រាជធានីភ្នំពេញ ៖ ស្ដ្រីរុញរទេះអ្នកលក់នំគ្រក់ចល័តតាមផ្លូវម្នាក់ បានខឹងសម្បារយ៉ាងខ្លាំងជាមួយក្រុមសន្តិសុខសណ្ដាប់ធ្នាប់ខណ្ឌសែន សុខដែលបានចាប់រទេះរបស់គាត់ ដាក់លើរថយន្តទាំងកំរោលដោយគ្មានក្ដីមេត្តា គ្រាន់តែគាត់ចតរទេះខ្ចប់នំគ្រក់ឱ្យអ្នកទិញមួយភ្លែត
រាជធានីភ្នំពេញ ៖ ស្ដ្រីរុញរទេះអ្នកលក់នំគ្រក់ចល័តតាមផ្លូវម្នាក់ បានខឹងសម្បារយ៉ាងខ្លាំងជាមួយក្រុមសន្តិសុខសណ្ដាប់ធ្នាប់ខណ្ឌសែន សុខដែលបានចាប់រទេះរបស់គាត់ ដាក់លើរថយន្តទាំងកំរោលដោយគ្មានក្ដីមេត្តា គ្រាន់តែគាត់ចតរទេះខ្ចប់នំគ្រក់ឱ្យអ្នកទិញមួយភ្លែត នៅលើចិញ្ចើមផ្លូវលេខ២៧១ នៅចំណុចមុខខារ៉ាអូខេញូវស្តារ ក្នុងភូមិត្រពាំងឈូក សង្កាត់ទឹកថ្លា ខណ្ឌសែនសុខ នៅវេលាម៉ោង៣និង៣០នាទីរសៀលថ្ងៃទី២៣ កក្កដា ។
ដោយសារតែ កំហឹង ស្ដ្រីអ្នកលក់នំគ្រក់បានចាប់ទាញយកម៉ូតូ ពីសន្តិសុខសណ្ដាប់ធ្នាប់បាន១គ្រឿងយកមកផ្ដួល នៅលើទ្រូងផ្លូវរួចជាន់ឈរពីលើនិងគម្រាមដុតម៉ូតូនេះចោល ប្រសិនបើក្រុមសណ្ដាប់ធ្នាប់មិនយករទេះរុញមកប្រគល់ឱ្យគាត់វិញទេ ។
រឿងរ៉ាវ ដែលមិនធ្លាប់កើតមាននេះធ្វើឱ្យមានការស្ទះចរាចរណ៍ប្រមាណជិត២ ម៉ោងផងដែរ លើកំណាត់ផ្លូវដ៏មមាញឹកនេះ ។ ហេតុការណ៍ដ៏កម្រមាននេះ ធ្វើឱ្យប៉ូលិសមូលដ្ឋានចុះមកអន្តរាគមន៍ដែរ តែស្ដ្រីរូបនេះមិនយល់ព្រមទេប្រហែលជាដល់ក លែងខ្លាចអ្វីទាំងអស់ ដោយស្រែកខ្លាំងៗថា អយុត្តិធម៌ណាស់ ធ្វើបាបតែអ្នកទន់ខ្សោយក្រីក្រ ចំណែកឯអ្នកលក់និងតាំងសម្ភារគ្រឿងបន្លាស់ម៉ូតូ នៅមុខខារ៉ាអូខេលើចិញ្ចើមថ្នល់ពីព្រឹកទល់ល្ងាច ហេតុអីសន្តិសុខសណ្ដាប់ធ្នាប់មិនចាប់និងដេញផង ។ រឿងអីមកដេញ និងចាប់តែរទេះរុញចល័តបែបនេះ? ការប្រឈមមុខដាក់គ្នានោះ រហូតដល់មន្ត្រីសាលាខណ្ឌសែនសុខលោក សាវុធ មកធ្វើការសម្របសម្រួលទើបស្ដ្រីនេះយល់ព្រមចុះពីលើម៉ូតូ និងជិះម៉ូតូឌុបទៅបុសិ៍្ដប៉ូលិសទឹកថ្លាដើម្បីធ្វើការដោះស្រាយ ។
