ខេត្តបន្ទាយមានជ័យ ៖ រថយន្តមួយគ្រឿងម៉ាកសាំងយ៉ុង(ប្រភេទទេសចរ១២កៅអី)ម្ចាស់ចេញមកពីច្រៀងខារ៉ាអូខេ បើកចាក់កួបោលចូលសួនច្បារទៅបុកបង្គោលភ្លើងក្នុងសួនបាក់អស់១ដើម ។ ហេតុការណ៍នេះបានកើតឡើងកាលពីវេលាម៉ោង១ និង២០នាទីរំលងអធ្រាត្រ ឈានចូលថ្ងៃទី២៤ ឧសភា ២០១៥ នៅចំណុចមុខភោជនីយដ្ឋានជំនោសែសិន ស្ថិតក្នុងភូមិក្បាលស្ពាន សង្កាត់ព្រះពន្លា ក្រុងសិរីសោភ័ណ ។
ប្រភពព័ត៌មានពីនគរបាលចរាចរណ៍បានឲ្យដឹងថា រថយន្តដែលបើកទៅបុកបង្គោលភ្លើងក្នុងសួនច្បារនោះម៉ាកសាំងយ៉ុង(ប្រភេទទេសចរ១២កៅអី) ពណ៌លឿង ពាក់ស្លាកលេខភ្នំពេញ.2AE.3418 អ្នកបើកបរមិនត្រូវបានស្គាល់ឈ្មោះទេ ព្រោះនៅពេលកើតហេតុសមត្ថកិច្ចចុះទៅដល់អ្នកបើកបរមានស្ថានភាពស្រវឹងខ្លាំងនិយាយស្តាប់គ្នាមិនបាន ពេលនោះសមត្ថកិច្ចបានទូរស័ព្ទហៅសាច់ញាតិបងប្អូននាំយកទៅផ្ទះ ។ ដោយឡែកចំពោះរថយន្តត្រូវបានយកមករក្សាទុកនៅការិយាល័យនគរបាលចរាចរណ៍រង់ចាំធ្វើការដោះស្រាយ។
ប្រភពដដែលបានបញ្ជាក់ថា មូលហេតុដែលបង្កឲ្យរថយន្តជ្រុលចង្កូតឡើងចូលទៅក្នុងសួនច្បារ និងបុកបង្គោលភ្លើងនេះ បណ្តាលមកពីអ្នកបើកបរស្រវឹងស្រា ៕
ចែករំលែកព័តមាននេះ