ខេត្តកំពង់ធំ ៖ ទីតាំងជល់មាន់មួយកន្លែងដែលគេដឹងថា បានលួចលេងនៅក្នុងព្រៃក្នុងភូមិសាស្ត្រស្រុកកំពង់ស្វាយ ខេត្តកំពង់ធំ ត្រូវបានលោកអធិការនគរបាលស្រុកដឹកនាំកំលាំងមន្ត្រីក្រោមឱវាទចុះបង្គ្រាបកាលពីថ្ងៃទី២៨ ឧសភា ២០១៥ ។
លោកវរសេនីយ៍ត្រី ខេន ឈុនគ័រ អធិការនគរបាលស្រុកកំពង់ស្វាយបានឲ្យដឹងថា ក្រោយពីទទួលបានព័ត៌មានលំអិតពីទីតាំងជល់មាន់មួយកន្លែង នៅចំណុចទួលត្រាច ភូមិត្រពាំងព្រលិត ឃុំត្រពាំងព្រលិត ស្រុកកំពង់ស្វាយ ទើបនៅថ្ងៃទី២៨ ឧសភា លោកបានសុំគោលការណ៍ពីលោកព្រះរាជអាជ្ញា ដឹកនាំកំលាំងចុះបង្ក្រាបតែម្ដង ជាលទ្ធផលរឹបអូស និងដកហូតបានស៊ុមមាន់២ សង្វៀន១ មាន់ជល់៣ក្បាល ម៉ូតូ៧គ្រឿង និង មនុស្ស៣នាក់ ព្រមទាំងសម្ភារៈមួយចំនួនផង ។
បើទោះជាសមត្ថកិច្ចមិនបានអះអាងពីអត្តសញ្ញាណម្ចាស់សង្វៀនជល់មាន់មួយកន្លែងនេះក៏ដោយ ប៉ុន្តែប្រភពព័ត៌មានក្រៅផ្លូវការបានបង្ហើបឲ្យដឹងថា ម្ចាស់មាន់ឈ្មោះ ថុន សុធី ជាមន្ត្រីនគរបាលក្នុងស្នងការដ្ឋាន នគរបាលខេត្ត និងជាអ្នកចិញ្ចឹមមាន់ជល់ឲ្យឧត្តមសេនីយ៏ត្រីស្នងការរងនៃស្នងការដ្ឋាននគរបាលមួយរូប ដែលគេធ្លាប់ឃើញស្នងការរងរូបនោះឧស្សាហ៍ចេញ-ចូលទីតាំងជល់មាន់រៀងរាល់ថ្ងៃចុងសប្ដាហ៍ ។
លោកបន្តថា ចំពោះមុខនេះលោកព្រះរាជអាជ្ញាបានបញ្ជាកំលាំងសមត្ថកិច្ចឲ្យធ្វើការស្រាវជ្រាវជុំវិញករណីទីតាំងជល់មាន់មួយចំនួនទៀត ដែលគេដឹងថា បាននិងកំពុងធ្វើសកម្មភាពប្ដូរទីតាំងពីមួយកន្លែងទៅមួយ កន្លែងតាមគុម្ពោធព្រៃក្នុងភូមិសាស្ត្រស្រុក៕
ព័ត៌មានលម្អិតនឹងផ្សាយជូននៅលើទំព័រកាសែតកោះសន្តិភាព
ចែករំលែកព័តមាននេះ