ស្ដ្រី លក់នំគ្រក់ឈ្មោះ ថោង សុធារី អាយុ២៨ឆ្នាំ ស្នាក់នៅផ្ទះជួលភូមិត្រពាំងឈូក សង្កាត់ទឹកថ្លា ខណ្ឌសែនសុខ ។ មុនកើតហេតុគាត់បានអូសរទេះដើរលក់នំគ្រក់ដូចរាល់ថ្ងៃតាមបណ្ដោយ ផ្លូវលេខ២៧១ ពីជើងទៅត្បូង ។ លុះមកដល់ចំណុចខាងលើក៏មានអ្នកទិញ ហៅឱ្យគាត់ដាក់នំគ្រក់មួយចានដើម្បីហូប ។ ពេលស្ដ្រីរូបនេះដើរយកនំគ្រក់ទៅឱ្យភ្ញៀវ ដោយដាក់រទេះនំគ្រក់នៅលើចិញ្ចើមផ្លូវ ពេលនោះមានសន្តិសុខសាលាខណ្ឌសែនសុខមួយក្រុមជិះរថយន្ត និងម៉ូតូរៀបចំសណ្ដាប់ធ្នាប់តាមបណ្ដោយផ្លូវលេខ២៧១ មកដល់ល្មម ឃើញរទេះនំគ្រក់ចតនៅលើចិញ្ចើមផ្លូវ អត់និយាយមួយម៉ាត់ដូចផ្តាច់ការពេក ក៏នាំគ្នាលើករទេះនោះដាក់លើរថយន្ត បំណងយកទៅសាលាខណ្ឌដើម្បីព្រមាន ហើយក៏មានការប្រទាញប្រទង់គ្នាជាមួយក្រុមសន្តិសុខ ប៉ុន្តែ កម្លាំងនាងមិនឈ្នះសន្តិសុខប្រុសៗទេ ។ ចំណែកក្រុមសន្តិសុខសណ្ដាប់ធ្នាប់ នៅតែយករទេះរបស់គាត់ដាក់លើរថយន្តទាល់តែបានធ្វើឱ្យកំពប់ខ្លាញ់ និងនំគ្រក់ថែមទៀត ទើបផ្ទុះកំហឹងខឹងសម្បារពីសំណាក់ស្ដ្រីលក់នំគ្រក់នេះកាន់តែខ្លាំង ។
នៅប៉ុស្តិ៍រដ្ឋបាលទឹកថ្លាប៉ូលិសបានធ្វើកំណត់ហេតុជាមួយ ស្ដ្រីលក់នំគ្រក់ និងជាមួយលោកធា សាវុធជាមន្ត្រីសាលាខណ្ឌសែនសុខ តាមបញ្ជារបស់លោក លី សាវេតអភិបាលខណ្ឌ ។ ជាមួយគ្នានោះស្ដ្រីអ្នកលក់នំគ្រក់បានសំណូមពរចំនួន៣ឱ្យអាជ្ញាធរ គឺសុំរទេះរុញនិងសម្ភារលើរទេះ នឹងសូមឱ្យអាជ្ញាធរជួយសងសម្ភារដែលខូចខាត ។ ក្រោយពីធ្វើកំណត់ហេតុចប់អាជ្ញាធរបានប្រគល់រទេះរុញឱ្យស្ដ្រីខាងលើ វិញ ថែមទាំងជូនប្រាក់ចំនួន១០ម៉ឺនរៀលបន្ថែមទៀត នៅល្ងាចថ្ងៃដដែលនោះសងថ្លៃការខូចខាត ។
ជុំវិញករណីកង សន្តិសុខសណ្ដាប់ធ្នាប់ប្រព្រឹត្តអំពើមិនគប្បី មកលើស្ដ្រីលក់នំគ្រក់ដ៏កំសត់ម្នាក់នេះ លោក លី សាវេត អភិបាលខណ្ឌសែនសុខបានសម្ដែងការសោកស្ដាយយ៉ាងខ្លាំង ចំពោះទង្វើរបស់ក្រុមសន្តិសុខសណ្ដាប់ធ្នាប់ក្រោមឱវាទរបស់លោក ដែលមិនគួរធ្វើបែបនេះចំពោះប្រជាពលរដ្ឋនោះទេ ។
លោកបញ្ជាក់ ថា ការចុះទៅរៀបចំសណ្ដាប់ធ្នាប់របស់ក្រុមសន្តិសុខ គ្មានការបញ្ជាពីថ្នាក់ដឹកនាំសាលាខណ្ឌនោះទេ គឺធ្វើដោយចិត្តឯង ។ ដូចនេះលោកបានព្រមានចំពោះមន្ត្រីសណ្ដាប់ធ្នាប់ម្នាក់ ជាអ្នកដឹកនាំទៅធ្វើបែបនេះ និងបញ្ឈរជើង ព្រោះកន្លងមកមន្ត្រីដឹកនាំសណ្ដាប់ធ្នាប់ម្នាក់នេះបានបង្កបញ្ហា ធ្វើឱ្យថ្នាក់ដឹកនាំខណ្ឌសែនសុខឈឺក្បាលមិនតិចទេ ពេលកន្លងមក ៕
ចែករំលែកព័តមាននេះ