ខេត្តបន្ទាយមានជ័យ ៖ ក្មេងស្រីអាយុ១១ឆ្នាំ បានរត់ទៅលាក់ខ្លួនពួនរស់នៅក្នុងព្រៃជាង២០ថ្ងៃ ដោយសារតែភ័យខ្លាចនឹងឪពុកវាយធ្វើបាប ព្រោះកន្លងមកឪពុករបស់នាងធ្លាប់បានកា.ប់ម្តាយរបស់នាងជាច្រើនលើកច្រើនសារួចមកហើយ ដែលរឿងរ៉ាវនេះបានកើតឡើងកាលពីថ្ងៃទី១២ មេសា ២០១១ ស្ថិតក្នុងភូមិជោគជ័យ
ខេត្តបន្ទាយមានជ័យ ៖ ក្មេងស្រីវ័យ១១ឆ្នាំម្នាក់ ត្រូវបានគេប្រទះឃើញនៅក្នុងព្រៃខាងក្រោយភូមិដោយយកថង់ប្លាស្ទីកចងធ្វើជាជម្រក សម្រាប់ការជ្រកកោនដេកពួន ក្រោយពីនាងបានចាកចេញពីផ្ទះបាត់ស្រមោលជាង២០ថ្ងៃ គ្មានដំណឹង ។ ការមកលាក់ខ្លួនក្នុងព្រៃនេះ គឺបានយកត្រកួនធ្វើជាអាហារ និងរស់នៅយ៉ាងសែនវេទនា ទំរាំអ្នកស្រុកដឹងជួយផ្តល់អាហារឱ្យខ្លះ។ ការប្រទះឃើញនេះ ត្រូវបានអាជ្ញាធរភូមិធ្វើអន្តរាគមន៍ហៅប៉ូលិសមកយកនាងចេញពីព្រៃ ខណៈមើលទៅគួរឱ្យអាណិតពន់ពេក កាលពីវេលាម៉ោង៤រសៀល ថ្ងៃទី៨ ឧសភា នៅភូមិជោគជ័យ ឃុំអូរបីជាន់ ស្រុកអូរជ្រៅ ។
ក្មេងស្រីដែលគេប្រទះឃើញរស់នៅក្នុងព្រៃនោះឈ្មោះសុខ រាស រស់នៅជាមួយឪពុកម្តាយក្នុងភូមិកើតហេតុ ។ តាមការឱ្យដឹងពីលោកខាំ យ៉ាន នាយរងប៉ុស្តិ៍នគរបាលរដ្ឋបាលឃុំអូរបីជាន់ បានប្រាប់កោះសន្តិភាពថា ក្មេងស្រីវ័យ១១ឆ្នាំ ខាងលើនេះ មុនពេលដែលលោកទទួលព័ត៌មានពីអាជ្ញាធរភូមិថា បានប្រទះឃើញក្មេងស្រីម្នាក់រស់នៅក្នុងព្រៃ ក៏នាំគ្នាទៅយកមកសួរនាំ និងធ្វើកំណត់ហេតុ ទើបដឹងថា នាងបានចេញពីផ្ទះជាង២០ថ្ងៃហើយ គិតតាំងពីថ្ងៃទី១២ មេសា រកឃើញវិញ នៅល្ងាចថ្ងៃទី៨ ឧសភា ។ លោកខាំ យ៉ាន បន្តថា ទីតាំងដែលក្មេងស្រីទៅពួនជ្រកនោះ មើលទៅគួរឱ្យវេទនាខ្លាំងណាស់ ខណៈពួកគេសហការគ្នាជាមួយអាជ្ញាធរភូមិទៅយកនាងទាំងភ្លៀង ឃើញនាងជ្រកក្រោមដំបូលដែលមានថង់ប្លាស្ទីកអង្គុយញ័រចំប្រប់ដូចកូនសត្វលង់ទឹក ។ រូបរាងកាយរបស់នាងស្គមស្គាំង ហើយកន្លែងជ្រកលាក់ខ្លួននោះទៀតសោត ឃើញមានត្រកួនមួយបាច់ និងអំបិលបុកម្ទេសនៅទីនោះគ្មានមុងភួយទេ ។ នាងប្រាប់ថា នាងយកត្រកួននោះឯងធ្វើជាអាហារប្រចាំថ្ងៃ ។
ប៉ូលិសប្រាប់ថា ក្រោយការយកនាងពីទីតាំងដ៏កំសត់ក្នុងព្រៃនោះ លោកសួរនាំពីការទៅរស់នៅក្នុងព្រៃត្រូវនាងប្រាប់ថា ខ្លាចការគំរាមវាយធ្វើបាបពីឪពុក ទើបមិនហ៊ានចូលផ្ទះ។ នាងបានរៀបរាប់ថា រឿងខ្លាចឪពុកនោះដោយសារតែប្រើនាងឱ្យទៅបេះម្រេះព្រៅផ្ទះគេ យកមកបង់សម្ល ពេលនាងរកបេះមិនបានក៏មិនហ៊ានចូលផ្ទះ ខណៈឪពុកនោះគំរាមរកវាយធ្វើបាប ។ នាងតូចនោះបានប្រាប់ប៉ូលិសថា ឪពុកនាងកាចណាស់ តែងតែវាយធ្វើបាបជាប្រចាំ ។ លោកនាយរងប៉ុស្តិ៍ក៏បានប្រាប់ផងដែរថា ក្រោយការសួរនាំពីនាងតូចនោះ រួចប៉ូលិសក៏បានអញ្ជើញឪពុកម្តាយរបស់នាង គឺ បុរសជាឪពុកឈ្មោះ សុខ សារ៉ាត់ អាយុ៥០ឆ្នាំ និងស្ត្រីជាម្តាយឈ្មោះលឿន ពៅ អាយុ៥០ឆ្នាំ មកកាន់ប៉ុស្តិ៍នគរបាលរដ្ឋបាលឃុំអូរបីជាន់ ដើម្បីសួរនាំផងដែរ ហើយត្រូវគ្រួសារប្តីប្រពន្ធនោះប្រាប់ថា កូនរបស់គាត់នេះពិបាកអប់រំ ហើយបុរសជាឪពុកប្រាប់ថា មុនថ្ងៃបាត់ខ្លួននោះ គាត់បានឱ្យលុយទៅទិញបារី ប៉ុន្តែមិនឃើញទាំងបារី បាត់ទាំងមនុស្សតែម្តង ។
