រាជធានីភ្នំពេញ ៖ អតីតតារាចំរៀង និងសំដែងលោកអ៊ែនឌី បានបើករថយន្តបញ្ច្រាសផ្លូវទៅបុកម៉ូតូមួយគ្រឿង បណ្តាលឱ្យអ្នកជិះម៉ូតូរងរបួសធ្ងន់បាក់ជើងខាងស្តាំ ចំណែកឯម៉ូតូ និងរថយន្តខូចខាតផ្នែកខាងមុខ ទាំង២ បង្កឱ្យមានការភ្ញាក់ផ្អើលកាលពីវេលាយប់ថ្ងៃទី៣១ កក្តដា ២០១៥ តាមបណ្តោយផ្លូវលេខ៦៣ទល់មុខហាងផឹកស៊ី Happiness ស្ថិតក្នុងសង្កាត់ចតុមុខ ខណ្ឌដូនពេញ ។
រថយន្តបង្កម៉ាក Toyota Camry ហាយប្រីដ ពណ៌ស្ករ ស៊េរីឆ្នាំ២០០៧ ពាក់ស្លាកលេខភ្នំពេញ 2R-2582 បើកបរដោយតារាចំរៀង និងសំដែងលោកអេនឌី ចំណែកឯជនរងគ្រោះមិនបានស្គាល់អត្តសញ្ញាណទេភេទប្រុស អាយុប្រហែល២៤ឆ្នាំ ជិះម៉ូតូមួយគ្រឿងម៉ាក SUZUKI VIVA 125 ពណ៌ទឹកប៊ិចពាក់ស្លាកលេខ រដ្ឋ17 1-1381 ។
តាមសាក្សីដែលបានឃើញហេតុការណ៍បានឱ្យដឹងថា មុនពេលកើតហេតុរថយន្តបង្កដែលបើកបរដោយលោកអ៊េនឌី បានបើកក្នុងទិសដៅពីជើងទៅត្បូង តែដោយសារផ្លូវលេខ៦៣ជាផ្លូវឯកទិស គេអនុញ្ញាតឱ្យបើកបរតែក្នុងទិសដៅពីត្បូងជើងទើបបណ្តាលឱ្យម៉ូតូជនរងគ្រោះដែលបើកក្នុងល្បឿនលឿនគួរសមផងនោះខ្វះការប្រុងប្រយត្ន័បានបុកពេញទំហឹងជាមួយរថយន្តរបស់លោកអ៊ែនឌីតែម្តងទៅ ។
តែទោះជាយ៉ាងណាក៏ដោយអ្នកដែលបានឃើញហេតុការណ៍ផ្ទាល់បានរិះគន់លោកអ៊ែនឌីថា បើកបរមិនគោរពច្បាប់ចរាចរទើបបណ្តាលឱ្យមានគ្រោះថ្នាក់នេះកើតឡើង ។ គួរកត់សំគាល់ផងដែរថា ក្រោយពីបុកគ្នាអស់រយៈពេលជិតមួយម៉ោងហើយនៅមិនទាន់ឃើញខាងកំលាំងសម្ថកិច្ចមូលដ្ឋានចុះមកធ្វើការវាស់វែងទៀត ។
ក្រោយពេលកើតហេតុខាងជនរងគ្រោះត្រូវបានរថយន្តសង្គ្រោះបញ្ចូនទៅព្យាបាលនៅមន្ទីរពេទ្យ ចំណែកឯរថយន្ត និងម៉ូតូត្រូវបានគេវាស់វែង និងយកទៅរក្សាទុកនៅការិយាល័យចរាចរផ្លូវគោករាជធានីដើម្បីធ្វើការដោះស្រាយនៅពេលក្រោយ ៕
ចែករំលែកព័តមាននេះ