ្ចឹក ឃុំសែនដី ស្រុកសំរោងទង ខណៈដែលអ្នកបើកបររថយន្ដដើរ ប្រមូលកម្មករទាំងនោះតាមទំលាប់ដឹកជញ្ជូនទៅធ្វើការនៅរោងចក្រសាព្រីណា ស្ថិតនៅខាងលិចផ្សារថ្នល់ទទឹង ស្រុកគងពិសី ។រថយន្ដក្រឡាប់នេះម៉ាកទីតាន ឯកម្មករ- កម្មការិនីមានចំនួន៤០នាក់ បានរងរបួសធ្ងន់ និងស្រាលត្រូវបានដឹកជញ្ជូនចូលមន្ទីរពេទ្យ បង្អែកខេត្ដកំពង់ស្ពឺ ដើម្បីព្យាបាល ។
អ្នករងរបួសស្រាលបានរៀបរាប់ប្រាប់ កោះសន្ដិភាពថា ជារៀងរាល់ថ្ងៃ ម្ចាស់រថ យន្ដទីតាន ដែលជាអ្នកនៅភូមិ-ឃុំជាមួយគ្នាតែងតែបើកប្រមូលកម្មករកាត់ដេរយកទៅ កាន់រោងចក្រមិនដែលមានបញ្ហាអ្វីទេ ។ ប៉ុន្ដែលើកនេះ លុះបើកចេញពីភូមិព្រៃផ្ចឹក មកដល់ជិតមុខប៉ុស្ដិ៍ប៉ូលិសសែនដី រថយន្ដក៏ ក្រឡាប់ចាក់មនុស្សចោលតែម្ដង ។
