ខេត្តកំពង់ឆ្នាំង ៖ ដោយសារបរិយាកាសសង្គមបច្ចុប្បន្នមានភាពជឿនលឿន និងលំហូរចូលនូវវប្បធម៌ប្រទេសជិតខាង ពិសេសវប្បធម៌បរទេស បានធ្វើអោយយុវវ័យខ្មែរមួយចំនួនបានប្រាសចាកសីលធម៌ដ៏ស្អាតស្អំ មិនគោរព
ខេត្តកំពង់ឆ្នាំង ៖ ដោយសារបរិយាកាសសង្គមបច្ចុប្បន្នមានភាពជឿនលឿន និងលំហូរចូលនូវវប្បធម៌ប្រទេសជិតខាង ពិសេសវប្បធម៌បរទេស បានធ្វើអោយយុវវ័យខ្មែរមួយចំនួនបានប្រាសចាកសីលធម៌ដ៏ស្អាតស្អំ មិនគោរព និងស្តាប់តាមការប្រៀបប្រដៅរបស់ឪពុកម្តាយ ធ្វើទៅតាមការអូសទាញរបស់ជនខិលខូច រហូតចាកចេញចោលផ្ទះសំបែងដែលជាទីផ្តល់កំណើត បោះបង់ឪពុក-ម្តាយដែលធ្លាប់ថ្នាក់ថ្នមពីបាតជើងក្រហមរងៀល ប្រថុយបណ្តែតខ្លួនតាមខ្យែជីវិតគ្មានកោះត្រើយ និងគ្មានភាពកក់ក្តៅ ទៅតាមចិត្តនឹកឃើញតែមួយភ្លែត មិនគិតពីអនាគតដ៏វែងឆ្ងាយនោះឡើយ ។
និយាយបែបនេះមិនមានន័យបន្តុះបង្អាប់លើយុវវ័យណាម្នាក់ឡើយ តែធាតុពិតយុវជនមួយចំនួនក្នុងសម័យបច្ចុប្បន្នពិតជាបានធ្វើយ៉ាងនេះមែន ហើយខាងក្រោមនេះក៏មិនមានន័យថា មើលងាយដល់ប្អូនដែលបានគិតខ្លីចាកចេញពីផ្ទះចោលឪពុកម្តាយនោះដែរ តែជាការជួយដល់លោកអ្នកមានគុណទាំងពីរ ដែលកំពុងតែសម្រក់ទឹកភ្នែកទទឹងមើលផ្លូវកូនរាល់ថ្ងៃ អង្វរអោយកូនស្រីជាទីស្រឡាញ់ ត្រឡប់មកផ្ទះវិញ ដោយមិនប្រកាន់ទោសអូសដំណើរអ្វីឡើយ នេះជាព្រហ្មវិហារ របស់មាតាបីតាគ្រប់រូបចំពោះបុត្រធីតារបស់ខ្លួន ។
នៅលើកៅអីជ័រ ក្រោមដើមស្វាយមុខផ្ទះ ធ្វើពីថ្មក្រោម ឈើលើ ស្ថិតក្នុងភូមិទួលក្រឡាញ់ សង្កាត់កំពង់ឆ្នាំង ក្រុងកំពង់ឆ្នាំង បុរសជាឪពុកឈ្មោះឡាច ស៊ីម៉ា អាយុ៤២ឆ្នាំ ក្នុងទឹកមុខស្រងូតស្រងាត់ បានរៀបរាប់ដោយលើកបង្ហាញរូបថតរបស់កូនស្រីដែលរត់ចេញពីផ្ទះថា កូនស្រីគាត់មានឈ្មោះម៉េត កន្និកា អាយុ១៦ឆ្នាំ រៀនថ្នាក់ទី៨E នៃវិទ្យាល័យព្រះបាទសុរាម្រឹត ។ រូបគាត់មានមុខរបរជាអ្នករត់ម៉ូតូឌុប ប្រពន្ឋគាត់ឈ្មោះធឹម គឹមសាន អាយុ៤៤ឆ្នាំ ជាអ្នកលក់បន្លែនៅផ្សារលើ ។ គ្រួសារគាត់មានកូនតែ២នាក់ប៉ុណ្ណោះ កូនស្រីបងនិងកូនប្រុសប្អូន ។ គាត់បានសារភាពថា ពិតជាបានស្តីបន្ទោសកូនស្រីពិតមែន ព្រោះចង់អោយកូនល្អ គ្មានឪពុកម្តាយណាចង់អោយកូនអាក្រក់នោះទេ ។
