ខេត្តកំពង់ស្ពឺ ៖ បុរសម្នាក់បានស្លាប់ និងម្នាក់ទៀតរងរបួសក្នុងគ្រោះថ្នាក់ចរាចរណ៍ម៉ូតូបុកអ្នកថ្មើរជើង ហើយមានម៉ូតូមួយគ្រឿងទៀតមកបុកបន្ត ។ សពត្រូវបានយកទៅតម្កល់នៅមន្ទីរពេទ្យខេត្ត អ្នករងរបួសត្រូវសាច់ញាតិយកទៅព្យាបាល ចំណែកអ្នកបង្ករត់គេចខ្លួនបាត់ កាលពីវេលាម៉ោង១០ និង១០នាទីយប់ថ្ងៃទី៣ ឧសភា នៅតាមបណ្តោយផ្លូវជាតិលេខ៤ ចន្លោះបង្គោលគីទ្បូម៉ែត្រ៧-៨ ត្រង់ភូមិស្រែក្រោក ឃុំសែនដី ស្រុកសំរោងទង ។
ប្រភពពីសមត្ថកិច្ចស្រង់សម្តីសាក្សីឱ្យដឹងថា មុនពេលកើតហេតុ ឃើញបុរសម្នាក់ដើរតាមថ្នល់ទិសដៅពីជើងទៅត្បូង ស្រាប់តែមានម៉ូតូសេ១០០កូរ៉េ ពណ៌ក្រហម បើកបរដោយបុរសម្នាក់ ស្របទិសគ្នាបានបុកអ្នកដើរនោះបណ្តាលឱ្យដួលរងរបួសដូចគ្នា ។ គាប់ជួនពេលនោះ មានម៉ូតូស្មាសមួយគ្រឿងទៀត ដែលធ្វើដំណើរស្របទិសគ្នាដែរ បានមកបុកហើយកិនអ្នកបើកម៉ូតូសេ១០០កូរ៉េពីលើ បណ្តាលឱ្យស្លាប់ភ្លមៗនៅនឹងកន្លែង ។
លោកវរសេនីយ៍ត្រី ឃុត សុផល អធិការនគរបាលស្រុកសំរោងទង បានឱ្យដឹងថាជនរងគ្រោះថ្មើរជើង ត្រូវបានស្គាល់ឈ្មោះ ឌុច ផាន ភេទប្រុស អាយុ២៧ឆ្នាំ រស់នៅភូមិបេង ឃុំស្តុក ស្រុកគងពិសី ខេត្តកំពង់ស្ពឺ ។ ចំណែកជនរងគ្រោះដែលជិះម៉ូតូសេ១០០កូរ៉េ ពណ៌ក្រហម ត្រូវម៉ូតូស្មាសមកបុកនិងកិនស្លាប់នោះ មិនទាន់ស្គាល់អត្តសញ្ញាណនៅទ្បើយទេ រីឯអ្នកជិះម៉ូតូស្មាសក្រោយកើតហេតុ បានជិះគេចខ្លួនបាត់ ។
សពត្រូវសមត្ថកិច្ចយកទៅរក្សាទុកនៅមន្ទីរពេទ្យបង្អែកខេត្ត ចំណែកវត្ថុតាងយកមករក្សាទុកនៅប៉ុស្តិ៍រដ្ឋបាលឃុំសែនដី រង់ចាំធ្វើការស្រាវជ្រាវរកសាច់ញាតិឱ្យមកបំពេញបែបបទទទួលយកទៅវិញ ចំណែកអ្នកថ្មើរជើងដែលរងរបួសដែរនោះ ត្រូវបានសាច់ញាតិដឹកទៅព្យាបាល ៕
ចែករំលែកព័តមាននេះ