ខេត្តកំពង់ឆ្នាំង ៖ រថយន្តកាមរីបាឡែនមួយគ្រឿងបានរងការខូចខាតស្ទើរទាំងស្រុងក្នុងហេតុការគ្រោះថ្នាក់ចរាចរណ៍មួយដែលបានកើតឡើងកាលពីវេលាម៉ោង៩ និង២០នាទីយប់ ថ្ងៃទី៣ ឧសភា ២០១៥ នៅលើ កំណាត់ផ្លូវជាតិលេខ៥ ស្ថិតក្នុងភូមិកណ្តាល សង្កាត់កំពង់ឆ្នាំង ក្រុងកំពង់ឆ្នាំង ខណៈដែលរថយន្តកាមរីបាឡែនខាងលើបើកឆ្លងផ្លូវជាតិមិនបានប្រយ័ត្ន។
សមត្ថកិច្ចនគរបាលក្រុងកំពង់ឆ្នាំងបានឱ្យដឹងថា មុនពេលកើតហេតុគេឃើញរថយន្តបាឡែនពណ៌ទឹកប្រាក់ ពាក់ស្លាកលេខភ្នំពេញ 2 AD.5072 បើកបរដោយបុរសឈ្មោះ ច្រាំង សាវុធ អាយុ៣៦ឆ្នាំ មានទីលំនៅរាជធានីភ្នំពេញ បើកឆ្លងផ្លូវជាតិពីលិចទៅកើត ស្របពេលនោះមានរថយន្តធុនធំ ពាក់ស្លាកលេខ បាត់ដំបង 3A. 0278 ដឹកឥដ្ឋការ៉ូបើកបរដោយបុរសមិនស្គាល់ឈ្មោះពីត្បូងមកជើងក្នុងល្បឿនលឿនមកដល់បានជ្រុលទៅបុករថយន្តកាមរីបាឡែនដែលបើកឆ្លងថ្នល់នោះយ៉ាងពេញទំហឹង និងរុញចម្ងាយជាង១០ម៉ែត្របណ្តាលឱ្យរថយន្តកាមរីបាឡែនខូចខ្ទេចស្ទើរទាំងស្រុង សំណាងល្អអ្នកជិះក្នុងរថយន្តមានគ្នា៥នាក់ ក្នុងនោះស្រីមា្នក់ គ្រាន់តែរងរបួសស្រាលប៉ុណ្ណោះ ចំណែកអ្នកបើកបររថយន្តធុនធំបានរត់គេចខ្លួនបាត់ ។
នគរបាលបានបញ្ជាក់ថា គ្រោះថ្នាក់ខាងលើនេះ បណ្តាលមកពីរថយន្តបាឡែនបើកឆ្លងថ្នល់ជាតិក្នុងផ្លូវខ្វែងទិសមិនបានប្រយ័ត្ន ចំណែករថយន្តធុនធំបើកល្បឿនលឿនហួសកំណត់ក្នុងទីប្រជុំជនទើបបង្កឱ្យមានបញ្ហាបែបនេះ ៕
ចែករំលែកព័តមាននេះ