ខេត្តកំពង់ស្ពឺ ៖ សត្វព្រៃចំនួន៧១ក្បាលត្រូវបានបង្ក្រាបខណៈឈ្មួញដឹកជញ្ជូនតាមរថយន្ត១គ្រឿងបម្រុងយកទៅលក់ និងចែកចាយបន្តនៅក្រុងភ្នំពេញ ព្រមទាំងឃាត់ខ្លួនមនុស្ស២នាក់ផងដែរ ។…
ខេត្តកំពង់ស្ពឺ ៖ សត្វព្រៃចំនួន៧១ក្បាលត្រូវបានបង្ក្រាបខណៈឈ្មួញដឹកជញ្ជូនតាមរថយន្ត១គ្រឿងបម្រុងយកទៅលក់ និងចែកចាយបន្តនៅក្រុងភ្នំពេញ ព្រមទាំងឃាត់ខ្លួនមនុស្ស២នាក់ផងដែរ ។ ការបង្ក្រាបការដឹកជញ្ជូនសត្វព្រៃនេះធ្វើឡើងកាលពីវេលាម៉ោង១ និង១០នាទីរសៀល ថ្ងៃទី២ ធ្នូ ២០១៥
នៅចន្លោះគីឡូម៉ែត្រលេខ៨២-៨៣ តាមបណ្តោយផ្លូវជាតិលេខ៤ ស្ថិតក្នុងភូមិទី១(ដីឣំបិល) ឃុំត្រែងត្រយឹង ស្រុកភ្នំស្រួច ខេត្តកំពង់ស្ពឺ ។
ប្រភពពីមន្ត្រីកងរាជអាវុធហត្ថស្រុកភ្នំស្រួចដែលចុះប្រតិបត្តិការបង្ក្រាបនេះបានឲ្យដឹងថា មនុស្ស២នាក់ដែលត្រូវសមត្ថកិច្ចឃាត់ខ្លួន ម្នាក់ឈ្មោះ សួន ភារម្យ ភេទប្រុស អាយុ៣២ឆ្នាំ រស់នៅភូមិ១ ឃុំដងទុង ស្រុកស្មាច់មានជ័យ ខេត្តកោះកុង និងម្នាក់ទៀតឈ្មោះ ឈឹន សុភក្តិ ភេទប្រុស អាយុ៣១ឆ្នាំ រស់នៅភូមិជីខរ ឃុំជីខរ ស្រុកស្រែឣំបិលខេត្ត កោះកុង ព្រមទាំងដកហូតបានសត្វព្រៃចំនួន៧១ក្បាល មានដូចជា ជុំពោចចំនួន៦៤ក្បាល, អណ្ដើក៣ក្បាល និង ពស់ចាន់ល្មមចំនូន៤ក្បាល និងមធ្យោបាយដឹកជញ្ជូនរថយន្ត១គ្រឿង ម៉ាកកាមរី បាឡែន ពណ៌ស ពាក់ស្លាកលេខ ភ្នំពេញ 2AE-6101 ។
បច្ចុប្បន្ន ទាំងមនុស្ស រថយន្ត និងសត្វព្រៃជាវត្ថុតាង ត្រូវនាំយកទៅរក្សាទុក និងឃុំខ្លួនបណ្ដោះអាសន្ន នៅទីបញ្ជាការកងរាជអាវុធហត្ថខេត្តកំពង់ស្ពឺ ដើម្បីកសាងសំណុំរឿងចាត់ការតាមនិតិវិធីច្បាប់ ៕
ចែករំលែកព័តមាននេះ