ខេត្តកំពង់ឆ្នាំង ៖ បុរសម្នាក់បានស្លា.ប់ក្នុងឥរិយាបទអង្គុយក្រាបលើតុ បណ្តាលឱ្យមានការភ្ញាក់ផ្អើលពេញរោងការ ខណៈដែលបុរសរូបនោះទៅចូលរួម និងពិសារការបងប្អូនក្នុងភូមិជាមួយគ្នា ។
ខេត្តកំពង់ឆ្នាំង ៖ បុរសម្នាក់បានស្លាប់ក្នុងឥរិយាបទអង្គុយក្រាបលើតុ បណ្តាលឱ្យមានការភ្ញាក់ផ្អើលពេញរោងការ ខណៈដែលបុរសរូបនោះទៅចូលរួម និងពិសារការបងប្អូនក្នុងភូមិជាមួយគ្នា ។ ហេតុការណ៏ស្លាប់យ៉ាងចម្លែកនេះបានកើតឡើងនៅវេលាម៉ោង៤ និង៣០នាទីល្ងាច ថ្ងៃទី១៤ ខែមីនា ឆ្នាំ២០១៥ នៅក្នុងភូមិអាឡែង ឃុំជ្រៃបាក់ ស្រុករលាប្អៀរ ខេត្តកំពង់ឆ្នាំង ។
បុរសឈ្មោះ តាំ អឿន អាយុ៣៤ឆ្នាំ ជាប្អូនជីដូនមួយជនរងគ្រោះបានឱ្យដឹងថា បុរសរងគ្រោះដែលអង្គុយស្លាប់នៅតុការរូបនោះមានឈ្មោះ ជួប សិរី ហៅកុង អាយុ៣៥ឆ្នាំ មានប្រពន្ឋឈ្មោះ ស៊ិន យឺន អាយុ៣២ឆ្នាំ គ្រួសារនេះមានកូន៥នាក់ (ប្រុស៣ ស្រី២) កូនស្រីបងអាយុ១៤ឆ្នាំជាមនុស្សគ ចំណែកកូនប្រុសប្អូនអាយុ៣ឆ្នាំ ។ នៅថ្ងៃកើតហេតុ បុរសរងគ្រោះបានទៅទៅចូលរួមពិធីមង្គលការបងប្អូនក្នុងនៅចុងភូមិតាំងពីម៉ោង១១ព្រឹក ហើយបាននៅរាំលេងរហូតល្ងាច ដោយរាំបណ្តើរមកអង្គុយផឹកស្រាបៀរនៅតុបណ្តើរ ។ រហូតដល់ម៉ោងជាង៤ល្ងាច គេឃើញបុរសរួបនោះអង្គុយក្រាបនៅលើតុ ពេលនោះអ្នកនៅអង្គុយជាមួយមិនបានចាប់អារម្មណ៏អ្វីទេ ស្មានតែបុរសរូបនោះស្រវឹង ក៏មិនមាត់មិនក ឬដាស់អីដែរ តែពេលនោះមានក្មេងស្រីម្នាក់ដែលត្រូវជាក្មួយជនរងគ្រោះបានមកអង្គុយហូបបាយជិតនោះ បាននិយាយថា ពូកុងឯងកុំក្អួតណាខ្ញុំកំពុងហូបបាយ ហើយពេលនោះ អ្នកអង្គុយផឹកជាមួយបានដាស់ជនរងគ្រោះ តែពេលដាស់ និងទាញឱ្យផ្ងាឡើង ស្រាប់តែឃើញជនរងគ្រោះដាច់ខ្យល់ស្លាប់បាត់ទៅហើយ ទើបនាំគ្នាឆោឡោឡើង ខ្លះជួយរិតទ្រូង ផ្លុំត្រចៀក តែជនរងគ្រោះមិនអាចរស់មកវិញបានឡើយ ។
ស្ត្រីឈ្មោះ ស៊ិន យឺន ជាប្រពន្ឋបាននិយាយថា កាលពីខែមុន ប្តីគាត់ធ្លាប់បែបនេះម្តងហើយ តែបានអ្នកស្រុកជិតខាងជួយទាន់ គាត់មិនដឹងថា ប្តីគាត់មានជម្ងឺអ្វីនោះទេ ។
សមត្ថកិច្ចជំនាញនគរបាលបានទៅពិនិត្យធ្វើកោសល្យពិច្ច័យសពជនរងគ្រោះបាននិយាយថា ជនរងគ្រោះបានស្លាប់ដោយសារខ្យល់ គ ហើយបានប្រគល់សពជូនក្រុមគ្រួសាជនរងគ្រោះធ្វើបុណ្យតាមប្រពៃណី ៕
ចែករំលែកព័តមាននេះ