រាជធានីភ្នំពេញ​​ ៖ តាមការអញ្ជើញរបស់​លោក​វុក ជេរេមិក រដ្ឋមន្រ្តីការបរទេសនៃសាធា​រណរដ្ឋស៊ែរប៊ី លោកឧបនាយករដ្ឋមន្រ្តី​ហោ ណាំហុង រដ្ឋមន្រ្តីក្រសួងការបរ​ទេសកម្ពុជា នឹង​ដឹកនាំគណៈប្រតិភូទៅចូលរួមកិច្ចប្រជុំផ្លូវការថ្នាក់រដ្ឋមន្រ្តីការបរទេស ដើម្បីប្រារព្ធ​ទិវារំលឹក​ខួបលើកទី៥០ឆ្នាំ​នៃចលនាមិនចូលបក្សសម្ព័ន្ឋ ដែលនឹង​ប្រព្រឹត្ត​ទៅពីថ្ងៃទី៥ ដល់ថ្ងៃទី​៦ កញ្ញា ២០១១ នៅទីក្រុងប៊ែលក្រាដ សាធារណរដ្ឋ​ស៊ែរ​ប៊ី ។

នេះបើយោងតាមសេចក្តីជូនព័ត៌មានរបស់ ក្រសួងការបរទេសដែលចេញផ្សាយជាសាធារណៈនៅថ្ងៃទី២ កញ្ញា ២០១១នេះ​។ សេចក្តីជូន​ព័ត៌​មានដដែលបាន​បញ្ជាក់បន្ថែមថា ក្នុងអំឡុង​ពេល​នៃកិច្ចប្រជុំនេះ លោកឧបនាយករដ្ឋមន្រ្តី ហោ ណាំហុង នឹងធ្វើសេចក្តីថ្លែងការណ៍មួយ​សម្រាប់​​​ពិធីរំលឹក​​​ខួបនេះ​​។ ក្រៅពីចូលរួមក្នុង​កិច្ច​ប្រជុំ​លោក​ប្រមុខការទូតកម្ពុជា ក៏នឹងជួប​ពិភាក្សា​ទ្វេភាគី​ជាមួយរដ្ឋមន្រ្តីការ​បរទេស​នៃ​សាធារណរដ្ឋស៊ែរ ប៊ី លោក​វុក ជេរេមិក ​និង​រដ្ឋ​មន្រ្តី​ការបរទេស​នៃ​បណ្តាប្រទេសមួយចំនួនទៀត ៕