នគរបាលខណ្ឌទួលគោក និងសែនសុខចាប់ចោរប្លន់ម៉ូតូបានម្នាក់
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក៥នាក់ត្រូវនគរបាលខណ្ឌទួលគោកសហការជាមួយនគរបាលខណ្ឌសែនសុខឃាត់ខ្លួននៅចំណុចក្រោយខារ៉ាអូខេញូវស្តា
រាជធានីភ្នំពេញ ៖ ជនសង្ស័យម្នាក់ក្នុងចំណោមបក្សពួក៥នាក់ត្រូវនគរបាលខណ្ឌទួលគោកសហការជាមួយនគរបាលខណ្ឌសែនសុខឃាត់ខ្លួននៅចំណុចក្រោយខារ៉ាអូខេញូវស្តា ស្ថិតក្នុងផ្លូវលំភូមិត្រពាំងឈូក សង្កាត់ទឹកថ្លា ខណ្ឌសែនសុខ បន្ទាប់ពីពួកគេធ្វើសកម្មភាពវាយប្លន់យកម៉ូតូហុងដាឌ្រីមC125 ស៊េរី២០១៤ ពណ៌ខ្មៅ ពាក់ស្លាកលេខភ្នំពេញ១CO4967 នៅចំណុចសង្កាត់ទឹកល្អក២ ខណ្ឌទួលគោកកាលពីវេលាម៉ោង១ និង១០នាទីរំលងអធ្រាត្រឈានចូលថ្ងៃទី៣ កញ្ញា នេះ។
ជនសង្ស័យដែលចាប់ខ្លួនបានឈ្មោះវ៉ាន់ ជីវ័ន្ត ភេទប្រុស អាយុ២០ឆ្នាំ ស្នាក់នៅផ្ទះជួលភូមិត្រពាំងឈូក សង្កាត់ទឹកថ្លា មានស្រុកកំណើតភូមិល្វាស ឃុំល្វាស ស្រុកល្វាឯម ខេត្តកណ្តាល ចំណែកជនរងគ្រោះឈ្មោះឡេង ស៊ីឌឿន អាយុ២៦ឆ្នាំ ជានិស្សិតភាសាអង់គ្លេសឆ្នាំទី៣ ស្នាក់នៅផ្ទះលេខ២២៧ ផ្លូវព្រះនរោត្តម សង្កាត់ទន្លេបាសាក់ ខណ្ឌចំការមន។
ប្រភពបានឱ្យដឹងថា មុនពេលកើតហេតុជនរងគ្រោះបានជិះម៉ូតូតែម្នាក់ឯងក្នុងបំណងទៅយកសង្សារចេញពីធ្វើការ ពេលធ្វើដំណើរមកដល់ចំណុចផ្លូវ២៧១កែង១៨២ ក្នុងសង្កាត់ទឹកល្អក់ទី២ ស្រាប់តែលេចមុខជនសង្ស័យ៥នាក់ជិះម៉ូតូ២គ្រឿងមកធ្វើសកម្មភាពស្ទាក់វាយជនរងគ្រោះនឹងខ្សែក្រវាត់ ហើយយកម៉ូតូជិះគេចខ្លួន។
ភ្លាមៗនោះម្ចាស់ម៉ូតូបានស្រែកចោរៗធ្វើឱ្យមានការភ្ញាក់ផ្អើលដល់សមត្ថកិច្ចសង្កាត់ទឹកល្អក់២ដែលកំពុងជិះម៉ូតូល្បាតតាមផ្លូវនោះដេញចាប់បានម្នាក់នៅចំណុចខាងលើ ដកហូតម៉ូតូជនរងគ្រោះបានមកវិញ ចំណែកបក្សពួក៤នាក់រត់គេចខ្លួនបាត់៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