រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងថា នៅក្នុងជំនួបសម្តែងការគួរសម និងពិភាក្សាការងារជាមួយសម្តេចតេជោនាយករដ្ឋមន្ត្រី ហ៊ុន សែន នាព្រឹកថ្ងៃទី៨ កញ្ញា នៅវិមានសន្តិភាព លោក VAPIROM MANASRANGSI ប្រធានគម្រោងព្រះរាជអំណោយឧបត្ថម្ភដល់កម្ពុជារបស់ព្រះអង្គ ម្ចាស់ក្សត្រី
រាជធានីភ្នំពេញ ៖ លោកអ៊ាង សុផល្លែត ជំនួយការសម្តេចអគ្គមហាសេនាបតីតេជោ ហ៊ុន សែន បានប្រាប់ឱ្យដឹងថា នៅក្នុងជំនួបសម្តែងការគួរសម និងពិភាក្សាការងារជាមួយសម្តេចតេជោនាយករដ្ឋមន្ត្រី ហ៊ុន សែន នាព្រឹកថ្ងៃទី៨ កញ្ញា នៅវិមានសន្តិភាព លោក VAPIROM MANASRANGSI ប្រធានគម្រោងព្រះរាជអំណោយឧបត្ថម្ភដល់កម្ពុជារបស់ព្រះអង្គម្ចាស់ក្សត្រី សុរិនថន បានមានប្រសាសន៍ថា ដំណើរទស្សនកិច្ចរបស់ប្រតិភូនៅពេលនេះគឺ ដើម្បីសុំយោបល់ និងការណែនាំដ៏ខ្ពង់ខ្ពស់អំពីសម្តេចតេជោនាយករដ្ឋមន្ត្រី ព្រោះអនុស្សរណៈដែលបានចុះហត្ថលេខាលើគម្រោងជំនួយទប់ស្កាត់ជំងឺគ្រុនចាញ់ នឹងត្រូវបញ្ចប់នៅខែកញ្ញានេះ។ ដូច្នេះព្រះអង្គម្ចាស់ក្សត្រីគោរពសុំយោបល់ និងការអនុញ្ញាតពីសម្តេចតេជោនាយករដ្ឋមន្ត្រី។
លោក VAPIROM បានជម្រាបសម្តេចតេជោនាយករដ្ឋមន្ត្រីទៀតថា នៅក្នុងខែកញ្ញា នេះ សិស្សកម្ពុជាដែលបានទទួលអាហារូបករណ៍ទៅសិក្សានៅប្រទេសថៃ នឹងត្រូវបញ្ចប់ ហើយបានអនុញ្ញាតឱ្យចូលជួបសម្តែងគារវកិច្ចជាមួយព្រះអង្គម្ចាស់ក្សត្រីសុរិនថន ។ ក្នុងឱកាសនោះលោក VAPIROM បានគោរពសុំការអនុញ្ញាតពីសម្តេចតេជោនាយករដ្ឋមន្ត្រី អញ្ជើញលោករដ្ឋមន្ត្រីក្រសួងអប់រំ ដើម្បីដឹកនាំសិស្សកម្ពុជាដែលត្រូវអនុញ្ញាតឱ្យចូលជួបព្រះអង្គម្ចាស់ក្សត្រីសុរិនថន នៅថ្ងៃទី២២ កញ្ញា ឆ្នាំ២០១១ ខាងមុខ ។
លោក VAPIROM ក៏បានសុំការអនុញ្ញាតពីសម្តេចតេជោនាយករដ្ឋមន្ត្រី គាំទ្រជំរុញឱ្យមានសិស្ស ឬក៏មន្ត្រីសុខាភិបាលកម្ពុជានៅខេត្តរតនគិរី និងមណ្ឌលគិរី បានបញ្ជូនទៅសិក្សានៅប្រទេសថៃ តាមរយៈអាហារូបករណ៍ដែលត្រូវប្រគល់ឱ្យ ដើម្បីធ្វើយា៉ងណាមន្ត្រីទាំងនោះអាចវិលត្រឡប់មកជួយកម្ពុជាវិញបាននៅក្នុងខេត្តទាំង២នេះ ជាពិសេសលើគម្រោងជួយទប់ស្កាត់និងពិនិត្យព្យាបាលជំងឺគ្រុនចាញ់តែម្តង ។
ជាការឆ្លើយតប សម្តេចតេជោនាយករដ្ឋមន្ត្រីបានសម្តែងនូវការគោរពចំពោះម្ចាស់ក្សត្រី សុរិនថន ដែលបានជួយដល់កម្ពុជា ។ សម្តេចមានប្រសាសន៍ថា នេះជាការយកចិត្តទុកដាក់របស់ព្រះអង្គម្ចាស់ក្សត្រី ហើយគម្រោងនេះមិនគប្បីត្រូវបញ្ចប់ទេ ប៉ុន្តែត្រូវពង្រីកវិសាលភាពបន្ថែមទៀត ។ ក្នុងន័យនេះតាមរយៈលោក VAPIROM សម្តេចតេជោនាយករដ្ឋមន្ត្រី ស្នើសុំឱ្យព្រះអង្គម្ចាស់ក្សត្រី សុរិនថន ពិចារណាដើម្បីពង្រីកវិសាលភាពបន្តរយៈពេល៥ឆ្នាំទៀត ជាពិសេសលើវិស័យអប់រំនៅកំពង់ឈើទាល ព្រោះថា គម្រោងនេះនឹងត្រូវបញ្ចប់នៅឆ្នាំ២០១៣ ខាងមុខ ។ សម្តេចបានស្នើសុំឱ្យបន្តគម្រោងនេះទៀត ព្រោះថា គម្រោងនេះសព្វថ្ងៃក្លាយទៅជាមជ្ឈមណ្ឌលស្រាវជ្រាវ និងផ្តល់ការសិក្សាយា៉ងល្អ ហើយក៏ក្លាយទៅជាវិទ្យាល័យគំរូមួយនៅកម្ពុជាផងដែរ ។
ជាការឆ្លើយតបទៅនឹងសំណើសុំលោករដ្ឋមន្ត្រីក្រសួងអប់រំនាំសិស្សកម្ពុជាចូលគារវកិច្ចព្រះអង្គម្ចាស់ក្សត្រីសុរិនថននោះ សម្តេចតេជោនាយករដ្ឋមន្ត្រី បានអនុញ្ញាតឱ្យលោកអ៊ឹម សិទ្ធី ដឹកនាំសិស្សចូលគាល់ ហើយលោកម៉ម ប៊ុនហេង រដ្ឋមន្ត្រីក្រសួងសុខាភិបាល រួមដំណើរជាមួយផង ដើម្បីបានទូលថ្វាយព្រះអង្គម្ចាស់ក្សត្រីពីអ្វីដែលបាននិងកំពុងអនុវត្ត និងជោគជ័យលើវិស័យដែលព្រះអង្គម្ចាស់ក្សត្រីបានយកចិត្តទុកដាក់ ជាពិសេសលើវិស័យសុខាភិបាលព្យាបាលជំងឺគ្រុនចាញ់ ។
ជាទីបញ្ចប់ សម្តេចតេជោនាយករដ្ឋមន្ត្រីបានស្នើសុំឱ្យព្រះអង្គម្ចាស់ក្សត្រីជួយដល់ខេត្តកោះកុង ផងដែរ ជាពិសេសលើវិស័យសុខាភិបាល និងវិស័យអប់រំតែម្តង ៕
ចែករំលែកព័តមាននេះ