ប្រតិភូខេត្ដព្រះវិហារធ្វើទស្សនកិច្ចនៅខេត្ដចំប៉ាសាក់ប្រទេសឡាវ
ដោយ ៖ អប្សរា
ថ្ងៃចន្ទ ទី១២ ខែកក្កដា ឆ្នាំ២០១០ ម៉ោង ១៦:១០
ចំប៉ាសាក់-ឡាវ ៖ កាលពីព្រឹកថ្ងៃទី១០ កក្កដា កន្លងទៅលោកអ៊ុំ ម៉ារ៉ា អភិបាលខេត្ដព្រះវិហារ បានដឹកនាំប្រតិភូថ្នាក់ខេត្ដ សរុបចំនួន៤២នាក់ទៅធ្វើទស្សនកិច្ចនៅខេត្ដចំប៉ាសាក់ ប្រទេសឡាវតាមការអញ្ជើញ របស់លោកសនសៃ ស៊ីផាន់ដន អភិបាលខេត្ដ ចំប៉ាសាក់ ។ លោកអ៊ុំ ម៉ារ៉ា និងប្រតិភូ បានធ្វើដំណើរឆ្លងកាត់ទន្លេមេគង្គលើចេញពី ចំណុចភូមិកំពង់ស្រឡៅ ឃុំកំពង់ស្រឡៅ១ ស្រុកឆែប ចូលទៅក្នុងទឹកដីភូមិមឿងសែន ប្រទេសឡាវ ឆ្ពោះទៅកាន់សណ្ឋាគារហួខូង លែម ស្ថិតក្នុងស្រុកមឿងខូង នៅតាមមាត់ទន្លេមេគង្គលើ ក្នុងខេត្ដចំប៉ាសាក់ ។ នាព្រឹកនោះប្រតិភូខេត្ដទាំងពីរបានជួប ពិភាក្សាគ្នាលើគោលការណ៍សំខាន់ៗ រួមមាន ៖
- ទី១-គោលបំណងក្នុងការរៀបចំបើកច្រក ព្រំដែនជាអន្ដរជាតិឆ្លងកាត់ទន្លេមេគង្គលើ នៅក្នុងចំណុចភូមិកំពង់ស្រឡៅ ឃុំកំពង់ ស្រឡៅ១ប្រទេសកម្ពុជា ជាប់គ្នាជាមួយភូមិ មឿងខូង ប្រទេសឡាវ ដើម្បីបង្កភាពងាយ ស្រួលក្នុងទំនាក់ទំនងចេញចូលរបស់ប្រជាជនទាំងពីរប្រទេសដែលរស់នៅជិតខាងគ្នាត្រង់ ចំណុចខាងលើក៏ដូចជាខេត្ដទាំងពីរ ដែលតាម ប្រវត្ដិក្នុងទំនាក់ទំនងមានភាពល្អប្រសើរពុំ ធ្លាប់មានភាគីណាមួយមានមហិច្ឆតាឈ្លាន ពានគ្នានោះឡើយមានតែការសាមគ្គីគ្នាល្អ។ជាក់ស្ដែងកន្លងទៅប្រជាពលរដ្ឋខ្មែរដែល រស់នៅក្នុងឃុំកំពង់ស្រឡៅ១ និងកំពង់ ស្រឡៅ២ បើទោះជារាប់ទសវត្សមកហើយ នៅតំបន់នោះមិនទាន់មានផ្លូវគមនាគមន៍ ទៅកាន់ឃុំទាំងពីរខាងលើ ដែលធ្វើឱ្យប្រជាពលរដ្ឋរបស់ខ្មែររស់នៅតំបន់នេះជួបលំបាក ក៏ពិតមែនតែប្រជាជនខ្មែរ ដែលនៅទីនោះតែងតែមានទំនាក់ទំនងល្អ និងរកស៊ីជាមួយប្រជាពលរដ្ឋឡាវជាប្រចាំ ។