គាត់ចាំថា នៅថ្ងៃទី០៦ ខែឧសភា ឆ្នាំ២០១៥ លោកគ្រូបង្រៀនបានហៅគាត់ជាឪពុកទៅប្រាប់ថា កូនស្រីគាត់បានអវត្តមាននៅថ្នាក់រៀនញឹកញាប់ណាស់ សូមជួយណែនាំផង ។ ល្ងាចនោះពេលកូនស្រីគាត់មកវិញ គាត់ក៏បានស្តីបន្ទោសដល់កូនស្រីបន្តិចបន្តួចពីរឿងគ្រូហៅគាត់ទៅព្រមានពីរឿងកូនស្រីអវត្តមាននៅសាលារៀនញឹកញាប់ នៅល្ងាចនោះក្រោយពីស្តីបន្ទោសហើយ កូនស្រីគាត់មិនបានតបតអ្វីទេ លុះស្អែកព្រឹកឡើង គឺថ្ងៃទី៧ ខែឧសភា កូនស្រីគាត់បានទៅរៀនជាធម្មតា ប៉ុន្តែនៅវេលាម៉ោង១០ និង៣០នាទីព្រឹក កូនស្រីគាត់បានត្រឡប់មកផ្ទះវិញ ហើយបានរៀបចំខោអាវចាកចេញពីផ្ទះតែម្តង ។
ស្ត្រីចំណាស់ឈ្មោះសយ ដែលត្រូវជាជីដូនយុវតីខាងលើ ដែលកំពុងអង្គុយជិតកូនប្រុសបានសម្រក់ទឹកភ្នែក និងប្រឹងរៀបរាប់ថា គាត់មានជម្ងឺលើសឈាមប្រចាំកាយ ថ្ងៃនោះគាត់បានឃើញចៅស្រីគាត់មកពីសាលារៀនវិញ ហើយបានប្រញាប់រៀបចំខោអាវដាក់ក្នុងកាបូប រួចចាកចេញពីផ្ទះ គាត់ប្រឹងរត់តាម និងស្រែកសួរថា ចៅឯងទៅណា? ចៅស្រីក៏ឆ្លើយថា ខ្ញុំនៅធ្វើអ្វី បើពុកម៉ែមិនត្រូវការខ្ញុំហើយនោះ? គាត់បានព្យាយាមរត់តាមចៅស្រីបណ្តើរ ស្រែកឃាត់ចៅស្រីបណ្តើរ រហូតដល់ផ្លូវបំបែកខាងជើងផ្ទះ គាត់បានឃើញក្មេងស្រីម្នាក់ក្នុងសម្លៀកបំពាក់សិស្សសាលា កំពុងបញ្ឆេះម៉ូតូរង់ចាំចៅស្រីគាត់ ប៉ុន្តែគាត់គ្មានលទ្ឋភាពទាញចៅស្រីគាត់ចុះពីម៉ូតូឡើយព្រោះតែវ័យចំណាស់របស់គាត់ និងដោយសារជម្ងឺប្រចាំកាយមិនអាចស្ទុះតាមចិត្តបានឡើយ គាត់បានត្រឹមតែដាក់គូថអង្គុយយំ សម្លឹងមើលចៅស្រីគាត់រហូតផុតកន្ទុយភ្នែកតែប៉ុណ្ណោះ ។
បន្ទាប់ពីស្តាប់សំដីស្រី្តជាជំដូន និងឪពុកក្មេងស្រីចាកចេញពីផ្ទះទាំងទឹកភែ្នក និងនិយាយចុងក្រោយថា សូមអោយកូនស្រីប្រញាប់វិលត្រឡប់មកផ្ទះវិញ គ្រួសារទាំងមូលកំពុងរង់ចាំ គ្មានអ្នកណាម្នាក់ខឹងនិងកូនស្រីឡើយ ក្នុងនោះផងដែរតាមរយៈសារព័ត៌មាននានា លោកទាំង២សូមជូនដំណឹងដល់សមត្ថកិច្ច និងប្រជាពលរដ្ឋគ្រប់ទីកន្លែង បើបានឃើញកូនស្រីដូចមានក្នុងរូបថតនេះ សូមមេត្តាផ្តល់ដំណឹងមកគាត់យកតែបុណ្យផង តាមទូរសព្ទ័លេខ 088 86 51 744 ៕
ចែករំលែកព័តមាននេះ