រាជធានីភ្នំពេញ ៖ ស្ត្រីម្នាក់ជិះម៉ូតូទៅបង់លុយថ្លៃភ្លើងត្រូវបានជនសង្ស័យជាចោរប្លន់ម្នាក់ប្រើកូនកាំបិតចុងស្រួចស្ទាក់ភ្ជង់ប្លន់យកម៉ូតូបានសម្រេច បន្ទាប់មកបានជិះគេចខ្លួនបាត់ដោយសុវត្តិភាព ។ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង២ និង៣០នាទីរសៀល
រាជធានីភ្នំពេញ ៖ ស្ត្រីម្នាក់ជិះម៉ូតូទៅបង់លុយថ្លៃភ្លើងត្រូវបានជនសង្ស័យជាចោរប្លន់ម្នាក់ប្រើកូនកាំបិតចុងស្រួចស្ទាក់ភ្ជង់ប្លន់យកម៉ូតូបានសម្រេច បន្ទាប់មកបានជិះគេចខ្លួនបាត់ដោយសុវត្តិភាព ។ ហេតុការណ៍នេះបានបង្កឲ្យមានការភ្ញាក់ផ្អើលកាលពីវេលាម៉ោង២ និង៣០នាទីរសៀល ថ្ងៃទី១០ ខែសីហាឆ្នាំ២០១៥ នៅចំណុចក្នុងវត្តត្រពាំងឈូក ស្ថិតក្នុងភូមិចែងមែង សង្កាត់សំរោងក្រោម ខណ្ឌពោធិ៍សែនជ័យ ។
ស្ត្រីរងគ្រោះឈ្មោះ ស្រស់ អុល ភេទស្រី អាយុ៤២ឆ្នាំ មានទីលំនៅក្នុងភូមិកើតហេតុខាងលើ ចំណែកម៉ូតូដែលត្រូវចោរប្លន់យកទៅបាត់នោះម៉ាកហុងដាឌ្រីម សេ១២៥ ស៊េរីឆ្នាំ២០១៣ ពណ៍ខ្មៅ ពាក់ស្លាក លេខភ្នំពេញ 1CA- 3670 រីឯជនសង្ស័យម្នាក់ឯងប្រដាប់ដោយកូនកាំបិតចុងស្រួច១ ។
ស្ត្រីរងគ្រោះបានឲ្យដឹងថា នៅមុនពេលកើតហេតុ គាត់បានជិះម៉ូតូចេញពីផ្ទះយកលុយទៅបង់ថ្លៃភ្លើង លុះពេលទៅដល់ត្រង់ក្នុងវត្តត្រពាំងឈូក ជិតច្រកចេញប៉ែកខាងកើត ស្រាប់តែមានជនសង្ស័យម្នាក់ ស្លៀកពាក់ស៊ីវិលកាន់កូនកាំបិតចុងស្រួច១ ស្ទុះចេញមកស្ទាក់ពីមុខម៉ូតូ បន្ទាប់មកបានដកកូនកាំបិត ភ្ជង់គំរាមមិនឲ្យស្រែក និងបានដណ្តើមយកកាបូបលុយ និងម៉ូតូជិះគេចខ្លួនបាត់ស្រមោលតែម្តង ។
តាមប្រភពព័ត៌មានបានឲ្យដឹងថា នៅក្នុងខណៈនោះនៅចំណុចកើតហេតុមានសភាពស្ងាត់ណាស់ បន្ទាប់ពីជនសង្ស័យធ្វើសកម្មភាពប្លន់បានសម្រេច ទើបជនរងគ្រោះបានស្រែកឆោឡោ និងមានការភ្ញាក់ ផ្អើលដល់ព្រះសង្ឃដែលគង់នៅក្នុងវត្ត និងបានរាយការណ៍ទៅសមត្ថកិច្ចមូលដ្ឋានចុះអន្តរាគមន៍ភ្លាមៗ តែម្តង ។
ក្រោយពេលកើតហេតុ ប៉ូលិសបានចុះទៅពិនិត្យកន្លែងកើតហេតុ និងបាននាំជនរងគ្រោះទៅដាក់ពាក្យបណ្តឹង និងសាកសួរពីភិនភាគជនសង្ស័យនៅប៉ុស្ដិ៍នគរបាលរដ្ឋបាលសំរោងក្រោម ដើម្បីកំណត់មុខ សញ្ញាស្រាវជ្រាវតាមរកចាប់ខ្លួនយកទៅផ្ដន្ទាទោសតាមផ្លូវច្បាប់ ប៉ុន្តែទោះបីជាបែបណាទាក់ទងនឹង ករណីនេះសមត្តកិច្ចប៉ូលិបានអះអាងថា នៅមិនទាន់ជឿជាក់ និងហ៊ានសន្និដ្ឋានថា ជាករណីប្លន់ទាំងស្រុងនោះទេ ព្រោះកន្លងមកស្ត្រីរូបនោះតែងតែបន្លំភ្នែកសមត្តកិច្ចថា មានករណីប្លន់ និងគេឆបោកជាញឹកញាប់ ។ ដោយឡែកស្ត្រីរងគ្រោះបានអះអាងយ៉ាងច្បាស់ថា គាត់ត្រូវរងគ្រោះដោយអំពើប្លន់ យ៉ាងពិងប្រាកដ មិនដូចជាប៉ូលិសសង្ស័យនោះឡើយ ៕
ចែករំលែកព័តមាននេះ