ខេត្តកំពង់ឆ្នាំង ៖ ក្មេងប្រុសអាយុទើបតែ២ឆ្នាំម្នាក់ត្រូវទឹកសម្លកំពប់ស្រោចលើខ្លួនបណ្តាលឱ្យរលាកធ្ងន់ធ្ងរ ខណៈក្មេងប្រុសរងគ្រោះយកដង្កៀបសម្រាប់ចាប់ធ្យូងទៅថ្ពក់ទាញមាត់ឆ្នាំងសម្លកំពុងពុះនៅលើចង្ក្រាន
ខេត្តកំពង់ឆ្នាំង ៖ ក្មេងប្រុសអាយុទើបតែ២ឆ្នាំម្នាក់ត្រូវទឹកសម្លកំពប់ស្រោចលើខ្លួនបណ្តាលឱ្យរលាកធ្ងន់ធ្ងរ ខណៈក្មេងប្រុសរងគ្រោះយកដង្កៀបសម្រាប់ចាប់ធ្យូងទៅថ្ពក់ទាញមាត់ឆ្នាំងសម្លកំពុងពុះនៅលើចង្ក្រានមានកំពស់ប្រមាណជា១ម៉ែត្របណ្តាលឱ្យកំពប់ចាក់ស្រោចមកលើខ្លួន ។
ហេតុការណ៏នេះបានកើតឡើងកាលពីវេលាម៉ោង១ ០និង៤៥នាទីថ្ងៃត្រង់ ថ្ងៃទី២៦ ឧសភា ២០១៥ នៅលំនៅឋានកុមារារងគ្រោះ ស្ថិតក្នុងភូមិឃ្លាំងប្រាក់ សង្កាត់ប្អេរ ក្រុងកំពង់ឆ្នាំង ។
បើតាមសំដីស្ត្រីជាម្តាយក្មេងប្រុសរងគ្រោះឈ្មោះ អ៊ុន គឹមសៀន អាយុ៣៥ឆ្នាំ បានឱ្យដឹងថា កូនប្រុសរបស់គាត់មានឈ្មោះ សឿន សុធារ៉ា ជាកូនពៅក្នុងចំណោមកូន៤នាក់ ។ នៅមុនពេលកើតហេតុ រូបគាត់បានដាំបាយឆ្អិនហើយបានលើកឆ្នាំងបាយចេញពីចង្ក្រាន និងបានដាក់ដាំទឹកសម្លនៅលើចង្ក្រានមុខផ្ទះ ដែលមានកំពស់ប្រមាណ១ម៉ែត្រពីដី ។
ពេលដាំទឹកពុះ គាត់ជ្រុំប្រហុកបង់បន្លែជាបណ្តើរៗ ហើយឆ្លៀតលើកឆ្នាំងបាយឆ្អិនយកចូលក្នុងផ្ទះ ពេលនោះកូនប្រុសគាត់មិនដឹងដើរមកពីណាទេ ស្រាប់តែស្រវ៉ាបានដែកដង្កៀបចាប់ភ្លើងទៅថ្ពក់ជាប់មាត់ឆ្នាំង ហើយទាញមកបណ្តាលឱ្យកំពប់ទឹកសម្លកំពុងពុះចាក់ស្រោចខ្លួនតែម្តង ធ្វើឱ្យរលាកពេញខ្លួន និងស្រែកយំឡើង ទើបគាត់ស្ទុះពីក្នុងផ្ទះមកឃើញដូចនោះបានព្យាយាមយកទឹកត្រជាក់មកស្រោចលើខ្លួនរបកស្បែកចេញដូចស្រុសមនុស្សទាំងរស់ គាត់តក់ស្លុតខ្លាំងពេកស្រែកហៅឱ្យគេជួយ និងបានយកកូនគាត់ទៅពេទ្យឯកជនជាបន្ទាន់។
ពេលទៅដល់ពេទ្យបានឱ្យគាត់ទិញថ្នាំសម្រាប់បាញ់ឱ្យត្រជាក់មួយដបថ្លៃ១០ដុល្លារមកបាញ់លើខ្លួន រួចបានយកកូនមកផ្ទះវិញ ព្រោះតែគាត់ក្រីក្រ គ្មានប្រាក់បង់ឱ្យពេទ្យ។ ស្ត្រីរូបនោះបានបញ្ជាក់ថា ប្តីគាត់ឈ្មោះ សឿន សុង អាយុ៣៥ឆ្នាំ ធ្វើជាងសំណង់ គាត់នៅផ្ទះ មើលថែកូន៤នាក់ គ្រួសារគាត់ក្រីក្រណាស់ ហេតុនេះហើយទើបគាត់យកកូនមកមើលថែនៅផ្ទះវិញ គ្មានប្រាក់សម្រាប់ព្យាបាលកូនឡើយ។ គាត់បានសុំអំពាវនាវតាមរយៈអ្នកសារព័ត៌មានដល់សប្បុរសជននានា ពិសេសអាជ្ញាធរ និងសាខាកាកបាទក្រហមសូមជួយដល់គ្រួសារគាត់ដែលកំពុងខ្វះខាតនេះផង៕
ចែករំលែកព័តមាននេះ