សាលាឧទ្ធរណ៍សំចេលើកពេលសវនាការបណ្ដឹងរបស់លោកសម រង្ស៊ី លើករណីដកបង្គោលតំរុយព្រំដែន
ដោយ ៖ អប្សរា
ថ្ងៃអង្គារ ទី៦ ខែកក្កដា ឆ្នាំ២០១០ ម៉ោង ១៨:០០
រាជធានីភ្នំពេញ ៖ សាលាឧទ្ធរណ៍កាលពីព្រឹកថ្ងៃទី៦ កក្កដា បានលើកយកសំណុំ រឿងបំផ្លាញបង្គោលតំរុយព្រំដែន ដែលមានជនជាប់ចោទលោកសម រង្ស៊ី លោកព្រំ ជា អាយុ៤១ឆ្នាំ និងអ្នកស្រីមាស ស្រី អាយុ៣៩ ឆ្នាំ មកដំណើរការសវនាការដែលក្នុងនោះ មានលោកជា យៀង អភិបាលស្រុកចន្ទ្រា ខេត្ដស្វាយរៀង ជាដើមបណ្ដឹង។ បន្ទាប់ពីការ សាកសួរដេញដោលអំពីវត្ដមានអ្ន្នកចូលរួម សវនាការសាលាឧទ្ធរណ៍បានសំរេចលើក ពេលជំនុំជំរះដោយសារមិនមានវត្ដមានអ្នក ទោសពីរនាក់នៅពេលសវនាការ គឺឈ្មោះព្រំ ជា និងមាស ស្រី។សាលាឧទ្ធរណ៍បានបើកសវនាការតាម ការគ្រោងទុក ដោយមានប្រធានចៅក្រម ជំនុំជំរះ គឺលោកកឃុន លាងម៉េង ចៅក្រម ប្រឹក្សាចំនួនពីររូប គឺលោកស្រី ចាន់ ម៉ារីណា និងលោក សំរឹទ្ធ សុផល ។ ក្រៅពីនេះ មានវត្ដមានមេធាវីតំណាងរាជរដ្ឋាភិបាលចំនួនពីរនាក់ គឺលោកគី តិច និងលោក ចាន់ សុខ យៀង ។
ព្រឹកនោះមេធាវីរបស់ជនជាប់ចោទចំនួន ពីរនាក់ គឺលោកមេធាវី សំ សុខគង់ តំណាង ជនជាប់ចោទ ព្រំ ជា និងមាស ស្រី បានស្នើ ឱ្យសាលាឧទ្ធរណ៍ពន្យារពេលជំនុំជំរះពីព្រោះ កូនក្ដីរបស់លោកទាំងពីរនាក់មិនទាន់បាន បញ្ជូនមកកាន់សាលាឧទ្ធរណ៍ ដើម្បីចូលរួម សវនាការទេ។ ប៉ុន្ដែមេធាវីតំណាងរដ្ឋាភិបាល គឺលោកចាន់ សុខយៀង បានថ្លែងបន្ទាប់ ពីសវនាការថា វាមិនមានការប៉ះពាល់អ្វីទេ ចំពោះការមិនមានវត្ដមានរបស់អ្នកទោស ពីរនាក់ ខណៈពេលដែលមេធាវីរបស់ពួក គាត់មានវត្ដមាននៅក្នុងពេលសវនាការនេះ។ លោកចាន់ សុខយៀង បន្ដថា មេធាវីជន ជាប់ចោទអាចធ្វើឱ្យខូចខាតផលប្រយោជន៍ របស់កូនក្ដីខ្លួននៅពេលដែលស្នើឱ្យសាលា ឧទ្ធរណ៍ពន្យារពេលសវនាការ ។ លោកចាន់ សុខយៀង ថ្លែងថា មេធាវី ចុងចោទបានថ្លែងផ្ដោតទៅលើរឿងនយោ បាយច្រើនជាងបញ្ហាដែលតុលាការបានផ្ដោត ទៅលើនីតិវិធីច្បាប់ ។ ការពន្យារពេលវាអាច ធ្វើឱ្យជនជាប់ចោទត្រូវឃុំខ្លួនទៀត ។ មេធាវី តំណាងខាងរដ្ឋាភិបាលបានលើកឡើងថា ការ សំរេចពន្យារពេលសវនាការវាជាឆន្ទានុសិទ្ធិ របស់ចៅក្រមជំនុំជំរះក្ដី ។
