ប្រទេសវៀតណាម ៖ គណៈកម្មការគ្រប់គ្រងហិរញ្ញវត្ថុជាតិ(NFSC)បានទម្លាក់ការព្យាករនៃអតិផរណារបស់ខ្លួនស្ថិតនៅក្រោមអត្រា២% ខណៈផលិតផលក្នុងស្រុកសរុប(GDP)ខ្លួនបានប៉ាន់ប្រមាណទុកនូវកំណើន៦,៥%
ប្រទេសវៀតណាម ៖ គណៈកម្មការគ្រប់គ្រងហិរញ្ញវត្ថុជាតិ(NFSC)បានទម្លាក់ការព្យាករនៃអតិផរណារបស់ខ្លួនស្ថិតនៅក្រោមអត្រា២% ខណៈផលិតផលក្នុងស្រុកសរុប(GDP)ខ្លួនបានប៉ាន់ប្រមាណទុកនូវកំណើន៦,៥%សម្រាប់ឆ្នាំ២០១៥នេះ ។
ការរំពឹងទុកនេះ គឺជាមាតិកាដ៏មានសារសំខាន់នៃរបាយការណ៍ការរបស់គណៈកម្មការខាងលើចំពោះសេដ្ឋកិច្ចក្នុងស្រុករបស់វៀតណាមក្នុងខែកញ្ញានិង៩ខែដំបូងនៃឆ្នាំ២០១៥នេះ ដែលចេញផ្សាយដោយNFSC ។
គណៈកម្មការគ្រប់គ្រងហិរញ្ញវត្ថុជាតិរបស់វៀតណាមបានឲ្យដឹងថា នៅក្នុងអំឡុងពេល៩ខែដើមឆ្នាំនេះ អតិផរណាបានថយចុះមកកម្រិតសូន្យ ធៀបនឹងអំឡុងពេលដូចគ្នាកាលពីឆ្នាំទៅ ប៉ុន្តែអត្រាអតិផរណាស្នូលដែលមានរាប់បញ្ចូលតម្លៃអង្ករ អាហារស្រស់ ថាមពល និងទំនិញផ្សេងៗដែលត្រូវបានគ្រប់គ្រងតម្លៃដោយរដ្ឋដូចជា សេវាសុខភាព និងអប់រំនៅតែកើនឡើង២,៤%ដដែល ។
គណៈកម្មការខាងលើបានឲ្យដឹងទៀតថា អតិផរណាស្នូលមានអត្រាកំណើនថេរក្នុងកម្រិត២,៤%ក្នុងរយៈពេល៧ខែមុននេះ ។
ចំណែកលោកស្រី Nguyen Bich Lam ប្រធានការិយាល័យស្ថិតិទូទៅ (GSO) បានថ្លែងថា បច្ចុប្បន្នអតិផរណាស្នូលដែលស្ថិតក្នុងរង្វង់២ទៅ៣%គឺជាអត្រាដែលសមហេតុផលឬអាចទទួលយកបាន ។ អត្រានេះត្រូវបានរៀបចំទុកសម្រាប់ការធ្វើឲ្យមានស្ថិរភាពនៃម៉ាក្រូសេដ្ឋកិច្ចនិងកំណើនដែលអាចជួយទ្រទ្រង់រួចនូវសេដ្ឋកិច្ចក្នុងស្រុក ។
នៅគ្រានោះដែរ សេដ្ឋកិច្ចពិភពលោកមានការប្រែប្រួលច្រើនក្នុងត្រីមាសទី៣ឆ្នាំនេះ ប៉ុន្តែការវិវឌ្ឍនិងផ្លាស់ប្តូរទាំងនោះមិនប៉ះពាល់ដល់កំណើនសេដ្ឋកិច្ចក្នុងស្រុករបស់វៀតណាមឡើយ ហើយអត្រាកំណើនGDPក្នុងអំឡុងពេល៩ខែដំបូងនៃឆ្នាំ២០១៥នេះ នៅតែសម្រេចបាន៦,៥%ដដែល ធៀបនឹងអំឡុងពេលដូចគ្នាកាលពីឆ្នាំមុន ។
