ប្រទេសមីយ៉ាន់ម៉ា ៖ ធនាគារអភិវឌ្ឍន៍អាស៊ី (ADB) នឹងផ្តល់នូវឥណទាន៨០លានដុល្លារដើម្បីធ្វើឱ្យប្រសើរឡើងនូវបណ្តាញប្រើប្រាស់ក្នុងការផ្ទេរថាមពលនៅទូទាំងក្រុងរ៉ង់ហ្គូន ។
គម្រោងនេះពាក់ព័ន្ធនឹងការធ្វើឲ្យប្រសើរឡើងនូវការផ្ទេរបណ្តាញនៅ Thida-Thaketa-Kyaikkasan ចាប់ពី៦៦គីឡូវ៉ុល មក២៣០គីឡូវ៉ុល និងការសាងសង់ស្ថានីយថ្មីចំនួនពីរកន្លែងទៀតនៅ South Okkalapa និង West University នេះបានតាមការប្រកាសឱ្យដឹងរបស់ ADB ។
ADB បន្ថែមថា សហគ្រាសថាមពលអគ្គិសនីមីយ៉ាន់ម៉ា នឹងអនុវត្តនូវការធ្វើឲ្យប្រសើរឡើងបន្ថែមទៀតសម្រាប់គម្រោងនេះ ។
សេដ្ឋវិទូថាមពលជាន់ខ្ពស់របស់ ADB ប្រចាំតំបន់អាស៊ីអាគ្នេយ៍ លោកស្រី Bui Duy Thanh មានប្រសាសន៍ថា ៖ «អាយុកាល និងបន្ទុកដ៏ធ្ងន់ធ្ងរនៃការផ្ទេរបណ្តាញ គឺតម្រូវឲ្យមានការធ្វើឲ្យប្រសើរឡើងជាបន្ទាន់ដើម្បីផ្តល់នូវស្ថិរភាព និងភាពទូលំទូលាយក្នុងការផ្គត់ផ្គង់ថាមពល» ។
ក្រុងរ៉ង់ហ្គូនបានដើរតួនាទីស្នូលជាមជ្ឈមណ្ឌលសេដ្ឋកិច្ចមួយសម្រាប់ប្រទេសមីយ៉ាន់ម៉ា ហើយជំនួយនេះនឹងជួយដល់រដ្ឋាភិបាល ក្នុងការធានានូវការផ្គត់ផ្គង់ថាមពលដែលអាចជឿទុកចិត្តបានសម្រាប់ទីក្រុងទាំងមូល និងតំបន់នៅជុំវិញ ។
លោកស្រីបន្តថា ៖ «នៅទសវត្សរ៍ចុង ក្រោយនេះ គេរំពឹងថា សេដ្ឋកិច្ចមីយ៉ាន់ម៉ានឹងកើនឡើងជាមធ្យម៧,៨% ក្នុងមួយឆ្នាំ ដើម្បីសម្រេចបាននូវកំណើនតម្រូវការថាមពល ដែលទំនងជាច្រើនជាង៩% ក្នុងមួយឆ្នាំ រហូតដល់ឆ្នាំ២០៣០ ។ រដ្ឋាភិបាលចាំបាច់ត្រូវអភិវឌ្ឍន៍ នូវប្រភពដែលបង្កើតថ្មី និងពង្រឹងបណ្តាញដែលមានស្រាប់» ។
រដ្ឋាភិបាលមីយ៉ាន់ម៉ាកំពុងតែដាក់ទិសដៅធ្វើអគ្គិសនីកម្មឲ្យបាន១០០% នៅឆ្នាំ២០៣០ ហើយ ADB កំពុងតែជួយគាំទ្រទិសដៅនេះ តាមរយៈគម្រោងហេដ្ឋារចនាសម្ព័ន្ធ និងគ្រឿងធ្វើនិយ័តកម្ម ។
រដ្ឋាភិបាលនឹងផ្តល់នូវទឹកប្រាក់៣,៣លានដុល្លារដើម្បីគ្របដណ្តប់លើការចំណាយផ្នែករដ្ឋបាល បរិស្ថាន វិធានការសុវត្ថិភាពសង្គម ការកសាងផ្លូវ និងកន្លែងស្នាក់នៅរបស់កម្មករសម្រាប់គម្រោងនេះ ដែលគេរំពឹងថា នឹងត្រូវបញ្ចប់នៅខែមិថុនា ឆ្នាំ២០១៩ ៕
ចែករំលែកព័តមាននេះ