ខេត្តកំពត ៖ ក្មេងស្រីម្នាក់បានអះអាងថា ដោយសារតែភ័យខ្លាចឪពុកចុងចាប់រំលោ.ភ នាងក៏បានរត់ចេញពីផ្ទះកាលពីពាក់កណ្តាលខែឧសភាមក និងមិនហ៊ានត្រឡប់ទៅផ្ទះវិញទេ ។ ក្មេងស្រីដែលរត់ចេញពីផ្ទះនេះឈ្មោះ ឆេង ស្រីល័ក្ខ អាយុ១៤ឆ្នាំ នៅភូមិបាយទា ឃុំស្វាយទងខាងជើង ស្រុកកំពង់ត្រាច
ខេត្តកំពត ៖ ក្មេងស្រីម្នាក់បានអះអាងថា ដោយសារតែភ័យខ្លាចឪពុកចុងចាប់រំលោភ នាងក៏បានរត់ចេញពីផ្ទះកាលពីពាក់កណ្តាលខែឧសភាមក និងមិនហ៊ានត្រឡប់ទៅផ្ទះវិញទេ ។ ក្មេងស្រីដែលរត់ចេញពីផ្ទះនេះឈ្មោះ ឆេង ស្រីល័ក្ខ អាយុ១៤ឆ្នាំ នៅភូមិបាយទា ឃុំស្វាយទងខាងជើង ស្រុកកំពង់ត្រាច ។
តាមប្រជាពលរដ្ឋនៅភូមិកណ្តាលទួល ឃុំកំពង់ត្រាចខាងលិច និយាយថា ក្មេងស្រីនេះបានមករស់នៅជាមួយអ្នកភូមិកណ្តាលទួលជាង១អាទិត្យមកហើយ ដោយនាងបាននិយាយប្រាប់អ្នកភូមិថា រូបនាងមានការភ័យខ្លាចដោយសារឪពុកចុងប៉ុនប៉ងចាប់រំលោភ ប៉ុន្តែចាប់តាំងពីកើតរឿងនោះមកនាងក៏បានចាកចេញពីផ្ទះ ។ អ្នកភូមិកណ្តាលទួល បានប្រាប់ពីប្រភពខាងក្រៅដែលនិយាយថា ឪពុកចុងរបស់ក្មេងស្រីរូបនេះកើតរោគអេដស៍ ហើយម្តាយបង្កើតរបស់នាងក៏កើតរោគអេដស៍ដែរ ។ គ្រួសារក្មេងស្រីនេះមានជីវភាពក្រខ្សត់ មានតែរបរដើរដកព្រលឹត និងបេះស្លឹកល្ងៀងលក់ទិញអង្ករហូបប៉ុណ្ណោះ។ ម្យ៉ាងវិញទៀត គ្រួសារនេះទាំងប្តីទាំងប្រពន្ធញៀនស្រាស្រវឹងជោកទាំងអស់គ្នារាល់ថ្ងៃ គ្មាននរណាជួយនរណាបានទេ។
ផ្ទុយទៅវិញចំពោះការលើកឡើងនេះត្រូវបានម្តាយក្មេងស្រី និងឪពុកចុងក្មេងស្រីបដិសេធ បន្ទាប់ពីក្រុមអ្នកភូមិកណ្តាលទួលចោមរោមសាកសួរ ហើយសមត្ថកិច្ចក៏មិនបានដឹងរឿងនេះដែរ ព្រោះគ្រួសារនេះបានចាកចេញពីភូមិមកចាំដីឱ្យគេនៅជើងភ្នំពោន ស្ថិតក្នុងស្រុកកំពង់ត្រាច។ មកដល់ព្រឹកថ្ងៃទី២២ ឧសភា ក្មេងស្រីដែលភ័យខ្លាចឪពុកចុងចាប់រំលោភនេះមិនទាន់វិលត្រឡប់ទៅផ្ទះវិញទេ គឺស្ថិតនៅក្នុងការគ្រប់គ្រងរបស់អ្នកភូមិកណ្តាលទួលនៅឡើយ ហើយអ្នកភូមិក៏បានអំពាវនាវដល់អង្គការសង្គមនានាសូមជួយស្រោចស្រង់ជីវិតក្មេងស្រីឯកោរូបនេះផង ព្រោះថា បើបណ្តែតបណ្តោយឱ្យធ្លាក់ខ្លួនជាក្មេងស្រីអនាថានោះច្បាស់ជាជួបនឹងវាសនាអាក្រក់ជាក់ជាមិនខានឡើយ ៕
ចែករំលែកព័តមាននេះ