ជាងនេះទៅទៀត ស្ថាប័នដដែលនោះ ក៏បានរក្សានូវការវាយតម្លៃទុកនៃអត្រាកំណើនសេដ្ឋកិច្ច(GDP) ក្នុងកម្រិត៦,៥%សម្រាប់ពេញមួយឆ្នាំ២០១៥នេះផងដែរ ។
គន្លឹះសំខាន់នៃការកើនឡើងនៅក្នុងGDP ជាតិ គឺកំណើនក្នុងវិស័យសំណង់និងឧស្សាហកម្មជាពិសេសឧស្សាហកម្មផលិតកម្មនិងឧស្សាហកម្មកែច្នៃផលិតផលជាដើម។ នេះបើតាមការឲ្យដឹងពីគណៈកម្មការខាងលើ ។
នៅក្នុងអំឡុងពេល៩ខែដើមឆ្នាំ២០១៥ កំណើនGDPនៃវិស័យសំណង់និងឧស្សាហកម្មសម្រេចបាន៩,៥៧%កើនឡើងទ្វេ ដងធៀបនឹងអត្រាកំណើនក្នុងរយៈពេលដូចគ្នាកាលពីឆ្នាំ២០១៤ ។
ជាមួយគ្នានោះដែរកំណើន GDP មិនមានអ្វីប្រែប្រួលឡើយគឺមានកម្រិតថេរចំពោះវិស័យសេវាកម្មនិងថយចុះ២,០៨%ចំពោះវិស័យកសិកម្ម ព្រៃឈើ និងនេសាទ ធៀបនឹង៩ខែដើមឆ្នាំ២០១៤ មានកម្រិត២,៩៤%ឯណោះ ។
រីឯសន្ទស្សន៍ផលិតកម្មឧស្សាហកម្ម (IIP) ក្នុងរយៈពេល៩ខែដំបូងក៏បានកើនឡើង៩,៨%ផងដែរ គឺខ្ពស់ជាងអត្រាកំណើន៦,៣%ក្នុងអំឡុងពេលដូចគ្នាកាលពីឆ្នាំទៅ ខណៈវិស័យផលិតកម្មនិងការកែច្នៃផលិតផល(ផលិតផលពាក់កណ្តាលសម្រេច)បានកើនឡើងនៅក្នុងអត្រាកំណើននៃសន្ទស្សន៍ផលិតកម្មឧស្សាហកម្ម១០,២% ធៀបនឹងអត្រា៨,២%ដែលសម្រេចបានក្នុងអំឡុងពេលដូចគ្នាកាលពីឆ្នាំ២០១៤ ។
បន្ថែមលើនេះភាពជឿជាក់របស់វិនិយោគិននិងអតិថិជនលើការប្រកបអាជីវកម្មស្ថិតនៅក្នុងកម្រិតខ្ពស់ជាមុនដែរក្នុងអំឡុងពេលប៉ុន្មានខែថ្មីៗនេះ ដែលវាឆ្លុះបញ្ចាំងឲ្យឃើញពីនិន្នាការវិជ្ជមាននៅក្នុងកំណើនសេដ្ឋកិច្ចក្នុងស្រុក ។
ទោះជាយ៉ាងណា គណៈកម្មការគ្រប់គ្រងហិរញ្ញវត្ថុជាតិរបស់វៀតណាមបានលើកឡើងថា តម្លៃប្រេងបានធ្លាក់ចុះនៅលើទីផ្សារពិភពលោក ប៉ុន្តែសេដ្ឋកិច្ចក្នុងស្រុកវៀតណាមបានរើបឡើងវិញនៅគ្រប់វិស័យខណៈតុល្យភាពនៃការនាំចេញនាំចូល និងការប្រមូលពន្ធនៅតែធានាបានដដែល ៕
ចែករំលែកព័តមាននេះ