ខេត្តបាត់ដំបង ៖ រយៈពេលជាងមួយឆ្នាំចុងក្រោយនេះ នៅក្នុងក្រុងបាត់ដំបង គេសង្កេតឃើញក្រុមឈ្មួញដែលមានគ្រឿងចក្របានបង្កើននូវសកម្មភាពជីកកាយយកអាចម៍ដីលក់យ៉ាងគគ្រឹកគគ្រេងស្ទើរគ្រប់ទីកន្លែង ពិសេសនៅក្បែរលំនៅឋានរបស់អ្នកភូមិ ដែលមានរណ្ដៅជ្រៅៗស្ទើរមើលឃើញក្បាលប្រែត
ខេត្តបាត់ដំបង ៖ រយៈពេលជាងមួយឆ្នាំចុងក្រោយនេះ នៅក្នុងក្រុងបាត់ដំបង គេសង្កេតឃើញក្រុមឈ្មួញដែលមានគ្រឿងចក្របានបង្កើននូវសកម្មភាពជីកកាយយកអាចម៍ដីលក់យ៉ាងគគ្រឹកគគ្រេងស្ទើរគ្រប់ទីកន្លែង ពិសេសនៅក្បែរលំនៅឋានរបស់អ្នកភូមិ ដែលមានរណ្ដៅជ្រៅៗស្ទើរមើលឃើញក្បាលប្រែត ជាហេតុធ្វើឲ្យប្រជាពលរដ្ឋមានការព្រួយបារម្ភយ៉ាងខ្លាំងអំពីសុវត្ថិភាពកូនចៅរបស់ខ្លួន ខណៈស្ថាប័នពាក់ព័ន្ធ ឬអាជ្ញាធរគ្មានវិធានការទប់ស្កាត់ ឬគិតគូរអំពីសុខទុក្ខរបស់ប្រជាពលរដ្ឋឡើយ ។
ទីតាំងរណ្ដៅដីធំៗដែលក្រុមឈ្មួញកំពុងធ្វើសកម្មភាពយ៉ាងគគ្រឹកគគ្រេងនាពេលបច្ចុប្បន្នភាគច្រើនគឺស្ថិតមិនឆ្ងាយពីផ្ទះអ្នកភូមិរស់នៅទេ ។ ជាក់ស្ដែងដូចជារណ្ដៅដីរបស់ដង្ខៅគ្រឿងចក្រឈ្មោះ ហេង អេង នៅក្នុងភូមិច្រាបក្រសាំង ក្នុងសង្កាត់វត្តគរ ក្រុងបាត់ដំបង ដែលមានទំហំប្រហែលជាងមួយហិចតាដី និងមានជម្រៅលើសពីច្បាប់កំណត់ និងរណ្ដៅដីធំៗចំនួន៣កន្លែងទៀតរបស់ដង្ខៅគ្រឿងចក្ររបស់ឈ្មោះ ថា និងឈ្មោះ រីណា ជាមន្ត្រីមន្ទីរសាធារណៈការ និងដឹកជញ្ជូនខេត្ត នៅក្នុងឃុំអន្លង់វិល ស្រុកសង្កែ ។ល។
ក្រុមឈ្មួញដឹកជញ្ជូនដីលក់ទាំងនេះសុទ្ធតែបានអះអាងថា ពួកគេមានច្បាប់ធ្វើអាជីវកម្មត្រឹមត្រូវពីមន្ទីររ៉ែ និងថាមពលខេត្ត ប៉ុន្តែសកម្មភាពជីកយកដីជាក់ស្ដែងរបស់ពួកគេ គឺមិនបានអនុវត្តទៅតាមច្បាប់អនុញ្ញាតិនោះទេ រីឯខាងមន្ទីរជំនាញ ឬអាជ្ញាធរមូលដ្ឋានក៏មិនដែលអើពើនឹងសកម្មភាពបំពានច្បាប់របស់ក្រុមឈ្មួញជីកកាយដីនេះដែរ បើទោះជាប្រជាពលរដ្ឋប្រតិកម្មជាបន្តបន្ទាប់ក្ដី ។
