ខេត្តស្វាយរៀង ៖ មានជម្លោះមួយប្រាវបានកើតឡើង រវាងអ្នកគាំទ្រក្រុមកីឡាករបាល់ទាត់ស្វាយរៀងអេហ្វស៊ី និងអ្នកគាំទ្រក្រុមកីឡាករបាល់ទាត់ភ្នំពេញក្រោន ខណៈកំពុងប្រកួតនៅចុងម៉ោងប្រមាណជា៥នាទីចុងក្រោយ
ខេត្តស្វាយរៀង ៖ មានជម្លោះមួយប្រាវបានកើតឡើង រវាងអ្នកគាំទ្រក្រុមកីឡាករបាល់ទាត់ស្វាយរៀងអេហ្វស៊ី និងអ្នកគាំទ្រក្រុមកីឡាករបាល់ទាត់ភ្នំពេញក្រោន ខណៈកំពុងប្រកួតនៅចុងម៉ោងប្រមាណជា៥នាទីចុងក្រោយ ស្រាប់តែផ្ទុះជម្លោះឈ្លោះប្រកែកគ្នារហូតបង្កហិង្សាវាយតប់គ្នាធ្វើឲ្យផ្អើលពេញទីលានកីឡដ្ឋានខេត្ត ហើយកីឡាករទាំងពីរក្រុមដែលកំពុងប្រកួតនោះ ក៏រត់ចេញពីទីលានប្រកួតដើម្បីទៅជួយគ្នា ភ្លាមៗនោះ លោកអាជ្ញាកណ្តាលក៏ប្រកាសបិទការប្រកួតមុនម៉ោងតែម្តង កាលពីវេលាម៉ោង៧និង៤០នាទីយប់ថ្ងៃទី៥ សីហា ២០១៥ នៅទីលានកីឡដ្ឋានខេត្ត ស្ថិតនៅភូមិមេភ្លើង សង្កាត់ស្វាយរៀង ក្រុងស្វាយរៀង ។ លទ្ធផលនៃការប្រកួត គឺក្រុមភ្នំពេញក្រោន ឈ្នះ ក្រុមស្វាយរៀងអែហ្វស៊ី (៣ទល់១) ។
មន្ត្រីកងរាជអាវុធហត្ថខេត្ត បានឲ្យដឹងថា ការប្រកួតបាល់ទាត់ រវាងក្រុមខ្លាំងទាំង២ គឺម្ចាស់ផ្ទះស្វាយរៀងអែហ្វស៊ី និងក្រុមជើងឯកភ្នំពេញក្រោន ក្នុងការប្រកួតចុងក្រោយប្រចាំជុំទី១ នៃពានរង្វាន់បាល់ទាត់ក្របខ័ណ្ឌមិត្តហ្វូនខេមបូឌានលីក ២០១៥ នៅល្ងាចថ្ងៃទី៥ សីហា កន្លងទៅនេះ លើទីលានកីឡដ្ឋានខេត្តស្វាយរៀង ។
យោងតាមព័ត៌មានបឋមពីអ្នកគាំទ្រម្នាក់នៅទីលានប្រកួតផ្ទាល់ បាននិយាយថា ហេតុការណ៍កើតចេញពីការឌឺដងដាក់គ្នាពីក្រុមភ្ញៀវភ្នំពេញក្រោន ក្រោយពេលក្រុមខ្លួនទាត់បាល់បញ្ចូលទីក្រុមម្ចាស់ផ្ទះស្វាយរៀងអែហ្វស៊ីបាន១គ្រាប់ក្នុងតង់ទី១ ឯក្រុមកីឡាករម្ចាស់ផ្ទះក៏ស៊ុតចូលបាន១គ្រាប់វិញដែរ ។
ចូលតង់ទី២ ក្រុមកីឡាករភ្នំពេញក្រោនបានស៊ុតបញ្ចូលទីបន្ថែម២គ្រាប់ទៀត ធ្វើឱ្យអ្នកគាំទ្រក្រុមភ្នំពេញក្រោន ស្រែកហ៊ោកញ្ច្រៀវ និងនិយាយឌឺដងវាយប្រហារពាក្យសម្តីទៅអ្នកគាំទ្រក្រុមកីឡាករស្វាយរៀង ទើបផ្ទុះជាជម្លោះរហូតឈានដល់ប្រើអំពើហិង្សាតែម្តង ត្រូវបានកងរាជអាវុធហត្ថឈរការពារជួយអន្តរាគមន៍ទាន់ពេល ៕
ព័ត៌មានពិស្តារមានផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