រាជធានីភ្នំពេញ ៖ អាជ្ញាធរសង្កាត់ចោមចៅ បានចុះធ្វើសកម្មភាពកាយប្រឡាយរំដោះទឹកដែលបានជន់លិចទីធ្លាអនុវិទ្យាល័យ និងសាលាបឋមសិក្សាគោកបញ្ជាន់ បន្ទាប់ពីលោកនាយកសាលាគ្មានលទ្ធភាពដោះស្រាយការលិចនេះ ហើយបានរត់ទៅសុំឱ្យអាជ្ញាធរជួយអន្តរាគមន៍ ។ សកម្មភាពកាយប្រឡាយនោះបានធ្វើឡើងកាលពីព្រឹក ថ្ងៃទី៩ កញ្ញា ឆ្នាំ២០១០ ហើយសាលាខាងលើនោះមានទីតាំងស្ថិតនៅក្នុងភូមិថ្មគោល សង្កាត់ចោមចៅ ខណ្ឌដង្កោ។
តាមប្រភពព័ត៌មានបានឱ្យដឹងថា នៅពេលមានភ្លៀងធ្លាក់ម្តងៗ តែងតែធ្វើឱ្យមានការលិចលង់ទីធ្លាសាលាជាបន្តបន្ទាប់ ហើយការលិចលង់នេះ គឺកើតមានជារៀងរាល់ឆ្នាំ ទឹកដែលជន់លិចនោះមិនងាយនឹងស្រកទៅវិញទេ ព្រោះគ្មានកន្លែងហូរចេញ ។ ប្រភពដដែលបានបនុ្តថា នៅពេលថ្មីៗនេះមានភ្លៀងធ្លាក់ខ្លាំងជាប់ៗគ្នា បានធ្វើឱ្យទីធ្លាសាលាទាំងមូលត្រូវទឹកជន់លិច ពេលនោះលោកនាយកសាលាខាងលើគ្មានលទ្ធភាពដោះស្រាយទឹកចេញទេ ហើយបានរត់រកជំនួយពីខាងក្រៅយ៉ាងខ្វែងដៃខ្វែងជើងបំផុត ។
មិនតែប៉ុណ្ណោះបានរត់ទៅសាលាសង្កាត់ចោមចៅ សុំជំនួយអន្តរាគមន៍ពីអាជ្ញាធរ ធ្វើឱ្យអាជ្ញាធរហួសចិត្ត ប៉ុន្តែទោះបីជាបែបណាលោកសុទ្ធ សាធ ចៅសង្កាត់ចោមចៅបានប្រើមន្ត្រីក្រោមឱវាទចុះទៅពិនិត្យមើលជាក់ស្តែង បន្ទាប់មកក៏បានជួលគ្រឿងចក្រកាយរំដោះទឹកនោះចេញភ្លាមៗដែរ ។
ប្រជាពលរដ្ឋនិយាយថា ជិតដល់ពេលដែលសិស្សត្រូវចូលរៀនវិញហើយ បើសិនមិនកាយបង្ហូរទឹកចេញទេ ច្បាស់ជាសិស្សមិនអាចរៀនបានឡើយ ។ អ្វីដែលគួរឱ្យចាប់អារម្មណ៍នោះគ្រាន់តែទឹកជន់លិចប៉ុណ្ណឹង លោកនាយកសាលាគ្មានសមត្ថភាពដោះស្រាយ ចាំបាច់រត់រកជំនួយគ្រប់ច្រកល្ហកបែបនេះ ។ រឿងលិចលង់ប៉ុណ្ណឹងគួរតែចេះដោះស្រាយដោយខ្លួនឯងឱ្យអស់ពីសមត្ថភាពសិន បើទៅមិនរួចចាំរត់រកឱ្យគេជួយក៏មិនហួសពេលដែរ ៕
ចែករំលែកព័តមាននេះ