រាជធានីភ្នំពេញ ៖ ម៉ូតូធំ១គ្រឿងដែលបានបាត់ជាង១ខែមកហើយ ត្រូវបានម្ចាស់ប្រទះឃើញដោយចៃដន្យ និងស្គាល់ភិនភាគនៅពេលដែលបុរស២នាក់បានជិះមកអង្គុយផឹកកាហ្វេក្នុងហាងមួយកន្លែងដោយប្តូរស្លាកលេខនោះ
រាជធានីភ្នំពេញ ៖ ម៉ូតូធំ១គ្រឿងដែលបានបាត់ជាង១ខែមកហើយ ត្រូវបានម្ចាស់ប្រទះឃើញដោយចៃដន្យ និងស្គាល់ភិនភាគនៅពេលដែលបុរស២នាក់បានជិះមកអង្គុយផឹកកាហ្វេក្នុងហាងមួយកន្លែងដោយប្តូរស្លាកលេខនោះ ក៏បានធ្វើការឃាត់ខ្លួនទាំងម៉ូតូ និងមនុស្សយកទៅប្រគល់ឱ្យកម្លាំងនគរបាលប៉ុស្តិ៍ទួលស្វាយព្រៃទី១ផងដែរ ។
ករណីនេះបានកើតឡើងកាលពីវេលាម៉ោង២ និង៤៥នាទីរសៀល ថ្ងៃទី២ កក្កដា ២០១៥ នៅចំណុចខាងមុខហាងកាហ្វេមួយកន្លែងដែលស្ថិតនៅផ្ទះលេខ៣៣CEo ផ្លូវលេខ១៩៣ កែងផ្លូវលេខ៣៤៨ ក្នុងសង្កាត់ទួលស្វាយព្រៃទី១ ខណ្ឌចំការមន ។
តាមប្រភពព័ត៌មានពីមន្ត្រីនគរបាលបានប្រាប់ឱ្យដឹងថា មុនពេលមានការភ្ញាក់ផ្អើលនេះបុរសម្នាក់ដែលមានឈ្មោះរុន ភារៈ អាយុ២១ឆ្នាំ មានទីលំនៅផ្ទះលេខ១៦១ ផ្លូវជាតិលេខ១ ភូមិវាលស្បូវ សង្កាត់វាលស្បូវ ខណ្ឌច្បារអំពៅ ដែលជាម្ចាស់ម៉ូតូធំ១គ្រឿងម៉ាកR15 ពណ៌ខ្មៅ មានស្លាកលេខ ភ្នំពេញ ១DD-១៥១៥ ត្រូវបានចោរលួចបាត់ជាងមួយខែមកហើយនៅក្នុងសង្កាត់បឹងទំពុន ខណ្ឌមានជ័យ ។ ទើបតែបានប្រទះឃើញម៉ូតូរបស់ខ្លួនដោយចៃដន្យនៅពេលធ្វើដំណើរតាមផ្លូវ ដែលត្រូវបានប្តូរស្លាកលេខទៅជា ភ្នំពេញ ១CN-៨៤០១ វិញនោះ តែដោយសារការចំណាំភិនភាគនោះ ក៏បាននាំគ្នាធ្វើការឃាត់ទាំងម៉ូតូ និងបុរស២នាក់យកទៅប្រគល់ឱ្យកម្លាំងនគរបាលប៉ុស្តិ៍ផងដែរ ។
បុរសទាំង២នាក់ដែលបានឃាត់ខ្លួនមាន ទី១-ឈ្មោះធឿន ហ៊ុយ អាយុ២២ឆ្នាំ មុខរបរជាងជួសជុលរថយន្ត មានទីលំនៅក្នុងសង្កាត់ស្វាយប៉ាក ខណ្ឌឫស្សីកែវ (ដែលបានអះអាងថាជាម្ចាស់ម៉ូតូដែលទើបតែនឹងទិញ) និងទី២-ឈ្មោះសុគន្ធ អាយុ២១ឆ្នាំ មានទីលំនៅក្នុងសង្កាត់ផ្សារថ្មីទី១ ខណ្ឌដូនពេញ ជាអ្នករួមដំណើរ ត្រូវបានកម្លាំងនគរបាលនាំខ្លួនមកធ្វើកំណត់ហេតុផងដែរ ។
ក្រោយពីធ្វើកំណត់ហេតុរួចហើយកម្លាំងនគរបាលប៉ុស្តិ៍ទួលស្វាយព្រៃក៏បានធ្វើការបញ្ជូនបុរសទាំង២នាក់ រួមជាមួយនឹងម៉ូតូធំ១គ្រឿងនោះទៅកាន់ប៉ុស្តិ៍បឹងទំពុន ដែលជាកន្លែងដែលជនរងគ្រោះបានដាក់ពាក្យបណ្តឹង ដើម្បីធ្វើការសាកសួរ និងស្រាវជ្រាវជាបន្តទៅទៀត ៕
ចែករំលែកព័តមាននេះ