មន្ត្រី នៃមន្ទីររ៉ែ និងថាមពលខេត្តម្នាក់បានទទូលស្គាល់ និងនិយាយអំពីច្បាប់ថា ច្បាប់បានអនុញ្ញាតិឲ្យប្រើគ្រឿងចក្រជីករណ្ដៅយកអាចម៍ដីលក់ជម្រៅត្រឹមតែ៥ម៉ែត្រប៉ុណ្ណោះ ប៉ុន្តែជាក់ស្ដែងពួកឈ្មួញតែងតែបំពានច្បាប់កាយជ្រៅរហូតដល់រាប់សិបម៉ែត្រឯណោះ នេះបានបង្ហាញអំពីការបំពានច្បាប់អនុញ្ញាតិទាំងស្រុង ។ មន្ត្រីរូបនោះបន្តថា ថ្នាក់ដឹកនាំក៏ដូចជាមន្ត្រីខិលខូចក្នុងមន្ទីរមួយចំនួនកំពុងត្រេកត្រអាលនឹងប្រាក់សំណូកទាំងនេះ ដោយមិនខ្វល់អំពីច្បាប់ទម្លាប់ ឬផលប៉ះពាល់ដល់ប្រជាពលរដ្ឋដែលរស់នៅក្បែរទីតាំងរណ្ដៅដីទាំងនោះឡើយ ។
មន្ត្រីដែលសុំមិនបញ្ចេញឈ្មោះរូបនេះបញ្ជាក់ថា ប្រជាពលរដ្ឋដែលកំពុងភិតភ័យនឹងរណ្ដៅដីជម្រៅស្ទើរឃើញក្បាលប្រែត តែងតែត្អូញត្អែរអំពីកង្វល់របស់ខ្លួនរាល់ថ្ងៃ តែមិនត្រូវបានមន្ទីរជំនាញ អាជ្ញាធរ ឬពួកឈ្មូញជីកដីទាំងនោះយកចិត្តទុកដាក់ទេ ជាពិសេសពលរដ្ឋដែលរស់នៅក្បែររណ្ដៅដីរបស់ដង្ខៅគ្រឿងចក្រ ហេង អេង នៅភូមិច្រាបក្រសាំង សង្កាត់វត្តគរ តែម្ដង ។
លោក ហេង អេង ដែលគេស្គាល់ថា ជាដង្ខៅគ្រឿងចក្រមានអាជីពកាយដីលក់ចាស់វស្សាជាងគេនៅក្នុងខេត្តបាត់ដំបង បានប្រតិកម្មជាមួយអ្នកសារព័ត៌មាននៅពេលថ្មីៗនេះ ដែលបានលើកឡើងអំពីច្បាប់ដូច្នេះថា ច្បាប់តម្រូវឲ្យជីកជម្រៅតែ៥ម៉ែត្រទេ តែបើរវល់តែគោរពច្បាប់ ប្រទេសគ្មានការជឿនលឿនទេ ។ គាត់ពន្យល់ថា តើឃើញទេ… នៅក្នុងខេត្តសព្វថ្ងៃកំពុងមានការរីកចម្រើន? មានផ្ទះថ្ម ផ្លូវថ្នល់… នេះគឺដោយសារលោកដឹកដីយកទៅចាក់ ។ ប៉ុន្តែនៅពេលសួរថា តើដីចាក់ធ្វើផ្លូវថ្នល់ ឬចាក់ធ្វើផ្ទះទាំងនោះ ជាវិភាគរបស់លោកឬ ? លោកដង្ខៅ អេង ឆ្លើយតបយ៉ាងរហ័សថា «ទេ… អត់ទេ គឺដីខ្ញុំលក់» ។
គេមិនដឹងថា ការលើកឡើងអំពីច្បាប់របស់ថៅកែគ្រឿងចក្រលោក ហេង អេង ខាងលើ គឺជាការត្រឹមត្រូវកម្រិតណានោះទេ ហើយក៏មិនដឹងថា គាត់សំអាងទៅលើក្បួនច្បាប់អ្វីដែរ ។ ប៉ុន្តែអ្វីដែលលោក ហេង អេង បានលើកឡើងជាហូរហែខាងលើនេះ គឺបានបង្ហាញយ៉ាងច្បាស់ថា ក្រុមឈ្មួញដែលកំពុងប្រើគ្រឿងចក្រធ្វើសកម្មភាពជីកកាយយកអាចម៍ដីលក់ទាំងនេះ គឺមិនបានគិតគូរអំពីច្បាប់ទម្លាប់ ឬអំពីផលប៉ះពាល់ដល់ប្រជាពលរដ្ឋនោះទេ ។ រីឯអាជ្ញាធរ ឬស្ថាប័នពាក់ព័ន្ធនានាគ្មានវិធានការទប់ស្កាត់ ឬចំណាត់ការបែបណាតាមផ្លូវច្បាប់ឡើយ ដេកសម្ងំស្ងៀមចាំទទូលតែសំណែនប៉ុណ្ណោះ ។
