ខេត្តត្បូងឃ្មុំ ៖ ទីបំផុតក្រោមការស្រាវជ្រាវរបស់កម្លាំងសមត្ថកិច្ចគ្រប់ច្រកល្ហកតាមប្រមាញ់ជនសង្ស័យបាន២នាក់ជាឃាតកព្រួតតវាយ និងចាក់សម្លា.ប់បុរសរងគ្រោះឈ្មោះ លី រ៉ាវុធ អាយុ២៣ឆ្នាំ នៅភូមិមេមត់ផ្សារ ឃុំមេមត់
ខេត្តត្បូងឃ្មុំ ៖ ទីបំផុតក្រោមការស្រាវជ្រាវរបស់កម្លាំងសមត្ថកិច្ចគ្រប់ច្រកល្ហកតាមប្រមាញ់ជនសង្ស័យបាន២នាក់ជាឃាតកព្រួតតវាយ និងចាក់សម្លាប់បុរសរងគ្រោះឈ្មោះ លី រ៉ាវុធ អាយុ២៣ឆ្នាំ នៅភូមិមេមត់ផ្សារ ឃុំមេមត់ ស្រុកមេមត់ ។ ប្រតិបត្តិការនេះត្រូវបានធ្វើឡើងនៅព្រឹកថ្ងៃទី៣១ សីហា ២០១៥ ដោយដកហូតបានម៉ូតូរបស់ជនរងគ្រោះ១គ្រឿង និងឋៈឡេថង១គ្រឿង មានទ្រុងពណ៌ខៀវ ដែលបានដាក់ជនរងគ្រោះច្រកបាវដឹកយកទៅប្លុងចោលនៅក្នុងព្រៃ ។
លោកវរសេនីយីត្រី ចក់ សុខកៅ នាយការិយាល័យព្រហ្មទណ្ឌកម្រិតធ្ងន់ខេត្តបានប្រាប់ឲ្យដឹងថា ក្រោមការយកចិត្តទុកដាក់ពីសំណាក់លោកឧត្តមសេនីយ៍ត្រី ម៉ៅ ពៅ ស្នងការនគរបាលខេត្ត និងលោកវរសេនីយ៍ឯក ប្រាក់ ប៊ុនណុន ស្នងការរងនគរបាលខេត្ត រូបលោកបានដឹកនាំកម្លាំងចុះស្រាវជ្រាវដល់កន្លែងកើតហេតុដែលគេបានប្រទះសពនៅក្នុងព្រៃភូមិទ្រៀក ឃុំមេមត់ កាលពីល្ងាចថ្ងៃទី២៨ សីហា ដោយមានស្នាមរឹកក និងចាក់លើរាងកាយជាច្រើនកន្លែង ។
លោកវរសេនីយ៍ត្រី នាយការិយាល័យព្រហ្មទណ្ឌកម្រិតធ្ងន់ខេត្តប្រាប់បន្តទៀតថា សពជនរងគ្រោះដែលច្រកបាវនោះ ដំបូងមិនមានអ្នកណាស្គាល់អត្តសញ្ញាណឡើយ រហូតដល់ព្រឹកថ្ងៃទី២៩ សីហា ២០១៥ ក្រោយពីលោកស្នងការនគរបាលខេត្តឲ្យសមត្ថកិច្ចជួយផ្សព្វផ្សាយតាមបណ្តាប៉ុស្តិ៍រដ្ឋបាលនានា ទើបក្រុមសាច់ញាតិមកមើលស្គាល់ដឹងថា ឈ្មោះ លី រ៉ាវុធ បន្ទាប់មកសាច់ញាតិបានដឹកយកទៅធ្វើបុណ្យតាមប្រពៃណី ។ ជាមួយនោះសមត្ថកិច្ចនៅតែបន្តការស៊ើបអង្កេតដោយយកចិត្តទុកដាក់បំផុតតាមបញ្ជារបស់លោកស្នងការនគរបាលខេត្ត ។
ក្រោយពីមានតម្រុយច្បាស់លាស់នោះ ទើបនៅព្រឹកថ្ងៃទី៣១ សីហា ជនសង្ស័យចំនួន២នាក់ ត្រូវបានឃាត់ខ្លួនជាបន្តបន្ទាប់ ក្នុងនោះរួមមាន ១-ឈ្មោះ ជឹម ស្រីុម ហៅគង់ ភេទប្រុស អាយុ១៨ឆ្នាំ ជាអ្នកដៃដល់ រស់នៅភូមិមេមង ឃុំមេមង ស្រុកមេមត់ និង២-ឈ្មោះ អាំ ផាន ភេទប្រុស អាយុ១៦ឆ្នាំ រស់នៅភូមិ-ឃុំជាមួយគ្នា ត្រូវបានបញ្ជូនមកកាន់អធិការដ្ឋាននគរបាលស្រុកមេមត់ ដើម្បីសួរនាំ ។
ជនសង្ស័យទាំង២នាក់បានឆ្លើយសារភាពថា នៅថ្ងៃទី២៨ សីហា ២០១៥ ពួកគេបានណាត់ឲ្យឈ្មោះ លី រ៉ាវុធ ទៅយកថ្នាំញៀននៅផ្ទះរបស់ជនដៃដល់ដែលរត់គេចខ្លួនបាត់ ក្នុងភូមិមេមង ឃុំមេមង ដោយឃើញជនរងគ្រោះមានម៉ូតូ និងទូរស័ព្ទដៃទំនើប ក៏នាំគ្នាព្រួតវាយសម្លាប់យ៉ាងឃោរឃៅ ដោយចាក់លើរាងកាយត្រូវជាកន្លែង និងរឹត.ក រួចដាក់ច្រកបាវដឹកតាមឋៈឡេថង់យកមកទម្លាក់ចោល ដើម្បីបំបាត់ភស្តុតាងមិនឲ្យអ្នកណាដឹង ។
សមត្ថកិច្ចបានបញ្ជាក់ថា កម្លាំងជំនាញនឹងបន្តស្រាវជ្រាវចាប់មេក្លោង ដែលរត់គេចខ្លួន ដើម្បីនាំខ្លួនមកផ្តន្ទាទោសតាមច្បាប់ ៕
ចែករំលែកព័តមាននេះ