រាជធានីភ្នំពេញ ៖ រថយន្តហ៊ីយ៉ាន់ដាយបើកបរដោយជនបរទេសម្នាក់បើកលឿនពេករេចង្កូតបុកក្បាលនាគពុះចែកផ្លូវទៅមុខលែងរួច កាលពីវេលាម៉ោង១២អធ្រាត្រថ្ងៃទី២៩ សីហា តាមបណ្តោយផ្លូវកម្ពុជាក្រោម នៅសង្កាត់ទឹកល្អក់ទី១ ខណ្ឌទួលគោក ។
សាក្សីឃើញហេតុការណ៍បានឱ្យដឹងថា មុនពេលកើតហេតុ គេឃើញរថយន្តម៉ាកហ៊ីយ៉ាន់ដាយ ពណ៌ស្ករ ពាក់ស្លាកលេខ ភ្នំពេញ 2L-9600 បើកបរដោយបុរសជាជនបរទេសម្នាក់ ធ្វើដំណើរពីលិចទៅកើតក្នុងល្បឿនលឿន លុះមកដល់ចំណុចខាងលើបានរេចង្កូតទៅបុកក្បាលនាគពុះចែកទ្រូងផ្លូវចំពីមុខពេញទំហឹង បណ្តាលឲ្យរថយន្តខូចខាតផ្នែកខាងមុខនិងផ្ទុះពោងសុវត្ថិភាព ចំណែកក្បាលនាគពុះចែកផ្លូវមិនមានខូចខាតទេ គ្រាន់តែរលាត់ថ្នាំតិចតួច ។
ក្រោយពេលកើតហេតុ អ្នកបើកបរបានរត់គេចខ្លួនបាត់ស្រមោល បន្សល់ទុករថយន្តនៅកន្លែងកើតហេតុ ត្រូវបានសមត្ថកិច្ចស្ទួចយកទៅរក្សាទុកនៅការិយាល័យនគរបាលចរាចរណ៍ផ្លូវគោក រង់ចាំធ្វើការដោះស្រាយតាមច្បាប់ ៕
ចែករំលែកព័តមាននេះ