ប្រទេសកូរ៉េខាងត្បូង ៖ រដ្ឋាភិបាលបានឱ្យដឹងថា ការនាំចេញផលិតផលកសិកម្ម និងអាហារកែច្នៃរបស់កូរ៉េខាងត្បូង បានធ្លាក់ចុះក្នុងខែតុលា ធៀបនឹងឆ្នាំទៅ ស្របពេលការបញ្ជូនទំនិញជាអាហារកែច្នៃ និងទីផ្សារធំៗបានដើរតាមគន្លងដដែលវិញ ។
យោងតាមក្រសួងកសិកម្ម ស្បៀងអាហារនិងកិច្ចការជនបទឲ្យដឹងថា ការបញ្ជូនទំនិញជាប្រភេទអាហារ និងផលិតផលកសិកម្មដទៃទៀតសម្រេចបានចំនួន៥៤៩,៩លានដុល្លារក្នុងអំឡុងខែតុលាកន្លងមក ធ្លាក់ចុះ១,៨% បើធៀបនឹងអំឡុងពេលដូចគ្នាកាលពីឆ្នាំ២០១៤ ។
ក្នុងខែតុលា ការនាំចេញនៃផលិតផលទាំងអស់ដែលផលិតនៅកូរ៉េខាងត្បូងបានធ្លាក់ចុះប្រមាណជា១៥,៨% ។
ការធ្លាក់ចុះនៃការនាំចេញផលិតផលកសិកម្មនិងគ្រឿងឧបភោគបរិភោគ គឺដោយសារតែតួលេខនាំចេញទៅកាន់ទីផ្សារជប៉ុន រុស្ស៊ី និងក្រុមប្រឹក្សាសហប្រតិបត្តិការនៃតំបន់ឈូងសមុទ្រមានកម្រិតតិចជាងមុន ។ ពេលទូទាត់នឹងកំណើនសម្រាប់នាំចេញទៅប្រទេសចិន សហរដ្ឋអាមេរិក សហគមន៍អឺរ៉ុប និងសមាគមប្រជាជាតិអាស៊ីអាគ្នេយ៍ (អាស៊ាន) ។
សម្រាប់ខែតុលា ការនាំចេញទៅកាន់ប្រទេសជប៉ុន ដែលជាទីផ្សារគន្លឹះបានធ្លាក់ចុះ១៨% ឬស្មើនឹង៩៨,៤៣លានដុល្លារ ។ ចំណែកបរិមាណនៃការនាំចេញទៅកាន់រុស្ស៊ី និងតំបន់ឈូងសមុទ្រ ធ្លាក់៤៥,២% និង២២,៧% ។
ការនាំចេញផលិតផលស្រស់ៗ និងសាច់ស្រស់បានកើនឡើង០,៣% ឬស្មើនឹង៩៧,២លានដុល្លារ ប៉ុន្តែបរិមាណអាហារកែច្នៃធ្លាក់ចុះ២,៣% ឬស្មើនឹង៤៥២,៧លានដុល្លារ។
ក្រសួងឲ្យដឹងបន្តថា ការធ្លាក់ចុះនៃផ្នែកអាហារកែច្នៃដែលរាប់បញ្ចូលមី ឬគុយទាវ ផលិតផលទឹកដោះគោ និងនំធ្វើពីម្សៅនេះនាំឲ្យប៉ះពាល់ដល់បរិមាណនាំចេញសរុបទាំងអស់របស់ប្រជាជាតិមួយនេះ ។
ចំណែកការនាំចេញទៅកាន់សហរដ្ឋអាមេរិកបានកើនឡើង១៥,៦% ឬស្មើនឹង៦៨,៨លានដុល្លារ ខណៈតួលេខចិនសម្រេចបាន៩៦,៥លានដុល្លារ បានកើនឡើង៣,១% ។ រីឯការនាំចេញទៅកាន់តំបន់អាស៊ាន និងអឺរ៉ុបកើន៦,៥% និង១៣,៥% ក្នុងខែតុលា ។
ក្នុងរយៈពេល១០ខែដំបូងនៃឆ្នាំ២០១៥ ការនាំចេញផលិតផលកសិកម្ម និងអាហារកែច្នៃបានធ្លាក់ចុះ១,១% ធៀបនឹងឆ្នាំទៅ ។ ការបញ្ជូនទំនិញចេញក្រៅប្រទេស សរុបមានចំនួន៥,០៦ប៊ីលានដុល្លារ ដែលធ្លាក់ចុះពីអត្រា៥,១២ប៊ីលានដុល្លារដែលសម្រេចបានកាលពីឆ្នាំទៅ ។ ទិន្នន័យបង្ហាញថា ការនាំចេញផលិតផលស្រស់ៗក៏ធ្លាក់ចុះ១៣,១%ដែរ ខណៈអាហារកែច្នៃកើនឡើង១,៥% ។
ការនាំចេញទៅប្រទេសជប៉ុនបានធ្លាក់ចុះ១១,៦% ខណៈបរិមាណនាំចេញទៅទីផ្សារចិន និងសហរដ្ឋអាមេរិកកើនឡើង៦,៧% និង៦,៣% ៕
ចែករំលែកព័តមាននេះ