រាជធានីភ្នំពេញ ៖ បុរសជាចុងភៅម្នាក់ បានគាំងបេះដូងស្លាប់ បន្ទាប់ពីនាំស្រីស្នេហ៍មេម៉ាយកូន២ ទៅឡើងឋានសួគ៌ ក្នុងផ្ទះសំណាក់ «ស្រែល្អ» ដែលគេសង្ស័យថា ស្លាប់លើបង្គង ។
ហេតុការណ៍នេះបង្កឱ្យមានការភ្ញាក់ផ្អើលកាលពីវេលាម៉ោង០៨និង៣០នាទីព្រឹកថ្ងៃទី១៨ ខែវិច្ឆិកា ឆ្នាំ២០២៦ នៅចំណុចក្នុងបន្ទប់លេខ២២ ផ្ទះសំណាក់ស្រែល្អ តាមផ្លូវកែវចិន្តា ក្នុងភូមិ៣ សង្កាត់ជ្រោយចង្វារ ខណ្ឌជ្រោយចង្វារ រាជធានីភ្នំពេញ ។
បុរសរូបនោះឈ្មោះ ស.ខ.គ.ឈ ភេទប្រុស អាយុ ៤៥ឆ្នាំ មុខរបរចុងភៅ មានទីលំនៅភូមិខ្សាច់ សង្កាត់អរិយក្សត្រ ក្រុងអរិយក្សត្រ ខេត្តកណ្តាល។ ចំណែកស្រីស្នេហ៍ ឈ្មោះ ខ.ស.ណ អាយុ ៤០ឆ្នាំ ។
តាមព័ត៌មានបានឱ្យដឹងថា នៅព្រឹកថ្ងៃកើតហេតុ គេឃើញបុរសរូបនោះ បាននាំស្រីស្នេហ៍ចូលផ្ទះសំណាក់ខាងលើ និងបានរួមភេទ។ ខណៈនោះ ស្រាប់តែជនរងគ្រោះ មានអាការៈមិនស្រួលខ្លួន ហើយមិត្តស្រី ក៏បានទាក់ទងហៅរថយន្តមកសង្គ្រោះ តែគ្រូពេទ្យប្រាប់ថា ស្លាប់បាត់បង់ជីវិតទៅហើយ រួចម្ចាស់ផ្ទះសំណាក់ ក៏បានរាយការណ៍ទៅសមត្ថកិច្ចមូលដ្ឋាន ដើម្បីទាក់ទងទៅនគរបាលជំនាញចុះត្រួតពិនិត្យ ។
តាមស្ត្រីម្នាក់ ដែលត្រូវជាមិត្តស្រីរបស់បុរសរូបនោះ បានឱ្យសមត្ថកិច្ចដឹងថា ខ្លួនជាស្ត្រីមេម៉ាយកូនពីរ ហើយមានទំនាក់ទំនងស្នេហាជាមួយជនរងគ្រោះ ជាងមួយឆ្នាំមកហើយ និងតែងតែណាត់គ្នាចូលផ្ទះសំណាក់ ដើម្បីរួមភេទ ។
នៅព្រឹកថ្ងៃកើតហេតុ ខ្លួនបានណាត់គ្នាជួបនៅផ្ទះសំណាក់ នៅវេលាម៉ោង៧និង៣០នាទីព្រឹក។ នៅព្រឹកនោះ បន្ទាប់ពីជួបគ្នា បុរសរូបនោះ បានងូតទឹក និងផឹកកាហ្វេមួយកញ្ចប់ រួចរួមភេទ។ លុះក្រោយមក ស្រាប់តែជនរងគ្រោះ មានអាការៈមិនស្រួលខ្លួន ថប់ដើមទ្រូង ពិបាកដកដង្ហើម នាងបានធ្វើចលនា ដើម្បីសង្គ្រោះ និងទាក់ទងទៅបុគ្គលិកផ្ទះសំណាក់ឱ្យទាក់ទងហៅរថយន្តដើម្បីសង្គ្រោះ តែនៅពេលរថយន្តមកដល់ គ្រូពេទ្យបានប្រាប់ថា ស្លាប់បាត់បង់ជីវិតទៅហើយ ។
តាមព័ត៌មានពីកូនស្រីជនរងគ្រោះ បានឱ្យដឹងថា បុរសរងគ្រោះមានជំងឺប្រចាំកាយ លើសឈាមរយៈពេលប្រមាណ១០ឆ្នាំមកហើយ និងតែងតែលេបថ្នាំជាប្រចាំ។ នៅព្រឹកថ្ងៃកើតហេតុ នៅពេលដែលនាងកំពុងធ្វើការ ស្រាប់តែមានគេទូរសព្ទប្រាប់ថា ឪពុកស្លាប់នៅក្នុងផ្ទះសំណាក់ស្រែល្អ។ នៅព្រឹកនោះ នគរបាលជំនាញ និងក្រុមគ្រូពេទ្យបានចុះត្រួតពិនិត្យសព ។
តាមការត្រួតពិនិត្យ លោកវេជ្ជបណ្ឌិត ជាង រ៉េន គ្រូពេទ្យកោសល្យវិច័យអមតុលាការរាជធានីភ្នំពេញ បានសន្និដ្ឋានថា ជនរងគ្រោះស្លាប់ដោយគាំងបេះដូង អាចបណ្ដាលមកពីជំងឺលើសឈាម ៕




ចែករំលែកព័តមាននេះ