- ទី២-សំណូមពរដល់ភាគីខាងខេត្ដចំប៉ា សាក់ ប្រទេសឡាវ ជួយផ្គត់ផ្គង់អគ្គិសនីដល់ ប្រជាពលរដ្ឋខ្មែររស់នៅក្នុងឃុំកំពង់ស្រឡៅ១ និងកំពង់ស្រឡៅ២ តាមដងទន្លេមេគង្គ លើដែលមានព្រំប្រទល់ជាប់គ្នា ដើម្បីឱ្យពល រដ្ឋខ្មែរមានលទ្ធភាពប្រើប្រាស់ភ្លើងអគ្គិសនី សំរាប់ការរស់នៅរបស់ពួកគាត់ដូចជាអ្នក ទីក្រុងដែរ ។
- ទី៣-សំណូមពរដល់ភាគីខេត្ដចំប៉ាសាក់ លើគំរោងការស្ថាបនាផ្លូវដែលតភ្ជាប់នៅ តាមបន្ទាត់ព្រំដែនទាំងពីរនៅចំណុចតំបន់មុំបី កំពង់ស្រឡៅ និងទន្លេល្ពៅ ដែលមានព្រំដែន ជាប់នឹងប្រទេសកម្ពុជា-ឡាវប្រវែង១៤០ គីឡូម៉ែត្រ ដើម្បីងាយស្រួលក្នុងការធ្វើ ដំណើរក៏ដូចជាក្នុងការធ្វើចរាចរណ៍ដឹកទំនិញ ចេញចូលទៅមករបស់ប្រជាពលរដ្ឋនាពេល ខាងមុខ។
- ទី៤-ក្នុងគោលបំណងធ្វើឱ្យខេត្ដ ព្រះវិហារ និងខេត្ដចំប៉ាសាក់មានទំនាក់ទំនង គ្នាកាន់តែល្អលើវិស័យទេសចរណ៍ និងពាណិជ្ជ កម្ម ដោយសារប្រជាពលរដ្ឋនៅតំបន់នោះ មានធនធានរួចជាស្រេចទៅហើយដូចជា វិស័យទេសចរណ៍ភាគីឡាវមានដែនកោះជា ច្រើនស្ថិតនៅតាមបណ្ដោយដងទន្លេមេគង្គ លើ។ ដោយឡែកខាងកម្ពុជាវិញ មានព្រៃ ធម្មជាតិដែលបន្សល់ទុកនៅតាមដងទន្លេ និង ទឹកធ្លាក់ធម្មជាតិល្បាក់ខោន ស្ថិតក្នុងឃុំកំពង់ ស្រឡៅ២ ព្រមទាំងផលិតផលកសិកម្មជា ច្រើនទៀតដែលប្រជាពលរដ្ឋតំបន់នោះផលិតបាន ។
- ទី៥-ភាគីបានពិភាក្សាគ្នាទៅលើសន្ដិសុខ សាធារណៈតាមព្រំដែនរួមគ្នា ដើម្បីទប់ស្កាត់ ការរត់ពន្ធថ្នាំញៀន ការជួញដូរអាវុធ គ្រឿង ផ្ទុះផ្សេងៗ និងការជួញដូរឈើឆ្លងដែនខុសច្បាប់ ។
ក្នុងកិច្ចប្រជុំនោះដែរ លោកអ៊ុំ ម៉ារ៉ា ក៏ បានលើកឡើងនូវភាពវិជ្ជមានរបស់រាជរដ្ឋាភិបាលកម្ពុជាដែលមានសម្ដេចអគ្គមហាសេនា បតីតេជោហ៊ុន សែន ជាប្រមុខដឹកនាំ គឺចង់ បានព្រំដែនមានសន្ដិភាព និងការអភិវឌ្ឍន៍ ដើម្បីជាប្រយោជន៍សំខាន់ដល់ប្រជាពលរដ្ឋ ទាំង២ប្រទេស។ លោកអ៊ុំ ម៉ារ៉ា ជំនួសមុខឱ្យ ប្រតិភូខេត្ដព្រះវិហារបានព្រមព្រៀងលើ គោលការណ៍ទាំង៥ខាងលើ ចំណែកខាង