រាជធានីភ្នំពេញ ៖ អាជីវករដូរលុយ និងលក់មាសនៅផ្សារបឹងកេងកង២នាក់ប្តីប្រពន្ធត្រូវបានក្រុមចោរប្លន់ប្រដាប់អាវុធមានគ្នា២នាក់ធ្វើសកម្មភាពភ្ជង់ប្លន់នៅមុខផ្ទះ យកកន្ត្រកដាក់គ្រឿងអលង្ការ និងកាបូបប្រាក់
រាជធានីភ្នំពេញ ៖ អាជីវករដូរលុយ និងលក់មាសនៅផ្សារបឹងកេងកង២នាក់ប្តីប្រពន្ធត្រូវបានក្រុមចោរប្លន់ប្រដាប់អាវុធមានគ្នា២នាក់ធ្វើសកម្មភាពភ្ជង់ប្លន់នៅមុខផ្ទះ យកកន្ត្រកដាក់គ្រឿងអលង្ការ និងកាបូបប្រាក់អស់ប្រមាណជាង៥ម៉ឺនដុល្លារអាមេរិក ខណៈពេលពួកគាត់ជិះរថយន្តម៉ាកហាយឡិនឌ័រធ្វើដំណើរចេញពីផ្សារមកដល់ផ្ទះ ។
ហេតុការណ៍នេះបានបង្កឱ្យមានការភ្ញាក់ផ្អើលកាលពីវេលាម៉ោង៥ និង៣០នាទីល្ងាច ថ្ងៃទី៣ ឧសភា ២០១៥ នៅចំណុចផ្ទះលេខ៤១ ផ្លូវ២៦១ សង្កាត់បឹងសាឡាង ខណ្ឌទួលគោក។
ជនរងគ្រោះដែលត្រូវចោរភ្ជង់ប្លន់ ប្តីឈ្មោះយឹម ឡេង អាយុ៤៥ឆ្នាំ និងប្រពន្ធឈ្មោះហេង ម៉ាលី អាយុ៣១ឆ្នាំ ជាអាជីវករដូរលុយ និងលក់គ្រឿងអលង្ការនៅផ្សារបឹងកេងកង ស្នាក់នៅផ្ទះកើតហេតុខាងលើ។
តាមសាក្សីបានឱ្យដឹងថា ក្រុមចោរប្លន់មានបក្សពួក២នាក់ប្រដាប់ដោយកាំភ្លើងខ្លីជិះម៉ូតូធុនC125 ពណ៌ខ្មៅបានធ្វើសកម្មភាពភ្ជង់ប្លន់ស្ត្រីជាភរិយាដណ្តើមយកកន្ត្រក និងកាបូបប្រាក់ ហើយជិះគេចខ្លួនដោយសុវត្ថិភាព។
សាក្សីបន្តថា មុនពេលកើតហេតុជនរងគ្រោះបានជិះរថយន្តម៉ាកយាយឡិនឌ័រធ្វើដំណើរមកពីផ្សារបឹងកេងកង ពេលមកដល់មុខផ្ទះជនរងគ្រោះបាននាំគ្នាចុះពីរថយន្ត ហើយបើកទ្វារបម្រុងចូលផ្ទះស្រាប់តែលេចមុខជនសង្ស័យម្នាក់ប្រដាប់ដោយកាំភ្លើងខ្លីមួយដើមមកភ្ជង់ប្លន់ស្ត្រីជាប្រពន្ធយកកន្ត្រកគ្រឿងអលង្ការ និងកាបូបប្រាក់តែម្តង។
ក្នុងសកម្មភាពនោះស្ត្រីជាប្រពន្ធបានស្រែកឆោឡោ ចំណែកប្តីបានរត់ដេញតាមក្រុមចោរ តែទោះជាយ៉ាងណាក្រុមចោរបានដកកាំភ្លើងភ្ជង់គំរាមគេឯងនៅជុំវិញ ហើយជិះគេចខ្លួនបាត់ស្រមោល។
នៅក្នុងកាបូប និងកន្ត្រកដែលជនសង្ស័យប្លន់យកទៅមានគ្រឿងអលង្ការ គិតជាប្រាក់ស្មើនឹង៥ម៉ឺនដុល្លារអាមេរិក និងលុយខ្មែរ១០លានរៀល។ ករណីនេះត្រូវបានប្រភពឱ្យដឹងថា ក្រុមចោរអាចតាមដានជនរងគ្រោះយូរហើយ ហើយទើបតែមានឱកាសក៏ធ្វើសកម្មភាពតែម្តង ៕
ចែករំលែកព័តមាននេះ