លោកមេធាវីជួង ជូងឺ មេធាវីតំណាងឱ្យ លោកសម រង្ស៊ី បានថ្លែងថា ការអវត្ដមានជន ជាប់ចោទចំនួនពីរនាក់ ដែលតុលាការមិនបាន បញ្ជូនមកឱ្យចូលរួមសវនាការ វាធ្វើឱ្យប៉ះ ពាល់យ៉ាងខ្លាំងទៅដល់កូនក្ដីរបស់លោក គឺលោកសម រង្ស៊ី ព្រោះជនជាប់ចោទទាំងពីរ នាក់(ព្រំ ជា និងមាស ស្រី ) ជាសាក្សីរស់ ដែលបានដឹងអំពីបញ្ហានេះដោយផ្ទាល់ ហើយ មេធាវីចុងចោទបានដើរចេញពីបន្ទប់សវនា ការនៅពេលដែលមិនមានវត្ដមានអ្នកទោស ទាំងពីរនាក់ ។ នៅវេលាម៉ោង៨និង១៥នាទីព្រឹក មេធាវី សំ សុខគង់ និងមេធាវីជួង ជូងឺ បានប្រកាស ដោយខ្លួនឯងដើរចេញពីបន្ទប់សវនាការនៃ សាលាឧទ្ធរណ៍ បន្ទាប់ពីពួកលោកទាំងពីរនាក់ ស្នើម្ដងហើយម្ដងទៀតសុំឱ្យសាលាឧទ្ធរណ៍ ពន្យារពេលសវនាការនិងផ្លាស់ប្ដូរទីកន្លែងឃុំខ្លួនអ្នកទោសទាំងពីរនាក់ ឱ្យស្ថិតនៅជិត សាលាឧទ្ធរណ៍ ដើម្បីងាយស្រួលក្នុងការដឹក ជញ្ជូនមកកាន់សវនាការ ។
ទោះបីជាមានការស្នើសុំពន្យារពេលពី ក្រុមមេធាវីចុងចោទក្ដី តំណាងអយ្យការ គឺ លោកព្រះរាជអាជ្ញាង៉ែត សារ៉ាត់ នៅតែ ទទូចស្នើសុំដល់ក្រុមចៅក្រមជំនុំជំរះបន្ដនីតិ វិធីដើម្បីជំនុំជំរះដដែល ។ លោកប្រធានចៅ ក្រមជំនុំជំរះឃុន លាងម៉េង បានសំរេច ប្រកាសលើកពេលសវនាការទៅពេល ក្រោយ ទៅតាមការស្នើសុំរបស់មេធាវី ចុងចោទទាំងពីរនាក់ ។ លោកចៅក្រមប្រឹក្សាសំរិទ្ធ សុផល បាន មានប្រសាសន៍ថា សាលាឧទ្ធរណ៍នឹងសហការ ជាមួយក្រសួងមហាផ្ទៃដើម្បីផ្លាស់ប្ដូរទីតាំង ឃុំខ្លួនអ្នកទោសចំនួនពីរនាក់ គឺព្រំ ជា និង មាស ស្រី មកកាន់មន្ទីរឃុំឃាំងព្រៃសវិញ ដើម្បីងាយស្រួលក្នុងការដឹកជញ្ជូនមកធ្វើ សវនាការនៅពេលក្រោយ ប៉ុន្ដែមិនទាន់បាន បញ្ជាក់ថា ធ្វើនៅពេលណានោះទេ ។
បានកត់សំគាល់ឃើញថា បន្ទាប់ពីមេធាវី របស់ចុងចោទទាំងពីរនាក់គឺលោក សំ សុគង់ និងលោកជួង ជូងឺ បានដើរចេញពីបន្ទប់ សវនាការនោះ អ្នកគាំទ្រលោកសម រង្ស៊ី រួមទាំងប្រពន្ធរបស់គាត់ និងលោកស្រីមូរ សុខហួរ ព្រមទាំងក្រុមអ្នកតំណាងរាស្ដ្រដទៃ ទៀតបានប្រមូលផ្ដុំគ្នានៅខាងក្រៅបន្ទប់ សវនាការ ស្ថិតក្នុងបរិវេណនៃក្រសួងយុត្ដិ ធម៌ធ្វើឱ្យមានភាពរំខាននិងច្របូលច្របល់ កើតឡើង ខណៈពេលសវនាការនៅតែបន្ដ មុនពេលប្រកាសពន្យារពេល ។ ការប្រមូល ផ្ដុំគ្នារបស់តំណាងរាស្ដ្រសម រង្ស៊ី និងអ្នក គាំទ្រទាំងនោះត្រូវបានតំណាងអយ្យការ ព្រមានម្ដងរួចមកហើយ នៅក្នុងបន្ទប់សវនាការ ប៉ុន្ដែមិនមានអ្វីគួរឱ្យកត់សំគាល់ធំដុំទេ ចំពោះវត្ដមានដ៏ច្រើនកុះកររបស់ក្រុមជំទាស់ទាំងនេះ ។ នៅខាងក្រៅបន្ទប់សវនាការ មេធាវី រដ្ឋាភិបាលលោកចាន់ សុខយៀង បានមានប្រសាសន៍ថា អ្វីដែលភាគីមេធាវីចុងចោទ បានលើកឡើង មិនត្រឹមត្រូវទាំងស្រុងទេ ដែលអះអាងថា ជនជាប់ចោទពីរនាក់មិនត្រូវ បានបញ្ជូនមកចូលរួមសវនាការធ្វើឱ្យប៉ះពាល់នីតិវិធីតុលាការនោះ ព្រោះនៅឯតុលាការខេត្ដស្វាយរៀង មានការដេញដោលចប់ សព្វគ្រប់ទៅហើយ បើមិនមានវត្ដមានជន ជាប់ចោទ ក៏សាលាឧទ្ធរណ៍អាចដំណើរការបានដែរ ៕
