ទ្រាំនឹងការរាតត្បាតរបស់សត្វរុយមិនបាន ព្រះសង្ឃចងមុងឆាន់ចង្ហាន់
ខេត្តកំពង់ស្ពឺ ៖ ព្រះសង្ឃជាច្រើនអង្គដោយទ្រាំនឹងការរាតត្បាតរបស់សត្វរុយមិនបានក៏សំរេចចិត្តចូលឆាន់ចង្ហាន់ក្នុងមុង ព្រោះតែខ្លាចកើតជំងឺអាសន្នរោគ។
ខេត្តកំពង់ស្ពឺ ៖ ព្រះសង្ឃជាច្រើនអង្គដោយទ្រាំនឹងការរាតត្បាតរបស់សត្វរុយមិនបានក៏សំរេចចិត្តចូលឆាន់ចង្ហាន់ក្នុងមុង ព្រោះតែខ្លាចកើតជំងឺអាសន្នរោគ។
វត្តដែលព្រះសង្ឃឆាន់ចង្ហាន់ក្នុងមុងនេះស្ថិតក្នុងឃុំស្គុះ ស្រុកសំរោងទង ខេត្តកំពង់ស្ពឺ។
ព្រះតេជគុណព្រះនាមប៊ូ សុវណ្ណពុទ្ឋី ព្រះជន្ម២៥វស្សា ជាព្រះគ្រូចៅអធិការវត្តចំប៉ាទេព បានមានសង្ឃដីកាថា សត្វរុយចាប់ផ្តើមរាតត្បាតនៅក្នុងបរិវេណវត្តទើបតែអំឡុងពេល៥ទៅ៦ថ្ងៃនេះតែប៉ុណ្ណោះ ចំពោះបញ្ហានេះតាមដឹង គឺកើតមានច្រើនឆ្នាំមកហើយ។
សត្វរុយដែលកើតមានច្រើននេះ គឺអំឡុងពេលនៃការចាប់មាន់លក់របស់ថៅកែមាន់មួយកន្លែងនៅក្បែរវត្តតែម្តង។ តែអាជ្ញាធរហាក់បីដូចជាមិនអើពើក្នុងបញ្ហានេះទាល់តែសោះ បើទោះជាប្រជាពលរដ្ឋក៏ដូចជាព្រះសង្ឃសំណូមពរទៅអាជ្ញាធរឱ្យជួយអន្តរាគមន៏ក្នុងបញ្ហានេះយ៉ាងណាក៏ដោយ ក៏អាជ្ញាធរតាំងពីឃុំដល់ស្រុក និងខេត្តផងដែរនាពេលកន្លងមកហាក់បីដូចជាមិនបានអើពើ និងមានផលវិជ្ជមានទាល់តែសោះ
។
ដោយហេតុនេះហើយក្នុងនាមព្រះអង្គជាចៅអធិការ ព្រមទាំងព្រះសង្ឃក្នុងវត្តជាង៤អង្គ ព្រោះអត់ទ្រាំនឹងការរោមចង្ហាន់មិនបានព្រះសង្ឃទូទាំងវត្តបានសំរេចចិត្តចងមុងហើយចូលឆាន់ចង្ហាន់ក្នុងមុងតែម្តង។
ពាក់ព័ន្ឋនឹងបញ្ហានេះដែរ ព្រះសង្ឃ និងប្រជាពុទ្ឋបរិស័ទបានសូមសំណូមពរទៅមន្ទីរបរិស្ថានក៏ដូចជាមន្ទីរកសិកម្មខេត្តកំពង់ស្ពឺ ជាពិសេសស្ថាប័នពាក់ព័ន្ឋនឹងបញ្ហានេះសូមមានវិធានការផង បើគ្មានវិធានការទប់ស្កាត់ទេនោះជំងឺរាតត្បាតច្បាស់ជាកើតមានលើមនុស្សចាស់ក្មេង និងព្រះសង្ឃមិនខាន។
មានការរិះគន់ថា ការដែលបណ្តាលឱ្យកើតមានសត្វរុយមករាតត្បាតបែបនេះ គឺដោយសារតែការចិញ្ចឹមមិនមានបទដ្ឋានបច្ចេកទេសត្រឹមត្រូវ ណាមួយម្ចាស់កសិដ្ឋានទាំងនោះមិនសូវយកចិត្តទុកដាក់ទៅលើបញ្ហាអនាម័យទើបកើតមានរុយមករាតត្បាតបែបនេះ ក្នុងនោះក៏មានការរិះគន់ទៅលើជំនាញផងដែរថា មិនសូវអើពើត្រួតពិនិត្យតាមកសិដ្ឋានឱ្យបានម៉ត់ចត់ទើបកើតមានបញ្ហាបែបនេះ៕
ចែករំលែកព័តមាននេះ