មន្ដ្រីទូតឈីលីដែលមាននិវេសនដ្ឋាននៅក្រុងបាងកកមកដល់កម្ពុជា
ដោយ ៖ អប្សរា
ថ្ងៃពុធ ទី៧ ខែកក្កដា ឆ្នាំ២០១០ ម៉ោង ១៦:០៤
រាជធានីភ្នំពេញ ៖ ក្នុងជំនួបសំដែងការគួរសម និងពិភាក្សាការងារជាមួយលោកអ៊ុច បូររិទ្ធ រដ្ឋលេខាធិការក្រសួងការបរទេស និងសហប្រតិបត្ដិការអន្ដរជាតិនារសៀលថ្ងៃទី៦ កក្កដា ឆ្នាំ២០១០ នៅទីស្ដីការក្រសួង លោក Alberto Yoacham ឯកអគ្គរដ្ឋទូតថ្មីនៃ ប្រទេសឈីលីប្រចាំកម្ពុជា ដែលមាននិវេសន ដ្ឋាននៅទីក្រុងបាងកក ប្រទេសថៃ បានសំដែងនូវសេចក្ដីរីករាយដែលអនុញ្ញាតឱ្យលោកចូលជួបក្នុងខណៈដែលលោកត្រូវតែងតាំងជាឯកអគ្គរដ្ឋទូតថ្មីប្រចាំកម្ពុជា ដើម្បីពង្រឹងនិងពង្រីកកិច្ចសហប្រតិបត្ដិការរវាង ប្រទេសទាំងពីរឈីលី-កម្ពុជា ។
លោកអ៊ុច បូររិទ្ធ បានស្វាគមន៍យ៉ាងកក់ ក្ដៅចំពោះបេសកកម្មការទូតនៅកម្ពុជា និងបានចាត់ទុកថា បេសកកម្មរបស់លោកនឹង ពង្រឹងពង្រីកកិច្ចសហប្រតិបត្ដិការរវាងប្រទេសទាំងពីរឱ្យរឹតតែល្អប្រសើរថែមទៀត។ ទន្ទឹមនេះ លោករដ្ឋលេខាធិការក៏ បានជំរាបលោកឯកអគ្គរដ្ឋទូតឈីលី អំពីការ វិវឌ្ឍលើគ្រប់វិស័យរបស់កម្ពុជា។ក្នុងកិច្ចពិភាក្សានោះ ភាគីទាំងពីរកម្ពុជា- ឈីលី បានឯកភាពគ្នាក្នុងការគាំទ្រទៅវិញ ទៅមកជាសមាជិកមិនអចិន្ដ្រៃយ៍នៃក្រុម ប្រឹក្សាសន្ដិសុខអង្គការសហប្រជាជាតិ ។ លោកឯកអគ្គរដ្ឋទូតថ្មីរូបនេះ ក៏បានស្នើឱ្យកម្ពុជាគាំទ្រចំពោះបេក្ខភាពរបស់ឈីលីនៅ ក្នុងក្រុមប្រឹក្សាសិទ្ធិមនុស្សសំរាប់ឆ្នាំ២០១១ -២០១៤ ។
សំណូមពរនេះ លោករដ្ឋលេខាធិការបានទទួលយក ហើយនិងធ្វើការសិក្សា ដើម្បីផ្ដល់ចំលើយនៅពេលក្រោយ ។ លោក រដ្ឋលេខាធិការក៏បានពិភាក្សាផងដែរ អំពីការ ខិតខំពង្រឹងពង្រីកកិច្ចសហប្រតិបត្ដិការគ្រប់ផ្នែកទាំងនយោបាយ សេដ្ឋកិច្ច និងពាណិជ្ជកម្ម ។លោកឯកអគ្គរដ្ឋទូតថ្មីប្រទេសឈីលី បានប្រាប់ឱ្យដឹងថា ឈីលីជាប្រទេសដែលនាំ ចេញនូវផ្លែឈើ ម្ហូបអាហារ ជាច្រើនទៅលក់ នៅលើពិភពលោក ។ លោកនឹងជំរុញឱ្យមាន ពាណិជ្ជករឈីលី មកធ្វើទស្សនកិច្ចនៅកម្ពុជា ដើម្បីធ្វើការផ្លាស់ប្ដូរបទពិសោធន៍ ក៏ដូចជា ស្វែងរកនូវការនាំចេញនាំចូលនូវផលិតផលទំនិញនៃប្រទេសទាំងពីរ ក្នុងនោះប្រទេសឈី លីក៏ជាប្រទេសផលិតស្រូវអង្ករដែរ ក៏ប៉ុន្ដែ នៅមានការខ្វះខាត ។
លោកក៏បានឱ្យដឹងដែរ ថា ប្រទេសវៀតណាមបាននាំអង្ករទៅលក់ នៅប្រទេសឈីលី ឯកម្ពុជាការផលិតស្រូវ អង្ករបានទទួលលទ្ធផលល្អច្រើន ហើយនៅឆ្នាំ២០១០-២០១១តាមការប៉ាន់ ប្រមាណផលិតផលនឹងកើនដល់៣,៣លានតោន ។ លោកឯកអគ្គរដ្ឋទូតថ្មីសង្ឃឹមថា កម្ពុជាអាចនាំអង្ករចូលទៅប្រទេសឈីលី ដើម្បីលក់អង្ករកម្ពុជានៅទីនោះ ហើយ ពាណិជ្ជករប្រទេសឈីលីនឹងអាចពិភាក្សាគ្នាបន្ដនៅលើកិច្ចការផ្សេងៗទៀត ៕
