មតិរិះគន់ការចាប់ក្មេងលក់កាសែតតាមភ្លើងស្តុបថា បើមិនបានឱ្យអ្វីទេ មិនគួរបំបែកឆ្នាំងបាយគ្នាឡើយ
ដោយ ៖ អប្សរា
ថ្ងៃចន្ទ ទី២ ខែសីហា ឆ្នាំ២០១០ ម៉ោង ០៨:៥៥
ក្មេងអនាថា ក្មេងកំព្រា និងក្មេងរស់នៅក្នុង ត្រកូលក្រីក្រទុគត៌តោកយ៉ាកទាំងឡាយ ក្នុងរាជធានីភ្នំពេញកន្លងមកមានមុខរបរ ខ្លះដើរលួចឆក់ ព្រោះតែក្រីក្ររកអង្ករច្រកឆ្នាំងគ្មាន ខ្លះដើរសុំទានយ៉ាងអនាធិបតេយ្យ ទោះបីជាបែបណាធ្វើអ្វីៗ គ្រប់បែបយ៉ាងដើម្បីរស់នៅ ដោយខ្លួនឯង តែពិតណាស់ថា បានធ្វើឱ្យសង្គមអាប់អោន ។ ប៉ុន្ដែប្រមាណមួយឆ្នាំកន្លងមកនេះ ដោយសារការរិតបន្ដឹងផ្នែកសន្ដិសុខ និងការអប់រំ ជាទូទៅ ធ្វើឱ្យក្មេងអនាថា ក្មេងកំព្រា ឬទុគត៌ ខាងលើនេះ មួយភាគធំស្វែងរកបានមុខរបរសមរម្យ និងថ្លែថ្នូរឡើងវិញ ក្នុងរាជធានីដ៏តូចចង្អៀតនេះ គឺលក់កាសែត លក់ផ្កាតាមភ្លើងស្ដុប និងតាមតំបន់កកស្ទះចរាចរណ៍នានាក្នុងរាជធានីភ្នំពេញ ។
មុខរបរតូចតាចនេះធ្វើឱ្យក្មេងៗ ក្រីក្រកំព្រាអនាថាដ៏កំសត់របស់ខ្មែរយើងបាន រួចផុតពីរណ្ដៅភក់ជ្រាំ ពីភាពទុក្ខវេទនា ពីភាពក្រីក្ររហេមរហាមមកមានជីវភាពធូរធា មានបាយហូបគ្រប់គ្រាន់ និងថ្លៃថ្នូរឡើងវិញ គួរឱ្យពេញចិត្ដណាស់ ។ សូម្បីអ្នកធ្វើដំណើរតាមដង ផ្លូវក៏ពេញចិត្ដចំពោះមុខរបររបស់ក្មេងៗទាំងនោះដែរ រហូតដល់អ្នកខ្លះ ដែលទិញកាសែត ឬទិញផ្កា តែងតែឱ្យប្រាក់ថែមក៏មានដែរ ដូចជួយរួមចំណែកលើកទឹកចិត្ដក្មេងៗនេះដែល ចេះប្រកបរបរសុចរិត ដោយសារបានឃើញពួកគេចេះប្រកបមុខរបរដោយខ្លួនឯង ។ ដែលផ្ទុយពីឆ្នាំមុនៗ ជួបតែអ្នកសុំទាននៅហូរហែ តាមភ្លើងស្ដុប ដំបៅទ្រូងខ្លាំងណាស់ ។
ប៉ុន្ដែគួរឱ្យសោកស្ដាយ និងស្អប់ខ្ពើមក្រៃលែង ដែលមួយសបា្ដហ៍កន្លងមកនេះ គេឃើញប៉ូលិសដើរដេញក្មេងៗ ដែលដើរលក់កាសែត តាមផ្លូវ តាមភ្លើងស្ដុប ដូចគេដេញចោរ ។ នោះគឺប៉ូលិសមិនដឹងទទួលផែនការពីណាទេ ដើរ ដេញឈប់ឱ្យមានការលក់បែបនេះតទៅទៀត ។ សកម្មភាពនេះធ្វើឱ្យក្មេងៗអនាថា ទាំងឡាយនោះ ខ្លះអង្គុយអោបកាសែត អោបផ្កាអង្គុយយំ លែងដើរទៅណារួចដូចអស់សង្ឃឹមក្នុងជីវិត ដែលពួកគេទើបតែឃើញពន្លឺថ្មីៗសោះ ។ មហាជនដែលធ្វើដំណើរតាមផ្លូវ ក៏ពួកគេស្រែកថ្កោលទោសនូវចំណាត់ការដ៏អាក្រក់ទាំងនោះដែរ ។ អ្នកខ្លះនិយាយថា បើមិនបានជួយអ្វីពួកគេនោះ គួរតែឱ្យគ្នាមានឆ្នាំងចំអិនបាយផង ។
នៅទីក្រុងសាំងហ្គាពួរ ដែលជាទីក្រុងឋានសួគ៌ នៅទីក្រុងព្រៃនគរ ឬទីក្រុងបាងកក ក៏ដូចជាទីក្រុងកូឡាឡាំពួរ ដែលជាទីក្រុងទំនើបរីកចំរើនខ្លាំង ក៏គេមានអ្នកដើរលក់ ដើរចែកចាយប័ណ្ណផ្សាយពាណិជ្ជតាមភ្លើងស្ដុបដែរ ។ ចុះប្លែក អ្វីរាជធានីភ្នំពេញ ដែលកំពុងវិវត្ដន៍ទៅរកភាពទំនើបដែរនោះ ម៉េចក៏ប្រញាប់ប្លែកពីគេម្ល៉េះ ។ អាជ្ញាធរតាមតំបន់ដែលធ្វើបែបនេះ មិនខុសពីដើរចាប់ឆ្នាំងបាយរបស់ក្មេងៗអនាថា កំព្រាក្រីក្របោកចោលឡើយ ហើយក៏មិនខុសពី ដេញក្មេងៗដ៏ក្រីក្រទាំងនោះឱ្យទៅកាន់កន្លែងដើមវិញដែរ ៕ (អា ឡេវ)
