រាជធានីភ្នំពេញ ៖ សេចក្តីរាយការណ៍បានឱ្យដឹងថា ជនជាតិអូស្ត្រាលីម្នាក់បានគាំងបេះដូងស្លាប់កាលពីវេលាម៉ោង១០ និង៣០នាទីយប់ ថ្ងៃទី២៣ កញ្ញា ២០១៥ នៅចំណុចផ្ទះលេខ៥៦C12 ផ្លូវ២៣០ សង្កាត់បឹងសាឡាង។
សពជនជាតិអូស្ត្រាលីដែលគាំងបេះដូងស្លាប់ឈ្មោះ MAW SONSTETHENARTHOR ភេទប្រុស អាយុ៦២ឆ្នាំ មករស់នៅប្រទេសកម្ពុជារយៈពេលប្រមាណជិត២០ឆ្នាំហើយ ធ្វើការផ្នែកសំណង់ មានប្រពន្ធជាជនជាតិខ្មែរឈ្មោះហ៊ុន ស្រីពៅ អាយុ៣២ឆ្នាំ មានកូនស្រី២នាក់ ម្នាក់អាយុ១៣ឆ្នាំ និងម្នាក់អាយុ១០ឆ្នាំ។
ប្រភពបានឱ្យដឹងថា ជនរងគ្រោះមានជំងឺលើសឈាម និងទឹកនោមផ្អែម ។ មុនពេលកើតហេតុ ជនរងគ្រោះបានឱ្យប្រពន្ធឆុងកាហ្វេផឹក ពេលឆុងហើយប្រពន្ធបានហៅឱ្យផឹកកាហ្វេ ។ ពេលជនរងគ្រោះងើបឡើងបម្រុងទៅផឹកកាហ្វេស្រាប់តែទន់ជើងដួលតែម្តងត្រូវបានប្រពន្ធនាំទៅសង្គ្រោះនៅមន្ទីរពេទ្យ តែពេលទៅដល់គ្រូពេទ្យប្រាប់ថា គាត់បានស្លាប់បាត់ទៅហើយ។
លុះព្រឹកឡើងថ្ងៃទី២៤ កញ្ញា នេះ សមត្ថកិច្ចជំនាញ ពេទ្យតុលាការ និងខាងស្ថានទូតបានចុះមកធ្វើពិនិត្យ និងធ្វើកោសល្យវិច័យសពឃើញថា ជនរងគ្រោះស្លាប់ដោយសារគាំងបេះដូង៕
ចែករំលែកព័តមាននេះ