ទោះបីជាបែបណា ជុំវិញគ្រួសារខាងលើនេះ លោកសួង មឿន មេឃុំអូរបីជាន់បានប្រាប់តាមទូរស័ព្ទថា ក្មេងស្រីតូចនេះឪពុកម្តាយរបស់នាងបានប្រគល់ឱ្យអាជ្ញាធរ និងសមត្ថកិច្ចដោយមិនយកទៅផ្ទះវិញទេ ។ លោកមេឃុំឱ្យដឹងថា ក្មេងស្រីដ៏កំសត់នេះលោកបានប្រគល់ទៅឱ្យអង្គការមួយ គឺអង្គការកម្ពុជា ដើម្បីជួយស្ត្រីមានវិបត្តិហៅកាត់ថា CWCC នៅក្នុងខេត្តបន្ទាយមានជ័យ ។ លោកសួង មឿន បានប្រាប់បន្តថា យោងតាមការសួរនាំពីអ្នកស្រុកគ្រួសារខាងលើ គឺមានជីវភាពក្រីក្រណាស់ ពេលព្រឹកម្តាយឪពុកចេញពីផ្ទះដើរស៊ីឈ្នួលគេ ឯកូននៅផ្ទះរញង់ខ្វះការគ្រប់គ្រង ។ លោកមេឃុំបន្តថា ក្មេងស្រីនោះក្រោយពីឪពុកម្តាយរបស់នាងប្រគល់ឱ្យ ដោយធ្វើលិខិតប្រគល់ត្រឹមត្រូវ លោកក៏បានទាក់ទងទៅអង្គការខាងលើ ដើម្បីយកនាងទៅអប់រំ និងបណ្តុះបណ្តាល ។
រឿងក្មេងស្រីដ៏កំសត់នេះលោកពិន ភារម្យ មន្ត្រីអង្គការកម្ពុជាជួយស្ត្រីមានវិបត្តិហៅកាត់ថា CWCC បានប្រាប់តាមទូរស័ព្ទនៅព្រឹកថ្ងៃទី១៥ ឧសភា ថា ខាងអង្គការរបស់លោកបានយកទៅដាក់នៅមណ្ឌល ដើម្បីបណ្តុះបណ្តាលវិជ្ជាជីវៈនៅឯខេត្តបន្ទាយមានជ័យហើយ ។ មន្ត្រីរូបនេះបន្តថា ក្មេងស្រីខាងលើមានអាការស្គមស្គាំង ហើយនៅលើដងខ្លួនមានស្នាមជាំ និងដំបៅ ព្រមទាំងមានកមរមាស់ស្ទើរសព្វសាច់ ។ ពេលធ្វើការសួរនាំទៅនាងប្រាប់ថា ជាស្នាដៃ ឪពុកម្តាយវាយធ្វើបាប។ មន្ត្រីខាងលើបន្តទៀតថា ដំបូងពេលយកមកដល់មណ្ឌលនាងហាក់មានការភ័យខ្លាច សូម្បីតែគ្នាឯងក្នុងមណ្ឌលក៏ខ្លាចគេដែរ ទំនងជាបាក់ស្បាត ឬមានបញ្ហាខាងសរសៃប្រសាទទៀតផង។
គ្រួសារក្មេងស្រីខាងលើ ទាំងមន្ត្រីប៉ូលិសក៏ដូចជាលោកមេឃុំបានប្រាប់ថា បុរសជាឪពុកធ្លាប់ជាប់គុក២ឆ្នាំ ព្រោះតែរឿងប្រើអំពើហិង្សាកាប់ប្រពន្ធ ហើយទើបចេញពីគុកក្មេងស្រីជាកូនក៏បានរត់បាត់ពីផ្ទះទៅពួនសម្ងំក្នុងព្រៃចម្ងាយប្រហែលជាង១០០ម៉ែត្រ ខាងក្រោយភូមិ ។ យោងតាមការសាកសួរពីប៉ូលិសនាងប្រាប់ថា ការស់នៅក្នុងព្រៃរហូតជាង២០ថ្ងៃ អាចរស់បានមិនអាស្រ័យលើតែអាហារត្រកួតនោះទេ ក៏មានអ្នកស្រុកខ្លះលួចយកបាយឱ្យហូបផងដែរ ព្រោះតែអាណិតនាង ។ ក្នុងគ្រួសារក្មេងស្រីនេះមានកូនប្រុសស្រីរហូតដល់ទៅ៩នាក់ ហើយនាងជាកូនទី៧ នាងនិយាយថា ឪពុកនាងកាចណាស់ នាងខ្លាចដូចខ្លាចខ្លា៕
ចែករំលែកព័តមាននេះ