កោះសន្តិភាពមិនអាចសុំការបកស្រាយពីថ្នាក់ដឹកនាំ នៃមន្ទីររ៉ែ និងថាមពលខេត្តបានទេជុំវិញបញ្ហាខាងលើនេះ ដោយសារតែនៅព្រឹកថ្ងៃទី២០ កក្កដា ២០១៥នេះ មន្ទីររ៉ែ និងថាមពលខេត្ត មានរៀបចំពិធីប្រកាសផ្លាស់ប្ដូរតំណែងប្រធានមន្ទីរថ្មី ។ ពិធីប្រកាសផ្លាស់ប្ដូរប្រធានមន្ទីរថ្មីនេះ គឺលោក អ៊ាន មាឃ ត្រូវបានតែងតាំងជាប្រធានមន្ទីរថ្មី ជំនួសលោក ជឺ ឈៀង ដែលត្រូវប្រកាសឲ្យចូលនិវត្តន៍ ។
ជាមួយនឹងពិធីប្រកាសផ្លាស់ប្ដូរតំណែងប្រធានមន្ទីររ៉ែ និងថាមពលខេត្តនេះ គេសង្កេតឃើញមានការចូលរួមពីមន្ត្រីរាជការមកពីគ្រប់ស្ថាប័ន ប៉ុន្តែក៏មានមុខមេឈ្មួញជីកកាយដីស្ទើរគ្រប់រូបចូលរួមទះដៃអបអរសាទរផងដែរ ។
ជាមួយនឹងការផ្លាស់ប្ដូរមេដឹកនាំថ្មី នៃមន្ទីររ៉ែ និងថាមពលខេត្ត ក្រោយអធិបតីភាពលោកស៊ុយ សែម រដ្ឋមន្ត្រីក្រសួងរ៉ែ និងថាមពលនេះ ប្រជាពលរដ្ឋក៏ដូចជាមន្ត្រីនានានៅក្នុងខេត្តរំពឹងថា លោក អ៊ាន មាឃ ដែលទើបចូលកាន់ដំណែងថ្មីនឹងធ្វើឲ្យមានការប្រសើរឡើងនូវច្បាប់ទម្លាប់នានា ដែលពាក់ព័ន្ធនឹងការធ្វើអាជីវកម្មបំពានច្បាប់ ជាពិសេសសកម្មភាពបំពានច្បាប់នៃក្រុមឈ្មួញកាយដីតែម្ដង ។
ម្យ៉ាងវិញទៀត សកម្មភាពបំពានច្បាប់ ឬការបកស្រាយអំពីហេតុផលនានារបស់ដង្ខៅគ្រឿងចក្រ និងទុក្ខកង្វល់របស់ប្រជាពលរដ្ឋ ដែលកំពុងប្រឈមនឹងហានិភ័យជាមួយនឹងរណ្ដៅដីជ្រៅស្ទើរមើលឃើញក្បាលប្រែតខាងលើនេះ គឺជាសារមួយដែលបន្សល់ទុកពីលោកប្រធានចាស់ជូនលោកប្រធានថ្មី ដើម្បីជួយធ្វើការកែលំអរ ។ ហើយសង្ឃឹមថា លោកប្រធានដែលទើបចូលកាន់តំណែងថ្មីនឹងមានវិធានការថ្មីតាមផ្លូវច្បាប់ មិនផ្ដេកផ្ដូលរមួលសំគ្រេចជាមួយក្រុមឈ្មួញជីកដីលក់បំពានច្បាប់ខាងលើនេះឡើយ ៕
ចែករំលែកព័តមាននេះ