ខេត្តព្រៃវែង ៖ យ៉ាងហោចណាស់មនុស្សប្រុស២នាក់ស្លាប់ មនុស្សស្រីម្នាក់ទៀតស្លាប់ពេលដឹកទៅដល់មន្ទីរពេទ្យខេត្តស្វាយរៀង ១៣នាក់រងរបួសធ្ងន់ និង៤នាក់ផ្សេងទៀតរបួសស្រាលក្នុងហេតុការណ៍គ្រោះថ្នាក់ក្រឡាប់រថយន្តដែលកើតឡើងកាលពីវេលាម៉ោង៦ព្រឹកថ្ងៃទី១៩ មេសា ២០១៥ នៅលើកំណាត់ផ្លូវជាតិលេខ១ ចំណុចខាងលិចផ្សារកអណ្តើកចម្ងាយ២គីឡូម៉ែត្រ ស្ថិតនៅភូមិប្រាសាទ ឃុំប្រាសាទ ស្រុកកំពង់ត្របែក ខេត្តព្រៃវែង។
បើតាមសមត្ថកិច្ចនគបាលឃុំប្រាសាទបានឲ្យដឹងថា រថយន្តក្រឡាប់នោះម៉ាកស្ការិចពណ័ទឹកប្រាក់ ពាក់ស្លាកលេខភ្នំពេញ២AC៧៨៨៤ បើកបរពីរទិសខាងកើតទៅលិចដឹកកម្មករសរុបចំនួន២០នាក់យ៉ាងលឿន លុះមកដល់ចំណុចកើតហេតុក៏បែកកង់មុខខាងស្តាំជើក្រឡាប់បួនប្រាំត្រឡប់ពីលើថ្នល់ជាតិធ្លាក់ចូលហាវថ្នល់កម្ពស់ប្រមាណ៤ម៉ែត្រផ្ងារជើងឡើងលើបណ្តាលឲ្យស្លាប់មនុស្សប្រុស២នាក់នៅនឹងកន្លែង និងស្លាប់មនុស្សស្រីម្នាក់ទៀតពេលដឹកមកដល់មន្ទីរពេទ្យខេត្តស្វាយរៀង ១៣នាក់រងរបួសធ្ងន់ និង៤នាក់ផ្សេងទៀតរបួសស្រាលដេករដូករណែលនៅហាវថ្នល់។
បន្ទាប់មកសមត្ថកិច្ចបានហៅរថយន្តសាមុយដឹកមកាន់មន្ទីរពេទ្យខេត្តស្វាយរៀង១៤នាក់ (ស្លាប់ស្រីម្នាក់ ជាម្ចាស់រថយន្តពេលដឹកដល់មន្ទីរពេទ្យខេត្ត) ក្នុងនោះ១០នាក់នៅព្យាបាលក្នុងមន្ទីរខេត្ត រីឯ៣នាក់រងរបួសធ្ងន់ធ្ងរពេកត្រូវក្រុមគ្រួសារដឹកបញ្ជូនទៅមន្ទីរពេទ្យប្រទេសវៀតណាមដើម្បីសង្គ្រោះ ៣នាក់របួសស្រាលនៅមន្ទីរពេទ្យស្រុកប្រតិបត្តិកំពង់ត្របែក ម្នាក់មកមន្ទីរពេទ្យខេត្តស្វាយរៀង។
បើតាមការបំភ្លឺពីក្រុមគ្រួសារជនរងគ្រោះបានឲ្យដឹងថា មុនពេលកើតហេតុវេលាម៉ោង២ទៀបភ្លឺ អ្នកបើកបរឈ្មោះជួប កុសល់ ភេទប្រុស អាយុ២៤ឆ្នាំ និងម្ចាស់រថយន្តឈ្មោះជា អាយុ២៩ឆ្នាំ និងប្រពន្ធឈ្មោះជួប និមល អាយុ២៦ឆ្នាំ នៅភូមិសំយ៉ោង ឃុំសំយ៉ោង ស្រុកកំពង់រោទិ៍ ខេត្តស្វាយរៀង បានបើករថយន្តប្រមូលម៉ូយក្នុងភូមិសំយ៉ោងជាមួយគ្នាដើម្បីត្រឡប់ទៅធ្វើការរោងចក្រនៅរាជធានីភ្នំពេញវិញ គឺដឹកម៉ូយបាន១៧នាក់ សរុប២០នាក់ក្នុងរថយន្តទម្រាំបានម៉ូយជុំគ្នាភ្លឺល្មមហើយក៏បានបើកមកដល់ចំណុចកើតហេតុក៏ផ្ទុះបែកកង់បណ្តាលឲ្យក្រឡាប់បួនប្រាំត្រឡប់ផ្ងារជើងឡើងលើខ្ទាតមនុស្សចេញក្រៅរថយន្តកិនស្លាប់ និងរបួសតែម្តង។
សូមបញ្ជាក់ថា ម្ចាស់រថយន្ត ប្តីឈ្មោះជា របួសធ្ងន់សន្លប់នៅនឹងកន្លែង រីឯប្រពន្ធឈ្មោះជួបនិមល ទើបសម្រាលកូនបានបីខែរបួសបែកក្បាលធ្ងន់ធ្ងរស្លាប់ពេលមកដល់មន្ទីរពេទ្យ រីឯអ្នកបើកបរជាប្អូនបង្កើតម្ចាស់ឡានបាក់ដៃឆ្វេង។ ដោយឡែកអ្នករួមដំណើរស្លាប់ឈ្មោះរិចាន់ ភេទប្រុស អាយុ៣៨ឆ្នាំ និងម្នាក់ទៀតមិនស្គាល់ឈ្មោះទេ មានទីលំនៅភូមិព្រៃធំ ឃុំសំយ៉ោង៕
ចែករំលែកព័តមាននេះ