ខេត្តបន្ទាយមានជ័យ ៖ មនុស្សម្នាក់បានស្លាប់ និង២នាក់ផ្សេងទៀតរបួសធ្ងន់-ស្រាល កាលពីវេលាម៉ោងជិត៩យប់ ថ្ងៃទី២៦ ខែកក្កដា ឆ្នាំ២០១៥ លើដងផ្លូវជាតិលេខ៥ ស្ថិតក្នុងភូមិអូរជ្រៅ សង្កាត់-ក្រុងប៉ោយប៉ែត ដោយរថយន្តឡិចស៊ីស RX 300 បុកម៉ូតូក្នុងដំណើរស្របទិសគ្នា ។
ជនរងគ្រោះក្នុងហេតុការណ៍មាន ១-ឈ្មោះ ជា សីហា ភេទប្រុស អាយុ១៦ឆ្នាំ រស់នៅភូមិបាលិលេយ្យ១ សង្កាត់-ក្រុងប៉ោយប៉ែត រងរបួសធ្ងន់, ២-ឈ្មោះ ឡុង សៀវឡែន ភេទស្រី អាយុ១៤ឆ្នាំ រស់នៅភូមិបាលិលេយ្យ១ សង្កាត់-ក្រុងប៉ោយប៉ែត រងរបួសស្រាល និង៣-ឈ្មោះ ហេង សៀវម៉ី ភេទស្រី អាយុ១៦ឆ្នាំ រស់នៅភូមិក្បាលកោះ សង្កាត់-ក្រុងប៉ោយប៉ែត ស្លាប់ ។
ប្រភពពីកន្លែងកើតហេតុបានឲ្យដឹងថា មុនហេតុការណ៍កើតឡើង ជនរងគ្រោះទាំង៣នាក់ជិះម៉ូតូម៉ាកឃ្លីក ពណ៌ក្រហម ស៊េរីឆ្នាំ២០១៤ បើកបរដោយឈ្មោះ ជា សីហា ពីលិចទៅកើត ស្រាប់តែត្រូវរថយន្តម៉ាកឡិចស៊ីស RX 300 ពណ៌ខ្មៅ ស៊េរីឆ្នាំ២០០១ ចង្កូតឆ្វេង ពាក់ស្លាកលេខ ភ្នំពេញ ២L-៧១៥៥ បើកបរដោយឈ្មោះ ជីម សាវ័ន្ត មុខរបរជាងដេរ មានទីលំនៅភូមិបាលិលេយ្យ២ សង្កាត់-ក្រុងប៉ោយប៉ែត ដែលបោះពួយលឿនស្របទិសគ្នាបុកពីក្រោយ បណ្ដាយឲ្យជនរងគ្រោះរបួសធ្ងន់-ស្រាលរដូករណែលតែម្ដង ។
ជនរងគ្រោះទាំង៣នាក់ត្រូវបញ្ជូនទៅព្យាបាលនៅមន្ទីរពេទ្យបង្អែកក្រុងប៉ោយប៉ែត ក្រោយពេលកើតហេតុ ដោយឡែកឈ្មោះ ហេង សៀវម៉ី ដោយសាររបួសធ្ងន់ធ្ងរពេកក៍ត្រូវសាច់ញាតិធ្វើការបញ្ជូនទៅព្យាបាលនៅមន្ទីរពេទ្យក្នុងខេត្តស្រះកែវ ប្រទេសថៃ តាមច្រកទ្វារអន្តរជាតិប៉ោយប៉ែត នៅម៉ោងជិត១១យប់ថ្ងៃដដែល ប៉ុន្តែជាអកុសលជនរងគ្រោះបានដាច់ខ្យល់ស្លាប់នៅមន្ទីរពេទ្យប្រទេសថៃ ហើយត្រូវសាច់ញាតិបញ្ជូនសពត្រឡប់មកវិញនៅព្រឹកថ្ងៃទី២៧នេះដើម្បីធ្វើបុណ្យតាមប្រពៃណី ។
ដោយឡែកយានយន្តពាក់ព័ន្ធត្រូវបានសមត្ថកិច្ចនាំយកទៅរក្សាទុកនៅអធិការនគរបាលក្រុងប៉ោយប៉ែត បន្ទាប់ពីធ្វើការវាស់វែងរួច ។
លោក សៅ សារឿន នាយផ្នែកនគរបាលចរាចរណ៍សណ្ដាប់ធ្នាប់សាធារណះក្រុងបានប្រាប់តាមទូរស័ព្ទថា អ្នកបើកបររថយន្តបង្កត្រូវបានកសាងសំណុំរឿងបញ្ជូនទៅតុលាការ ដើម្បីចាត់ការតាមនិតិវិធីច្បាប់ ព្រោះបើកបរល្បឿនលឿនពេលយប់ មិនគោរពច្បាប់ចរាចរណ៍ផ្លូវគោកថ្មីត្រង់មាត្រា១៧ជំពូកទី៣ ៕
ចែករំលែកព័តមាននេះ