ភាគីខេត្ដចំប៉ាសាក់ប្រទេសឡាវ លោកសន សៃស៊ី ផាន់ដន ក៏បានលើកពីគោលការណ៍ សំខាន់ទាំង៥ខាងលើដើម្បីធ្វើយ៉ាងណាឱ្យ ខេត្ដទាំងពីរក្លាយទៅជាសម្ព័ន្ធមិត្ដក្នុងនាម ប្រទេសមានភូមិផងរបងតែមួយពិសេសគឺ ដើម្បីប្រយោជន៍ដល់ពលរដ្ឋប្រទេសទាំងពីរ ដូចគ្នា។
ភាគីទាំងពីរ ខេត្ដព្រះវិហារនិងខេត្ដចំប៉ា សាក់ បានធ្វើកំណត់ហេតុនៃកិច្ចប្រជុំនេះ ហើយបានសន្យាធ្វើរបាយការណ៍ដាក់ជូនទៅ រដ្ឋាភិបាលរៀងៗខ្លួនដើម្បីសុំការសំរេច។ ដោយឡែកការស្នើសុំតបណ្ដាញអគ្គិសនី លោកសនសៃ ស៊ីផាន់ដន អភិបាលខេត្ដចំប៉ា សាក់បានប្រកាសផ្ដល់ទំនុកចិត្ដដល់ភាគី កម្ពុជាថា លោកនឹងសំរេចផ្ដល់ភ្លើងអគ្គិសនី ដោយតភ្ជាប់ពីខេត្ដចំប៉ាសាក់ជូនប្រជាពលរដ្ឋ ឃុំកំពង់ស្រឡៅ១ និងឃុំកំពង់ស្រឡៅ២ ដែលរស់នៅតាមដងទន្លេមេគង្គលើដើម្បី បានប្រើប្រាស់ដោយយកតំលៃដូចប្រជាជន ឡាវដែលកំពុងប្រើប្រាស់នៅក្នុងប្រទេស ដែរ គឺក្នុង១គីឡូវ៉ាត់ថ្លៃតែ២០០រៀលប្រាក់ ខ្មែរប៉ុណ្ណោះ ។
នៅរសៀលថ្ងៃដដែល ភាគី ម្ចាស់ផ្ទះ លោកសនសៃ ស៊ីផាន់ដន បានទទួល គណៈប្រតិភូខេត្ដព្រះវិហារឱ្យស្នាក់នៅក្នុង សណ្ឋាគារក្នុងខេត្ដចំប៉ាសាក់ចំនួនពីរយប់ ក្នុង នោះក៏មានការប្រកួតកីឡាវាយកូនគោល ជាមិត្ដភាពរវាងអភិបាលខេត្ដទាំងពីរទៀតផង។ ក្នុងដំណើរទស្សនកិច្ចនេះដែរ គណៈ ប្រតិភូខេត្ដព្រះវិហារទៅទស្សនារមណីយ ដ្ឋានទឹកធ្លាក់ធម្មជាតិផាកផែងក្នុងទន្លេ មេគង្គ ប្រទេសឡាវ និងបានទៅទស្សនា ប្រាសាទវត្ដភូក្នុងទឹកដីខេត្ដចំប៉ាសាក់ និងនៅ វេលារាត្រីមានការហូបបាយសាមគ្គីពោរ ពេញទៅដោយភាពរីករាយ ។ ជុំវិញការបើក ច្រកអន្ដរជាតិ ភាគីទាំង២សង្ឃឹមទុកយ៉ាង មុតមាំថា នាថ្ងៃអនាគតប្រជាពលរដ្ឋរស់នៅ ក្នុងឃុំកំពង់ស្រឡៅ១ និងឃុំកំពង់ស្រឡៅ២ ដែលធ្លាប់តែកំសត់រាប់សតវត្សមកហើយ នោះពិតជាមានមោទនភាព និងមានក្ដី សង្ឃឹមលើជោគវាសនាអនាគតរបស់ពួក គាត់ជាក់ជាមិនខាន ៕
