រាជធានីភ្នំពេញ ៖ រថយន្តមួយគ្រឿងម៉ាក ATOZ បានបើកវ៉ារថយន្តមួយគ្រឿងទៀតជ្រុលទៅបុកម៉ូតូខ្ទាតទៅខាងស្តាំ ហើយរថយន្តបួងចង្កូតក្រឡាប់ធ្លាក់ក្នុងព្រៃសង្កត់លើអ្នកជិះម៉ូតូ២នាក់ប្តីប្រពន្ធរងរបួសធ្ងន់ ។ ហេតុការណ៍នេះបានកើតឡើងកាលពីវេលាម៉ោង៩យប់ ថ្ងៃទី១ មេសា តាមផ្លូវជាតិលេខ២ ក្បែរស្ពានព្រែកកំពឹស ក្នុងភូមិក្រាំងស្វាយ សង្កាត់កំពឹស ខណ្ឌដង្កោ ។
ប្រភពព័ត៌មានពីកន្លែងកើតហេតុបានឲ្យដឹងថា មុនពេលកើតហេតុរថយន្តបង្កម៉ាក ATOZ ពណ៌ទឹកមាស ពាក់ស្លាកលេខ ភ្នំពេញ 2Q 1290 បើកបរដោយបុរសម្នាក់ក្នុងទិសដៅពីលិចទៅកើត ពេលមកដល់ចំណុចខាងលើបានបើកជែងរថយន្តមិនចាំម៉ាកធ្វើឲ្យរេចង្កូតទៅបុកម៉ូតូម៉ាកស្មាសវី ពណ៌ខ្មៅ ពាក់ស្លាកលេខ កណ្តាល 1D 5984 ជិះគ្នា២នាក់ប្តីប្រពន្ធដែលធ្វើដំណើរពីកើតទៅលិចចំពីមុខពេញទំហឹងខ្ទាតម៉ូតូទៅចិញ្ចើមផ្លូវខាងស្តាំ ចំណែករថយន្តបួងចង្កូតទៅស្តាំវិញអូសអ្នកជិះម៉ូតូ២នាក់ប្តីប្រពន្ធជាប់ជាមួយរថយន្តធ្លាក់ចិញ្ចើមផ្លូវក្រឡាប់ចូលក្នុងព្រៃសង្កត់លើ២នាក់ប្តីប្រពន្ធរងរបួសធ្ងន់សន្លប់ស្តូកស្តឹង ចំណែកអ្នកបើករថយន្តរងរបួសស្រាលបានរត់គេចខ្លួនត្រូវប្រជាពលរដ្ឋដេញចាប់ពេញក្នុងព្រៃតែចាប់អត់បាន។
ក្រោយពេលកើតហេតុប្រជាពលរដ្ឋបានបង្ហើបរថយន្តចាប់ទាញពីរនាក់ប្តីប្រពន្ធយកទៅដាក់នៅចិញ្ចើមផ្លូវរង់ចាំរថយន្តសង្គ្រោះដឹកយកទៅព្យាបាលនៅមន្ទីរពេទ្យមិត្តភាពខ្មែរសូវៀតទាំង២នាក់ប្តីប្រពន្ធ ។ ចំណែករថយន្តបង្ក និងម៉ូតូដែលខូចខាតស្ទើរទាំងស្រុងត្រូវបានសមត្ថកិច្ចយកទៅរក្សាទុកនៅអធិការដ្ឋានខណ្ឌដង្កោរង់ចាំធ្វើការដោះស្រាយតាមច្បាប់ ៕
ចែករំលែកព័តមាននេះ