ខេត្តមណ្ឌលគិរី ៖ អស់រយៈពេលជិតមួយខែមកហើយជនបង្កគ្រោះថ្នាក់ចរាចណ៍ បណ្តាលឲ្យយុវជនពីរនាក់ស្លា.ប់តាំងពីមុនថ្ងៃចូលឆ្នាំប្រពៃណីខ្មែរ កំពុងរស់នៅយ៉ាងមានសេចក្តីសុខក្រៅប្រព័ន្ឋផ្លូវច្បាប់
ខេត្តមណ្ឌលគិរី ៖ អស់រយៈពេលជិតមួយខែមកហើយជនបង្កគ្រោះថ្នាក់ចរាចណ៍ បណ្តាលឲ្យយុវជនពីរនាក់ស្លាប់តាំងពីមុនថ្ងៃចូលឆ្នាំប្រពៃណីខ្មែរ កំពុងរស់នៅយ៉ាងមានសេចក្តីសុខក្រៅប្រព័ន្ឋផ្លូវច្បាប់ ខណៈពេលដែលក្រុមគ្រួសារជនរងគ្រោះទទួលរងនូវភាពអយុត្តិធម៌ និងភាពឈឺចាប់ដែលត្រូវព្រាត់ប្រាស់សាច់ញាតិ។
ប្រភពបានឲ្យដឹងថា ជនបង្កគ្រោះថ្នាក់ចរាចរណ៍សមត្ថកិច្ចស្គាល់អត្តសញ្ញាណអស់ហើយ ប៉ុន្តែអធិការស្រុកពេជ្រាដាបែរជាបិទបាំង និងផ្អឹបរឿងទុកមិនចាត់ការសោះ។ ប្រភពបានរាយការណ៍បន្តថា ហេតុការណ៍នេះបានកើតឡើងតាំងពីថ្ងៃទី១២ មេសា ២០១៥ មកម្ល៉េះត្រង់ចំណុចផ្លូវកែង ភូមិស្រែពោធិរដែត ឃុំស្រែអំពូម ស្រុកពេជ្រាដា។
បើតាមសាក្សីនៅកន្លែងកើតហេតុបានឱ្យដឹងថា មុនកើតហេតុគេឃើញរថយន្តបង្ក និងម៉ូតូ បើកបញ្ច្រាសទិសគ្នាក្នុងល្បឿនលឿនក៏ជ្រុលទៅបុកគ្នាពេញទំហឹង។ ភ្លាមៗនោះភាគីខាងម៉ូតូដដែលមានគ្នា២នាក់បានស្លាប់ភ្លាមៗនៅនឹងកន្លែងកើតហេតុ ខណៈដែលរថយន្តបង្កម៉ាកហាយឡិនឌ័រ គ្មានស្លាកលេខសង្ស័យថា ដឹកឈើរបស់ឈ្មោះ ធា ជាម្ចាស់បានព្យាយាមបើករត់គេចរហូតដល់សមត្ថកិច្ច និងបងប្អូនក្រុមគ្រួសារសព ដេញតាមរថយន្តបង្កនោះ និងឃាត់បាននៅចំណុចទីរួមស្រុកពេជ្រាដា យកមករក្សាទុកនៅអធិការស្រុកពេជ្រាដាដើម្បីដោះស្រាយ។
បើតាមការអះអាងរបស់អ្នកនៅស្រុកពេជ្រាដាបាននិយាយថា នៅរសៀលថ្ងៃកើតហេតុនោះប៉ូលិសស្រុកពេជ្រាដា រួមទាំងប៉ូលិសប៉ុស្តិ៍រដ្ឋបាលផងដែរ បានឃាត់ខ្លួនបុរសម្នាក់ជាម្ចាស់រថយន្តបង្កឈ្មោះ ធា មកកាន់ប៉ុសិ៍រដ្ឋបាលសួរនាំ។
ការឃាត់ខ្លួនបុរសជាម្ចាស់រថយន្តខាងលើគឺបានមួយដង្ហើមចង្រិតប៉ុណ្ណោះក៏ត្រូវបានសមត្ថកិច្ចដោះលែងបាត់ស្រមោលតែម្តង ហើយចាប់តាំងពីថ្ងៃកើតហេតុថ្ងៃទី១២ មេសា ២០១៥ រហូតដល់ថ្ងៃទី០៦ ឧសភា ២០១៥ រថយន្តបង្កត្រូវបានលោកអធិការស្រុកពេជ្រាដា រក្សាទុកមិនមានការដោះស្រាយអ្វីបន្តិចសោះឡើយ។
លោក សារឿន ម៉ាប់ ភេទប្រុស អាយុ ៣៨ឆ្នាំ រស់នៅស្រុកពេជ្រាដាត្រូវជា ពូ របស់ជនរងគ្រោះបានប្រាប់ថា នៅថ្ងៃកើតហេតុខាងលើជនរងគ្រោះទី១-ឈ្មោះ ប្លេវ តូច ភេទប្រុស អាយុ១៩ឆ្នាំ ជាជនជាតិព្នងដែលរស់នៅក្នងភូមិពូលូង សង្កាត់រមនា ក្រុងសែនមនោរម្យ និងម្នាក់ទៀត ឈ្មោះ សុខ ចាន់ ភេទប្រុស អាយុ១៧ឆ្នាំ ជាជនជាតិព្នងដូចគ្នា។
ក្រុមគ្រួសារអ្នកស្លាប់ទាំងពីរ គឺសុទ្ធសឹងជាគ្រួសារក្រីក្រ រកតែថវិកាសំរាប់ធ្វើបុណ្យតាមប្រពៃណីស្ទើរមិនបានផង។ បើតាមការបញ្ជាក់របស់គ្រួសារជនរងគ្រោះបានប្រាប់ថា ពួកគាត់បានព្យាយាមសុំជួបលោក អធិការស្រុកពេជ្រាដា ជាច្រើនដងដែរ ប៉ុន្តែលោកអធិការរូបនេះបានឆ្លើយថា រវល់ៗរហូត។
លោក ចាន់ ទិត្យ នាយការិយាល័យចរាចរណ៍ផ្លូវគោកនៃស្នងការដ្ឋាននគរបាលខេត្តបានប្រាប់ឱ្យដឹងថា ក្នុងករណីនេះជិត១ខែហើយលោកពុំទាន់ទទួលសំណុំរឿងនៅឡើយទេ។ លោក ជា សុវណ្ណថេត ព្រះរាជអាជ្ញារងសាលាដំបូងខេត្តបានប្រាប់ថា រូបលោកបានទទួលពាក្យបណ្តឹងហើយ ព្រះរាជអាជ្ញារងរូបនេះបានអះអាងថា នឹងចាត់ការរឿងនេះជូនជនរងគ្រោះក្នុងពេលដ៏ខ្លីខាងមុខនេះ។
ទាក់ទិននឹងករណីខាងលើកោះសន្តិភាពមិនអាចទាក់ទងសុំការបំភ្លឺពីលោក សៅ សុវណ្ណរិទ្ធ អធិការនគរបាលស្រុកពេជ្រាដា បានទេ ដោយសារទូរស័ព្ទជាច្រើនដង ពុំមានអ្នកឆ្លើយតប៕
ចែករំលែកព័តមាននេះ